¹ Salam ngket Yakobus, batak Allah ai Tuhan Yesus Kristus, epo keduo belas suku mbo pndenge. ² Erai buntung-erai buntungku, nang ka ikam nyoru tapi tetap ka ego, ena ikam kono bjnis pengkono, ³ Koe ikam tau, se iman kam ena kono ikap ene ngasil kebuket. ⁴ Ai koe ka kebuket ene ngasil bua yo ensak, apa ikam jadi bol-bol ai belo keo kurang ise-ise. ⁵ Tapi ena mbo ikam keo yo kurang pentau, mokoiyo io tindu pentau epo Allah,- yo miye epo eka ulun diang sawai kesong ai ulak belo di ngungkit-ngungkit-, nau umbang ene deniye epoiyo. ⁶ Mokoiyo io tinduiyo diang iman, ai sama sekali nang beta sampe kerong-kerong, koe ulun yo kerong-kerong sama kati umbak mbo tasik, yo ngelebabuk epo lana landuh koe wayat. ⁷ ulun yo ktine ene nang ka ngotus, se io anta kuli ise-ise ngket Tuhan. ⁸ Koe ulun yo pengenanam duo-duo ene belo di tau keturoh lang penyembolumiyo. ⁹ Buen ka erai buntung yo bolumiyo belo keo penjapa mokoiyo ego koe Allah mekomboiyo, ¹⁰ ai ulun yo tataw koe Allah mekiwa awaiyo koe ulun tataw ene anta mopas kati bungo dikut. ¹¹ Koe matoolo dombo diang pa iyo layong beta laju ngelayo dikut ene, sampe nyorak ka bungoiyo ai mapos kemerambaiyo. Ktinelou nau umbangiyo diang ulun tataw; mbo lang eka penyetaketiyo anta mapos. ¹² Ego ka ulun yo betahan lang pensobaan, koe ena io sundok kelian nikap, io anta kuli upaiyo yoene bolum yo jenanji koe Allah epo ise-ise ulun yo nengkosang Io. ¹³ Ena ulun kono ikap, nang ka io ngulek: " ikap endo ulet ngket Allah!" koe Allah belo dapet ikap koe yo dat, ai Io se belo di anta ngikap ise-ise. ¹⁴ tapi tongku ulun nikap koe pengkakaniyo se, koe io bepatak ai preket koeiyo. ¹⁵ Ai ena pengkakan ene sundok kebua, io ngoret dosa; ena dosa ene sundok ensak, io ngoret maot. ¹⁶ Erai buntung-erai buntungku yo tengkossangku, nang ka tang! ¹⁷ Tongku diye sokoi yo buen ai tongku penyediye yo bol-bol penguletiyo ngket ombo, pinodiwa ngket Bapa eka-eka pa; mbo-Iyo belo keo anta wensut ai belo keo amba. ¹⁸ Ngket petua-Iyo se Io sundok nampa taka koe firman yo beta, apa taka mbo sentah-sentah yo sundok tenentong jadi pea yo tuo tingen mbo eka penyetampa-Iyo. ¹⁹ Oo erai buntung-erai buntung yo tengkosangku, knenop ka nau umbang endo: tongku ulun mokoiyo resi nte nempaning, tapi selenai nte besara ai lou nang resi balo mara; ²⁰ koe pengemara ulun ene belo nggawi yo kono mbo onon Allah. ²¹ Koe ene oding ndok eka ise-ise yo merota ai yo dat yo deo beta ene ai trima ka diang lami lamai firman yo bekulo lang kesongkam, yo keo kuasa nte nyelamat bolumkam. ²² tapi mokoiyo ikam jadi tukang ngelaku firman ai belo di pulun penempaning tingen; koe ena belo di ktine ikam ngakal ikam se. ²³ Koe ena ulun pulun nempaning firman tingen ai belo di ngelakuiyo, io ene nton ulun yo desung meti-meti waeiyo yo sebetaiyo mbo onon sermin. ²⁴ Bayu ka io meti io se, io laju malan ai io peles kewot nauiyo se. ²⁵ Tapi ise-ise ulun nyempeti aturan yo sempurna, yoene aturan yo ngembebas ulun, ai io buket mbo lang ne, jadi mba di nempaning tingen ai nengkewotiyo, tapi beta-beta ngelakuiyo, io anta ego koe gawiiyo se. ²⁶ Ena keo ulun ngontus io se sembayang, tapi belo ngtep pemesaraiyo, io ngakal io se, jadi belo keo jodoh sembayangiyo. ²⁷ Sembayang yo beta-beta ai belo keo bila molon mbo onon Allah, Bapa taka, yoene nuntun pea plulo ai balu-balu lang kebenasa dero, ai ngenjaga apa bolum io se belo lumpat rusak koe denia.