¹ Erai buntung-erai buntung, kati ulun yo keo iman epo Yesus Kristus, Tuhan taka yo mulia, lang iman ene taka nang mili-mili ulun. Koe, ena keo ulun ² sumba epo lang kowon kam diang makai sicin amas ai pakaian buen ai ulet lou ulun kao epo mne diang baju sloar riwak rawek, ³ ai ikam ngnuon ulun yo spakai buen ene laju ngulek epo iyo : "Tunge ka mbo awa yo buen endo! ", tapi epo ulun yo kao ene ikam ngulek: Akat ka mbo menduh! " ena belo : "Tunge ka mbo dasoi endo dmpet botis ku! " , ⁴ mba be ikam sundok ngmbeda lang kesong kam ai bse ungka kati akim diang akal gramas? ⁵ Tempaning kam ta, o erai buntung-erai buntung yo tngkosang ku! Belo be Allah mili ulun-ulun yo nte itan kao mbo dnia endo nte jadi tataw lang iman ai jadi ngwaris krajaan yo sundok janji-Iyo epo ise-ise yo nengkosang Io. ⁶ Tapi ikam sundok ngina ulun-ulun kao. Mba be ube ulun-ulun tataw ene yo nerjo ikam ai yo matak ikam epo meja ijau? ⁷ Mba be dero yo nguja Karan yo mulia, yo koe-Iyo ikam jadi mpun Allah? ⁸ Tapi anta, ena ikam nglaku aturan yo nuon tingen yo tnulis lang Alkitab : "Kosang ka epo sama ulun kati epo kompu tonga kam se", diang ktine ikam nglaku yo buen. ⁹ Tapi, ena ikam mili-mili ulun, ikam nampa dosa, ai koe aturan ene jadi melak, se ikam nglanggar aturan. ¹⁰ Koe ise-ise ngaya eka aturan ene, tapi belo nyanda erai ka ngket aturan ene, io sala epo eka-eka iyo. ¹¹ Koe Io yo ngulek: "Nang bjinah" , Io ngulek lou" Nang ngmpate". Jadi ena ikam bjinah tapi ngpmate, jadi ikam ene karan yo nglanggar aturan lou. ¹² Bsara ai mkotang nau gawi gata kati ulun-ulun yo anta kono ukum koe aturan yo ngbebas ulun. ¹³ Koe ukuman yo belo keo kanam kasian anta mitek epo ulun kono yo belo tau kasian. Tapi kanam kasian anta kuret mbo meja ijau. ¹⁴ Ise jodo iyo, erai buntung-erai buntung ku, ena ulun ngulek, se io keo iman, pdahal belo di melak mbo gawi gata io? Kuli be iman ene nylamat io? ¹⁵ Ena erai buntung song erai buntung bawe belo keo pnyepakai ai kurang nte okan singkap olo-olo, ¹⁶ ai keo lelu ngket ikam ngulek : "Malan buen-buen, pnakai ka baju kapal ai kuman ndok boting! " , tapi io belo di mie epo ise yo perlu nte kompu tonga iyo, ise jodo iyo ene? ¹⁷ Ktine lou umbang iyo diang iman : Ena iman ene belo di nlumpat diang gawi gata, sbeta io iman ene mate. ¹⁸ Tapi bahe keo ulun ngulek : "Mbo ikam keo iman ai mbo aku keo gawi gata" , aku se nuing io: "Pkelak ka epo aku iman kam ene mba diang gawi gata, ai aku se kakan mkelak epo ikam iman ku ngket gawi gata-gawi gata ku." ¹⁹ Iko persaya, se keo erai Allah bute? Ene buen! Tapi ndok setan-setan lou persaya se nau umbang ene ai dero ngrekitik. ²⁰ O ulun yo dadal, kakan be iko ngangkan tmpondo, se iman belo diang gawi gata ene iman yo osaw? ²¹ Mak be Abraham, uma taka, pinokono koe gawi gata-gawi gata iyo, des io mie Ishak, pea iyo, ban mezbah? ²² Ikam kito, se iman bgawi sama-sama diang gawi gata-gawi gata ai koe gawi gata-gawi gata ene iman jadi sempurna. ²³ Diang sara ktine genap doko oli nas yo ngulek: "Laju persaya doko Abraham epo Allah, jadi Allah ngreken nau umbang ene epo iyo nte yo se beta memang." Koe ene doko Abraham tinompapa: "Teman Allah." ²⁴ Jadi ikam kito, se ulun sinombeta koe gawi gata-gwai gata iyo ai makse pulun koe iman io tingen. ²⁵ Ai mba be ktine lou Rahab, lonte ene, sinombeta koe gawi gata-gawi gata iyo, des io ngona ulun-ulun yo snuyu ene mbo lang lou iyo, laju ngawat dero mutis tete boyan yo mak? ²⁶ Koe kati kompu belo keo roh ene mate, ktine doko lou iman belo diang gawi gata-gawi gata ene mate.