¹ Lpas jman bai Allah bjuli-juli ai diang bmasam nau sara bsurah epo itak kakah taka tete nabi-nabi, ² jadi des jman pngabis endo Io sundok bsara epo taka tete Pea-Iyo, yo sundok ptoko-Iyo nte Io keo hak nrima eka-eka yo keo. Koe Io Allah sundok nampa dnia endo. ³ Io ene doko wala kmulia Allah ai gambar nau yo beta ngket Allah ai mentugur eka yo keo diang firman-Iyo yo ponu diang kuasa. Ai des Io sundok mui mrese ngket dosa, Io tunge ngket tadah sanan Yo Paling Olay, mbo awa yo ombo, ⁴ pawak aso ombo se mlekat-mlekat, sama kati karan yo dnie epo-Iyo pawak buen se karan dero. ⁵ Koe epo ise lelu ngket mlekat-mlekat ene yo pini ulek Io: "Iko Pea-Ku! Iko sundok tempeaKu montuk olo ndo?" ai "Aku jadi Bapa-Iyo, ai Io jadi Pea-Ku?" ⁶ Ai des Io moit nua Pea-Iyo yo tuo tingen epo dnia, Io ngulek: "Eka mlekat Allah arus nyembah Io." ⁷ Ai nau umbang mlekat-mlekat Io ngulek: "Yo nampa mlekat-mlekat-Iyo jadi brubu ai playan-playan-Iyo jadi dolan api." ^{9 8} Tapi nau umbang Pea, Io ngulek: "Awa pnunge-Ko, o Allah, nokon nte dor ai turai-turai, ai goloy krajaan-Ko ene doko goloy yo beta. ⁹ Iko gawal yo adil ai ngekey gawi triaw; koe ene Allah, Allah-Ko sundok nota Iko diang lnga nte tanda kgawal, nyisa lalo tman-tman lang kowon-Ko." ¹⁰ Ai: "Des tla iyo, o Tuhan, Iko sundok mayak tondal awa nondok dnia ai langit ene pnyentampa kayang-Ko. ¹¹ Eka ene anta mapos, tapi Iko dor keo, ai eka ene anta jadi usang kati diris laung; ¹² kati jubah anta dero gulung Ko, ai kati pngemekus dero anta nensut nau, tapi Iko nokon sama, ai taun-taun-Ko belo tau sundok." ¹³ Ai epo ise po lelu mlekat ene pini ulek Io: "Tunge ka ela tadah sanan-Ku, sampe tampa Ku bali-bali Ko jadi awa pnoda botis Ko?" ¹⁴ Belo be eka dero ene doko roh-roh yo mlayani, yo snuyu nte nglayani dero yo arus kuli slamat?