¹ Ngket Paulus, jadi Rasul, mba di koe ulun, belo low di diang kuasa ulun, tapi koe Yesus Kristus ai Allah, Bapa, yo sundok msuli Io ngket ekang ulun mate, ² ai ngket eka-eka ulun yo keo sama-sama diang aku, epo jmaat-jmaat mbo Galatia: ⁵ kasih karunia diang ikam ai damai sjahtra ngket Allah, Bapa taka, ai ngket Tuhan Yesus Kristus, ⁴ yo sundok nyrah kompu tonga-Iyo koe dosa-dosa taka, nte ngupey taka ngket dnia triaw yo tempo ndo endo, kati ptua Allah ai Bapa taka. ⁵ Nte-IYo ka doko kmulia turai-turai! Amin. ⁶ Aku heran, se ikam resi beta ngendikah Io, yo koe kasih karunia Kristus sundok momba ikam, ai nyarak injil yo mak, ⁷ yo sbeta iyo makse Injil. Keo ulun yo ngacau ikam tingen ai yo keo ptua nte nbalik Injil Kristus. ⁸ Tapi tontan ko kain ktine low mlekat ngket sorga yo nyampe epo ikam injil yo makse se Injil yo sundok sampe kain epo ikam, io kono kutuk. ⁹ Kati yo sundok ulek kain bune, tempo ndo aku ngulek sindai nua: ena keo ulun yo nyampe epo ikam injil, yo makse diang ise yo sundok trima kam, io kono kutuk. ¹⁰ Jadi ktimbe tempo ndo: keo be aku meto penggawal ulun ena belo penggawal Allah? Keo be aku nyoba yo sengkono epo ulun? Ena ka aku aso kakan nyoba yo sengkono epo ulun, jadi aku makse batak Kristus. ¹¹ Koe aku ngulek beta-beta epo ikam, erai buntung-erai buntungku, se Injil yo sampe ku ene makse injil ulun. ¹² Koe aku nrimaiyo mba di ngket ulun, ai makse ulun yo nutuy matukiyo epo aku, tapi aku nrimaiyo koe psan Yesus Kristus. ¹³ Koe ikam sundok kringo nau umbang bolum ku bune lang agama Yahudi: belo keo jepan aku ngurow ngsa jmaat Allah ai bkomer ngempate dero ¹⁴ Ai mbo lang agama Yahudi aku pawak aso maju se deo tman yo nyongkar diang aku ngket bangsaku, jadi aku ene ulun yo moyoh beta nglaku adat istiadat itak kakahku. ^{17 15} pi des Io, yo sundok mili aku aso ngket lang buntung ineku ai momba aku koe kasih karunia-Iyo, ¹⁶ yo sengkono nte mkelak Pea-Iyo mbo lang aku, apa aku ngabar Io mbo ekang bangsa-bangsa makse Yahudi, jadi ndok belo ile-ile aku tindu timbang pngenanam epo ulun; ¹⁷ aku belo low di malan epo Yerusalem nte nyruku dero yo sundok jadi rasul yo ono se aku, tapi aku brangkat epo tana Arab ai ngket mne mulik nua epo Damsyik. ¹⁸ Trus, tolu taun sundok ene, aku malan epo Yerusalem nte nandang Kefas, ai aku nsan limo blas olo mbo louiyo. ¹⁹ Tapi ndok belo erai kongo aku kito rasul-rasul yo mak, pulun ka Yakobus, erai buntung Tuhan Yesus. ²⁰ Mbo onon Allah aku ngulek beta-beta: ise yo tulis ku epo ikam endo beta memang, aku mba di nampa eta. ²¹ Sundok ene aku bju epo ja-ja Siria ai Kilikia. ²² Tapi jmaat-jmaat Kristus mbo Yudea nokon belo pian tau nauku. ²³ Dero kringo tingen, se io yo bune ngurow ngsa dero, tempo ndo ngabar iman, yo pini kakan pateiyo. ²⁴ Ai dero ngmulia Allah koe aku.