¹ Ngket Paulus, rasul Kristus Yesus koe ptua Allah, mitek ulun-ulun kudus mbo Epesus, ulun-ulun prsaya lang Kristus Yesus. ² Kasih karunia ai damai sjahtra ngket Allah, Bapa taka ai ngket Tuhan Yesus Kristus diang ikam. ³ Yo paling pnuji Allah ai Bapa Tuhan taka Yesus Kristus yo lang Kristus sundok mie epo taka eka-eka brkat rohani mbo lang sorga. ⁴ Koe lang Io Allah sundok mili taka onon se dnia tnampa, apa taka kudus ai belo keo bila molon mbo onon-Io. ⁵ Lang Kasih Io sundok mtoko taka ngket tla koe Yesus Kristus nte jadi anak-anak-Io, sengkono diang petua Io se memang. ⁶ Koe ene taka mmuji tuhan, koe die sokoi-Io mulia nte taka, yo die-Io epo taka mbo lang-Io, yo knosang ke-Io. ⁷ Koe lang Io ai koe daya-Io taka tnbus, yo ene dosa pinokampun, mnurut pngkeo die sokoi-Io, ⁸ yo serah sindai koe-Io epo taka lang pngeka hikmat ai pntau. ⁹ Koe Io sundok mmkelak yo melim lang petua-Io epo taka, sengkono diang rensana yo ptua-Io se memang, yo ene rnsana yo ngket tla memang sundok pinotoko koe-Io lang Kristus. ¹⁰ Nte nyiap sampe jman nte mkerai lang Kristus, nte pengutok eka-eka yo mbo sorga ktine low mbo dnia endo. ¹¹ Aku ngulek "mbo lang Kristus", koe lang Io tingen kain kuli bagian yo jnanji ene, kain yo ngket tla sundok pinotoko nte kuli bagian ene yo sengkono diang ptua Allah, yo ise pun ene memang mba dikeo ngelalo se ptua-Io. ¹² Apa kain, yo kola ndo sundok mayak harapan epo Kristus, kate jadi pujian nte kemuliaan-io. ¹³ Mbo' lang Io ikam low - koe ikam sundok nmpaning firman yo beta, yo ene Injil Kselamatan kam - mbo' lang Io ikam low, des ikam persaya, kinometrai diang Roh Kudus, yo jnanji koe' Io' ene. ¹⁴ Ai Roh Kudus ene ngnjamin nte taka sampe taka kuli eka-eka yo ene, yo doko pnous apa taka jadi mpun Allah, nte muji kmuliaan Iyo. ¹⁵ Koe ene, sundok aku kringo nau iman kam lang Tuhan Yesus ai soal kasih kam epo eka-eka ulun kudus, ¹⁶ aku se lou mbadi brenti bsukur koe ikam. Ai aku dor knop ikam lang doaku, ¹⁷ Diang tindu epo Allah Tuhan taka Yesus Kristus, yo ene Bapa yo mulia ene, apa Io' se miye epo ikam Roh hikmat ai wahyu apa' tau beta se Iyo. ¹⁸ Ai apa Io nampa mato kesong kam jadi trang: apa ikam tau arapan ise-ise atok lang bomba Iyo ene: bol ktatau kemuliaan yo ptoko Iyo nte ulun-ulun kudus, ¹⁹ bol hebat kuasa Iyo nte taka yo prsaya, sngkono diang kturon kuasa Iyo, ²⁰ yo gawi Iyo se lang Kristus diang mensuli yo ngket ekang ulun mate diang mentunge Iyo mbo tadah sanan Iyo lang sorga, ²¹ pawak ombo se eka-eka pmrenta ai pnguasa ai kekuasaan ai krajaan ai tongku karan yo dapet ulek, belo di mbo dnia endo tingen, tapi low mbo dnia yo anta ulet. ²² Eka-eka ene sundok payak Iyo iwat botis Kristus ai Io sundok die Iyo epo jmaat nte Pngutok ngket eka-eka yo keo. ²³ Jmaat yo ene kompu Iyo, yo ponu koe' Iyo, yo nmponu eka-eka ene.