¹ Ngket Paulus, rasul Kristus Yesus koe ptua Allah nte nyampe janji umbang nau bolum lang Kristus Yesus, ² epo Timotius, peaku yo snayang: kasih karunia, rahmat diang damai sjahtra ngket Allah Bapa ai Kristus Yesus, Tuhan taka, sama-sama diang iko. ³ Aku bsukur epo Allah, yo layanku diang pngnanam yo buen kati gawi itak kakahku. Ai aku trus knop se iko lang pninduku, molo malom. ⁴ Ena aku knop se olu mato yo tmbalingko, aku kakan kito iko nua apa bol pngegoku. ⁵ Koe aku knop se iman ko yo beta-beta, yo dko iman yo tla bolum lang itak ko Lois ai lang ine ko Eunike ai aku yakin bolum lou lang iko. ⁶ Koe ene dko aku mknop iko nte mraya karunia Allah yo keo mbo iko koe kayangku sundok pnayak ombon iko. ⁷ Koe Allah mie epo taka makse roh takut, tapi roh kuasa, kasih ai tratur. ⁸ Jadi nang mai bsaksi soal Tuhan taka ai nang mai koe aku, ulun yo nukum koe Io, tapi lumpat ka ssa nte Injil-Iyo ngket kuasa Allah. ⁹ Io doko yo nylamat taka ai momba taka diang bomba yo kudus, belo di koe gawi gata taka, tapi ngket ptua ai die sokoi-Iyo se,yo sundok dnie epo taka lang Kristus Yesus ono' se dnia keo ¹⁰ ai yo tempo ndo pinokelak diang pngulet Tukang nylamat taka Yesus Kristus, ene koe Injil sundok mtepok kuasa yo nte moit mate ai mkulet bolum yo kden. ¹¹ Nte Injil endo doko aku sundok tntap nte pnyampe, nte rasul ai guru. ¹² Koe ene doko tukun yo aku jadi ssa, tapi aku belo di mai; koe aku tau epo ise aku persaya ai aku persaya se Io keo kuasa ngnjaga ise yo sundok die Io epo aku ndok sampe olo Tuhan. ¹³ Knurut ndok eka ise io sundok dingo ko ngket aku nte sonto tutui batuk yo buen ai ene nlaku diang iman ai kasih lang Kristus Yesus. ¹⁴ Jnaga beta-beta pngkeo yo buen, yo sundok die Io epo taka, koe Roh Kudus yo sundok nongos lang taka. ¹⁵ Iko tau se eka dero yo mbo Asia idi bpeoh ngket aku; ktine low Figelus ai Hermogenes. ¹⁶ Tuhan moko yo mie rahmat-Iyo epo kluarga Onesiforus io sundok bjuli-juli mrongin pngnanam ku. Io belo di mai nyruku aku lang penjara. ¹⁷ Des mbo Roma, io bkomer meto aku sampe io ruku aku. ¹⁸ Moko yo Tuhan mie rahmat-Iyo epo io des olo Tuhan. Deo beta playanan yo nlaku koe io mbo Efesus, iko deo tau ene se aku.