¹ Strus io, erai buntung-erai buntung, bdoa nte kain, apa firman Tuhan kate maju ai kinonuon, sama kati yo sundok jadi mbo ekang ikam, ² apa kain lopos ngket pnganggu ai ulun-ulun akal triau, koe mbadi eka ulun kuli iman. ³ Tapi Tuhan ene setia. Io anta mamuturon kesong kam ai ngenjaga ikam ngket yo dat. ⁴ Ai kain prsaya lang Tuhan, se ise io psan kain epo ikam, nte ngkam joun ai anta ngkam gawi. ⁵ Apa Tuhan ttap nadah kesong ko epo kasih Allah ai epo ksabar Kristus. ⁶ Tapi kain msan epo ikam, erai buntung-erai buntung, lang karan Tuhan Yesus Kristus, apa ikam ngliki ngket ulun io belo nglaku gawi gata iyo ai io belo ngaya tutui batuk yo sundok trima kam ngket kain. ⁷ Koe ikam se tau, timbe nau ikam arus lumpat nau umbang kain, koe kain mbadi ngemban bgawi diang ikam, ⁸ Ai belo dikuman roti ulun tingen, tapi kain bkomer diang bnasa molo malom, apa belo nengkoyat ise-ise yo ngket ikam. ⁹ Mbadi leka kain belo keo hak nte ene, tapi kain kakan jadi contoh nte ngkam, apa ikam nyarak. ¹⁰ Koe, lou des kain keo ekang ikam, kain meknop endo epo ikam : Ena keo ulun belo kakan begawi, nang iyo kuman. ¹¹ Kain ngulek ktine ene koe kain kringo, se keo ulun yo belo kroan bolum iyo ai belo begawi, malah pae diang hal-hal yo belo tadah. ¹² Ulun-ulun yo ktine ene kain meknop ai nasehat lang Tuhan Yesus Kristus, apa dero nokon tenang ngelaku gawi iyo ai diang ktine kuman okan singkap iyo se. ¹³ Ai ikam, erai buntung, nang ayu-ayu nggawi ise yo buen. ¹⁴ Ena keo ulun yo belo kakan nempaning ise yo ulek kain lang surat endo, tenanda iyo ene ai nang beteman diang iyo, apa iyo mai, ¹⁵ Tapi nang ngomoi iyo kati musuh, tapi knae iyo kati erai buntung. ¹⁶ Ai Io, Tuhan damai sejahtera, apa mie damai sejahtera-Io trus-trusan, lang eka-eka soal, epo ikam. Tuhan sama -sama diang ikam eka. ¹⁷ Salam ngket aku, Paulus. Salam endo tulis ku diang kayang ku se. endo tanda lang tongku surat: ketindo nau tulisan ku. ¹⁸ Kasih Karunia Yesus Kristus, Tuhan taka, sama-sama diang ikam eka!