¹ Erai buntung- erai buntung yo knosang, endo sundok surat yo keduo, yo tulisku epo ikam. Mbo lang keduo surat ene aku bkomer nampa nengkuat pentau kam yo brse diang mmknop-mmknop, ² apa ikam knop se pmesara-pmesara yo bai bareh yo sundok nulek koe nabi-nabi kudus ai mknop se prenta Tuhan ai Tukang Nyelamat yo sundok snampe koe rasul-rasulkam epo ikam. ³ Yo tla tingen arus ikam tau yoene, se mbo montuk olo-olo pengabis anta nyoret pengebek-pengebek diang ebek-ebekiyo, yoene ulun-ulun yo bolum ngaya pengkakan ngenakosiyo. ⁴ Ulek dero: " Ela mone janji nau umbang pengulet-Iyo ene? Koe ngket des ine uma itak kakah taka mate, eka ise masam nokon kati nau yo tla, montuk des denia tnampa." ⁵ Dero sengaja belo kakan tau, se koe firman Allah langit sundok keo ngket bai, ai lou denia yo tnampa ngket danum ai koe danum, ⁶ ai se koe danum ene, denia yo bai sundok tumar, kinomapos koe danum owa olai. ⁷ Tapi koe firman ene lou langit ai denia yo tmpo ndo jenaga ngket api ai nona nte olo des mutus plikara ai pengenate ulun-ulun triaw akal. ⁸ Tapi, erai buntung-erai buntungku yo knosang, yo erai endo belo kate ikam tlengo, yoene, se mbo onon Tuhan erai olo sama kati seribu taon ai seribu taon sama kati erai olo. ⁹ Tuhan belo di krai ngemontuk janji-Iyo, beta ko keo ulun yo ngontus ene se krai, tapi Io doloh epo ikam, koe petua Io apa nang keo yo mate, tapi apa eka ulun mulik ai betobat. ¹⁰ Tapi olo Tuhan anta ulet kati pengako. montuk olo ene langit anta mapos diang ngrekuntur ries ai ise masam atok denia anta siya lang dolan api, ai denia ai eka yo keo ban mne anta eka gow. ¹¹ Jadi, ena eka ise masam endo anta tmme diang sara ktine, beta-beta memang bolum kam arus berse ai takut se Tuhan ¹² yoene ikam yo minte ai mresi pengulet olo Allah. Montuk olo ene langit anta mapos abis lang api ai ise masam atok denia anta rano koe dolaniyo. ¹³ Tapi sengkono diang janji-Iyo, taka minte langit yo bayu ai denia yo bayu, mbo mne keo yo kono. ¹⁴ Koe ene, Erai buntung-erai buntung yo knosang, ulak ikam minte eka endo, ikam arus bkomer, apa ikam dnapet se belo keo bila molon ai belo keo merota mbo onon-Iyo, lang damai diang Io. ¹⁵ Alo ka ikam ngenanam se kedoloh Tuhan taka ene miye boyan nte ngkam nte kuli selamat, kati lou Paulus erai buntung taka yo knosasng, sundok nulis epo ikam ngaya pentau yo deniye ngket Tuhan epoiyo. ¹⁶ Nau umbang ene tampaiyo lang eka suratiyo, ena des io besara nau umbang plikara-plikara endo. Lang surat-suratiyo ene keo nau umbang yo poyo nte paham atokiyo, sampe ulun-ulun yo belo paham ai yo belo turon imaniyo, ngulek yo belo sebetaiyo yo jadi nte ngempate dero se, sama kati yo gawi dero lou diang surat-surat yo mak. ¹⁷ Tapi ikam, erai buntung-erai buntung yo knosang, ikam sundok tau nau umbang endo ono se ene. Koe ene bejaga-jaga, apa ikam nang bekoit-koit lang ketang ulun-ulun yo belo tau aturan, ai nang mapos penyegop kam yo turon. ¹⁸ Tapi menduan ka lang kasih karunia ai lang pentau se Tuhan ai Tukang Nyelamat taka, Yesus Kristus. Nte-Iyo kemulia, tmpo ndo ai sampe turai-turai.