¹ Kati umbang nabi-nabi plsu ngket bai yo nyoret mbo ekang umat Allah, ktine low mbo ngket ikam anta keo guru-guru plsu. Dero ene anta mie tutui batuk yo belo kono yo moit epo nte mate. Ai dero ube anta belo ngangkan pnguasa yo sundok ngmbebas dero. Diang ktine peles ka dero ene nampa nte sesa mitek kompu tonga dero se. ² Beta ko ktine, deo ulun anta nyarak nau umbang bolum dero yo ngmundal akal triaw ene, ai koe dero ene Boyan yo Kono jadi kono uja. ³ Ai koe pngugoh guru-guru plsu ene naket ngket ikam asil diang otang pngesah-pngesah yo ramu-ramu dero. Tapi nte gawi gata dero ene ukuman usang ka minte dero ai pngmate dero belo anta btanggo. ⁴ Mlekat-mlekat yo nglaku dosa ka belo di anta toro Allah nte ikek ukum, makse ko noding epo lang nraka ai diang ktine nyrah dero epo lang liang-liang yo seom nte nyeing dero sampe Olo nte ngukum dero. ⁵ Ktine low umbang dnia des jman bai bareh, Allah belo di mie boyan nte lopos ngket itek ukum. Allah nampa owa olai epo dnia ulun-ulun akal triaw jman ene. Pulun ka Nuh diang turu kongo ulun yo mak tingen yo sinolamat, koe Nuh nyampe umbang yo kono, umbang bolum yo sngkono mbo kesong Allah. ⁶ Sama low umbang iyo diang kota Sodom diang Gomora: Allah mtumar kota-kota ene diang api apa ulun tau ktine nau umbang yo pngkono ulun-ulun yo akal triaw ene anta. ⁷ Tapi Lot ulun yo kono ene sinolamat, koe io ngaya ptua Allah; io nte nungka sesa koe gawi triaw ngket ulun-uluu yo akal triaw. ⁸ Mbo ekang-ekang ulun yo akal triaw ene Lot yo buen kno ene bolum diang nungka nantai kanam sesa, koe tongku olo io kringo ai kito umbang gawi gata dero yo triaw. ⁹ Jadi melak se Tuhan tau ktimbe nylamat ulun-ulun yo aya-oyot diang ptua-Iyo montuk des dero deo kono ikap. Ai Tuhan tau ktimbe nyeing ulun-ulun yo akal triaw nte kurow kesa des Olo nte kono Ukum, ¹⁰ tungen tingen nte ulun-ulun yo nyronon kanam ruang dero epo yo rmis, ai yo nguja kuasa Allah. Dero guru-guru plsu ene ronu beta ai sombong sampe dero belo keo nyan bata nguja ise-ise yo mbo sorga low! ¹¹ Mlekat-mlekat ka beta ko bet kgalak ai bet keo kuasa se dero, belo makai nguja ktine, ena mlekat-mlekat tindu apa dero nukum ela onon Allah. ¹² Tapi dero ene sama kati korik-kotok yo belo keo akal, sama kati bnatang yo kinomekus pulun jodo nte tangop ai nte pate. Dero nguja ise yo dero belo di tau, sampe koe gawi dero yo triaw ene dero se sesa kati korik-kotok yo belo di namu, ¹³ ai nte kono bolum sesa nte upa gawi-gata triaw dero ene. nungka ngsa sen mbo molo ene buen san dero. Dero ene nte ngermis ai nte ngeleta, yo ngmundal diang pngkakan ruang dero montuk tunge kuman diang ikam. ¹⁴ Tadah pngeti dero belo keo makse se epo yo pokeng ai dero belo tau mole nampa dosa. Dero tukang ngmbelok kesong ulun-ulun yo aso belo pian yakin beta, kesong dero sundok tepet nte ngmundal kowo. Dero ene ulun-ulun yo itek kutuk! ¹⁵ Koe dero sundok ngendikah boyan yo kono, tang doko dero, laju nyarak boyan Bileam, pea Beor, yo tuju kuli upa ngket gawi gata yo triaw. ¹⁶ Tapi Bileam kono kae yo ries koe gawi triaw yo ene, koe keledai yo tendung iyo, yo belo tau bunyal kati ulun, bunyal kati oyon ulun ngusan kdadal nabi ene. ¹⁷ Guru-guru plsu ene kati mato danum yo koreng, kati jaun kembu yo siup riut; nte dero sundok pinotoko awa lang seom yo paling seom. ¹⁸ Koe dero ngontus pngesah yo lmpe-lmpe ai koyaw; pnypokeng pakai dero nte ngndurut ulun-ulun yo bayu ka kuli lopos ngket dero yo bolum tang. ¹⁹ Dero ngnjanji bolum bebas epo ulun mak, tapi dero se ube ene batak-batak ngket pngnate, koe ise yo pkalah ulun, yo ene nte jadi batak ulun ene. ²⁰ Koe ena dero, diang pntau dero se Tuhan ai Tukang nylamat taka, Yesus Kristus, yo sundok kate nglopos taka ngket kuasa yo triaw mbo dnia, tapi sumba nua lang ne, moko ene jadi bet-bet kdat yo oli se ngket yo tla. ²¹ Keo ene nte dero ale ka ena dero belo pini tau se Boyan yo Kono ene ube, se ngket tau laju bdmpeling ngket prenta yo kudus yo snampe epo dero. ²² Nte dero sngkono beta diang umbang pngontus yo beta endo: "Koko mulik nua epo uta iyo, ai bawi yo undus mulik nua epo tenjulong iyo."