¹ Ngket Simon Petrus, batak ai rasul Yesus Kristus, epo dero yo sama-sama diang kain kuli iman koe Allah ene adil ai Tukang Nylamat taka, Yesus Kristus. ² Kasih karunia ai damai sejahtera tambah roa nte ngkam koe pntau se Allah ai se Yesus, Tuhan taka. ³ Koe kuasa-Iyo se Allah sundok mie epo taka eka yo keo jodo nte bolum yo beta-beta smbayang lang Tuhan koe pntau taka se Io, yo sundok momba taka koe kuasa-Iyo yo mulia ai ajaib. ⁴ Diang ktine Io sundok mie epo taka janji-janji yo keo uman ai yo beta-beta olai, apa koe ene ikam kate kuli ngalek bagian lang sipat Allah, ai lopos ngket pngkakan triaw dnia endo yo nte ngmpate dnia. ⁵ Jadi koe ene doko ikam arus diang beta-beta bkomer nte nambah epo iman kam bolum buen, ai epo bolum buen pntau, ⁶ ai epo pntau ngnjaga nau diri se, epo ngnjaga nau diri se kturon kmoyoh, ai epo kturon kmoyoh bolum diang ibadah, ⁷ ai epo bolum diang ibadah pngkosang epo eraibuntung-eraibuntung, ai epo pngkosang epo eraibuntung-eraibuntung pngkosang epo eka-eka ulun. ⁸ Koe ena eka-eka ene keo mbo ikam diang mroa ogot, ikam anta koe ene jadi moyoh ai kuli tau se Yesus Kristus Tuhan taka. ⁹ Tapi ise-ise ulun yo belo keo eka-eka ene, io jadi posa ai idok pngnanm, koe io kewot, se dosa-dosa-iyo ngket bai sundok noding ndok tuyu. ¹⁰ Koe ene eraibuntung-eraibuntung-ku, bkomer doko beta-beta, apa bomba ai pili se ikam ene tambah turon. Koe ena ikam nggawi-iyo, ikam belo anta pini swakur. ¹¹ Diang ktine epo ikam anta dnie beta-beta boyan sumba epo lang Krajaan kden, yo doko Krajaan Tuhan ai Tukang Nylamat taka, Yesus Kristus. ¹² Koe ene aku belo anta sdang kakan mknop ikam nau umbang eka-eka ene, betako ikam sundok tau ene ai sundok turon lang yo kono yo sundok trima kam. ¹³ San ku aku belo kate belo nte nokon mknop ikam nau umbang ene kola-kola aku belo pian ngndikah awa kompu ku endo. ¹⁴ Koe aku tau, se aku anta belo di ola aut ngndikah awa kompu ku endo, kati yo sundok nulek epo aku koe Yesus Kristus, Tuhan taka. ¹⁵ Tapi aku anta bkomer, apa low ena sundok aku bju kden ene ikam nokon knop eka-eka ene. ¹⁶ Koe kain belo di nyarak smpuri-smpuri tampa-tampa ulun, des kain mtau epo ikam kuasa ai pngulet Tuhan taka, Yesus Kristus nte jadi raja, tapi kain beta-beta kito mato nau kkolai-Iyo. ¹⁷ Kain se kito ktimbe nau Io nrima pkolai ai pkombo ngket Allah Bapa, des ulet epo-Iyo oyon ngket Yo Paling Mulia yo ngulek: "Endo doko Pea yo tngkosang-Ku, epo-Iyo doko Aku sngkono." ¹⁸ Oyon ene dingo kain ulet ngket sorga, des kain sama-sama diang Io mbo ombon tunden yo kudus. ¹⁹ Diang ktine kain tambah bpturon koe firman yo sundok snampe koe nabi-nabi. Buen beta ena ikam beta-beta meti nau ene sama kati meti plita yo keo pa lang seom sampe mato olo nyoret ai bintong timur timbul keo pa lang kesong kam. ²⁰ Yo tla tingen arus ikam tau, yo doko se pmnsara ngket Tuhan tete nabi-nabi lang Kitab Suci belo di kate tnakser kati ptua diri se, ²¹ koe belo pini pmnsara ngket Tuhan tete nabi-nabi ene asil ngket ptua ulun, tapi koe suyu Roh Kudus ulun-ulun bsara pakai karan Allah.