¹ Ngket tla aku ngnasehat: Pinodombo penindu, doa syafaat ai usapan syukur nte eka ulun, ² nte raja-raja ai nte ulun yo keo kuasa ngatur, apa taka kuli bolum aman diang damai nte sembayang ai soal-soal yo sopan. ³ Ene yo buen ai yo sengkono epo Allah Juruselamat taka, ⁴ yo memetua apa eka ulun sinolamat ai kuli pentau se yo beta. ⁵ Koe Allah ene tunggel ai tunggel low Iyo yo jadi pengekang ekang Allah ai manusia, yo ene manusia Kristus Yesus, ⁶ yo sundok nyerah kompu-Io jadi pnous nte eka-eka ulun: ene ksaksian des jman yo sundok tnetap. ⁷ Nte kesaksian ene doko aku sundok tnetap nte pngabar ai rasul-yo kesah ku endo beta, aku belo nampa eta-ai jadi guru ulun-ulun makse Yahudi, lang iman ai yo kono. ⁸ Koe ene aku kakan, apa mbo mombe-mombe ulun bangsong bdoa diang nelola palar yo susi, belo diang mara ai belo diang bako tangki. ⁹ Ketine lou bang bawe, apa io braji diang pantas, diang sopan ai nang deo balo umbang, balo yo nang bkepang-kepang, nang makai mas ai mutiara ene low diang diris laung yo larang-larang, ¹⁰ tapi apa io braji diang gawi gata buen, katinau yo pantas nte bawe epo sembayang. ¹¹ Arus yo bang bawe ene suni-suni ai nerima tutui-batuk diang patoh. ¹² Aku ngusan bang bawe nutui matuk ai ngusang mrenta bang song; io suni ka. ¹³ Koe Adam yo ono tnampa, bayu Hawa oli. ¹⁴ Aso nua makse Adam yo kono goda, tapi bawe ene yo kono goda trus toyak epo lang dosa. ¹⁵ Tapi bawe anta sinolamat koe ngmekus pea, asal io tatel lang iman ai kasih ai bolum nte Tuhan diang bolum yo sdang-sdang ka.