¹ Ngket Paulus, rasul Yesus Kristus ngaya ptua Allah, Pnyelamat taka, ai Kristus Yesus, jadi arapan taka, ² epo Timotius, peaku yo beta-beta mbo lang iman: kasih karunia, rahmat ai damai sejahtera ngket Allah Bapa ai Kristus Yesus, Tuhan taka, diang iko trus. ³ Des aku kakan nglajut dalanku epo Makedonia, aku tindu iko apa iko nongos mbo Epesus ai nutui matuk ulun-ulun mne, apa dero nang matuk ajaran yo mak ⁴ apa nang repot diang smpuri ai soal upus yo mbadi keo pnyundok yo, yo cuma nte nampa soal tingen, belo sengkono diang bolum slamat yo die Allah lang iman. ⁵ Jodo tutui batuk ene yo kosang timbul ngket kesong brse, ai ngket lang kesong yo liyo ai ngket iman yo beta-beta. ⁶ Tapi keo ulun yo belo sampe epo tadah ene ai tang lang pnyurah belo keo tadah. ⁷ Dero ene kakan jadi guru hukum Taurat tapi dero belo paham pemensara dero se ai atok kesah yo beta, belo kate belo yo oret dero. Taka tau hukum Taurat ene buen ena sengkono pakai se iyo, ^{8 9} Yo ene diang sadar se hukum Taurat ene mbadi nte ulun yo buen, tapi nte ulun dadal ai ulun rusi, ulun triaw ai ulun bdosa, nte ulun iden, yo ngmpate ine uma, nte ulun yo tuju ngempate, ¹⁰ nte ulun pokeng koreng ai song gawal song, nte pnamput ulun, pnampa eta, nte ulun okan sumpah ai eka-eka yo belo sdngkono diang tutui batuk slomai ¹¹ kati atok Injil ngket Allah yo mulia ai ego beta, kati yo tnape epo aku. ¹² Aku besyukur epo Io, yo meturon aku, yo ene Kristus Yesus, Tuhan taka, koe Io nganggap aku setia ai nyerah pelayanan ene epo aku. ¹³ Aku yo des ene ulun penguja ai ulun pengurow ai ulun pernges, tapi aku sundok tengkosang-Io, koe eka ene sundok gawiku diang belo tau yo ene baling se iman. ¹⁴ Malah kasih karunia Tuhan taka ene sundok deniye diang ruakruaw epo aku diang iman ai tengkosang lang Kristus Yesus. ¹⁵ Pengesah endo beta ai arus tenerima eka-eka: "Kristus Yesus ulet epo denia nte nyelamat ulun bedosa," ai ekang dero ene aku doko yo paling bedosa. ¹⁶ Tapi koe ene ube aku tinongkosang, apa lang kompuku endo, ulun yo paling bedosa, Yesus Kristus mekelak eka kesabar-Io. Diang ktine ene aku jadi sontoh nte dero yo anta persaya epo-Io ai kuli bolum yo kden. ¹⁷ Hormat ai kemuliaan ampe turaiiyo nte Raja eka-eka zaman. Allah yo kden, yo belo melak, yo erai bute! Amin. ¹⁸ Tugas endo biyeku epo iko, Timotius peaku, sengkono diang ise yo sundok nontus anta soal iko, apa pinoturon koe pengontus ene iko ngomer usaha yo buen diang iman ai pengenanam yo liyo. ¹⁹ Keo tenu ulun sundok nolak pengenanam yo liyo ene, ai koe ene gandas iman dero. ²⁰ Yo doko kati Himeneus ai Aleksander, yo sundok serah ku epo iblis, apa dero delan nguja.