¹ Ngket Paulus, Silwanus diang Timotius mitek jemaat ulun Tesalonika yo lang Alla Bapa ai lang Tuan Yesus Kristus. Damai sejahtera mitek ikam lane ² Kain dor bsukur epo Alla koe ikam eka-eka, ai ngontus ikam lang doa' kain. ³ Dor kain ngeno' se ikam guruganta nte iman epo tuhan taka Yesus Kristus la onon Alla ai Bapa' taka ⁴ Ikam eka-eka yo kenosang koe Alla, kain tau se Io sundok mili' ikam. ⁵ Koe Injil yo snampe epo ikam belo di senampe lau'-lau' diang penyurah tingen, tapi low diang kuasa ket roh kudus, yo ene nte meturon kain se penyampe kain epo ikam ene memang beta. ikam kito ka se kain ene bgawi lau-lau nte ngkam. ⁶ Ikam sundok ngaya diang nte kain, ngaya diang nte Tuhan ; ulak diang lang ptikas ptunjol ulun ikam sundok kuli firman ene diang pengenanam ego, ene lau'-lau' koe ongat Roh Kudus. ⁷ keo ene ikam sundok nte jadi tladan nte ulun deo yo prsaya ela Makedonia ai Akhaya. ⁸ Koe ngket ekang ikam ulun kringo firman Tuhan lngkat se mbo Makedonia diang Akhaya tingen, tapi mbo mone awa' sundok kringo kabar iman kam epo Alla, jadi kain belo koyoh bunyal aut soal ene. ⁹ Koe dero se yo ngesah umbang nau kain, ktimbe kain kate trima kam, ktimbe ikam ngendikah berhala laju btadah epo Alla nte nglayan Alla yo kono. ¹⁰ Nte minte pengulet Pea-Io ngket sorga, yo sundok pinosuli koe-Io ngket ekang ulun mate, yo ene Yesus, yo nylamat taka ngket itek pngmara ene anta.