¹ Engket Petrus, rasul Yesus Kristus, epo ulun-ulun penyumba, yo keo mupus mbo Pontus, Galatia, Kapadokia, Asia Kecil ai Bitinia, ² yoene ulun-ulun yo penili, yo sengkono diang petua Allah, Bapa taka, ai yo pinokudus koe Roh, apa patoh epo Yesus Kristus ai nerima tmperik daya-Iyo. Mokoiyo kasih karunia ai damai sejahtera mokin ruak ruaw ombon ikam. ³ Puji ka Allah ai Bapa Tuhan taka Yesus Kristus, yo koe rahmat-Iyo yo olai sundok ngemekus taka nua koe pengenyuli Yesus Kristus ngket ekang ulun mate, epo bolum yo ponu pengundong, ⁴ nte nrima bagi yo belo tau tumar, yo belo tau merota ai yo belo tau layo, yo bekona mbo sorga nte ngkam. ⁵ Yoene ikam, yo nasi nado lang kegalak Allah koe imankam desung ikam minte slamat yo sundok senedia nte pkelak mbo jman penyundok. ⁶ Ego ka mbo nau umbang ene, tontan tmpo ndo ene ikam ile-ile arus belo buen kanam koe bemasam pengkono pengkena. ⁷ Jodo ekaiyo ene yodoko nte mkelak keliyo imankam - yo pawak ombo aso uman iyo se amas yo tau waliw, yo nikap keliyoiyo diang api - sampe ikam kuli kono puji ai kemulia ai pengenuon mbo olo Yesus Kristus mkelak kompu-Iyo. ⁸ Beta ko ikam belo pini kito Io, tapi ikam nengkosang-Iyo. Ikam persaya epo Io, beta ko ikam tmpo ndo belo kito-Iyo. Ikam ego koe pengego yo mulia ai yo belo dpet kesah, ⁹ koe ikam sundok kerapet pengitek imankam, yoene bolumkam slamat. ¹⁰ Slamat ene doko yo sinompti ndok tuyu koe nabi-nabi, yo sundok knesah ono koe tau ngket Tuhan nau umbang kasih karunia yo pinotoko nte ngkam. ¹¹ Ai dero nyempti beta des mone ai ktimbe yo petua koe Roh Kristus, yo keo mbo lang dero, yoene Roh yo onon se ene miye penyurah eka nau umbang kesesa yo anta mitek Kristus ai nau umbang eka kemulia yo nyendikui sundok ene. ¹² Epo dero sundok pinokelak, se dero belo ngelayan dero se, tapi ngelayan ikam diang eka ise masam yo sundok senampe tmpo ndo epo ikam diang tete dero, yo koe Roh Kudus, yo senuyu ngket sorga, nyampe kabar Injil epo ikam, yo doko nau umbang-nau umbang yo mlekat-mlekat kakan tau. ¹³ Koe ene neraduh buen-buen ta akal buenkam, bejaga ta ai payak ta eka pengundongkam ombon kasih karunia yo bniye epo ikam mbo des pengulet Yesus Kristus. ¹⁴ Bolum ta kati pea-pea yo patoh ai nang ngaya pengkakan ngenakos yo mekalah ikam des jman kebungangkam, ¹⁵ Tapi mokoiyo ikam jadi kudus mbo lang eka bolumkam sama kati Io yo kudus, yo sundok momba ikam, ¹⁶ koe keo tenulis: Kudus ta ikam, koe Aku kudus. ¹⁷ Ai ena ikam ngulek-Iyo Bapa, yoene Io yo belo meti wae mutus plikara eka ulun ngaya gawi gataiyo, jadi mokoiyo ikam bolum diang takut epo-Iyo kola-kola ikam nongos mbo denia endo. ¹⁸ Koe ikam tau, se ikam sundok tnous ngket sara bolumkam yo belo keo jodo yo mpunkam ngket itak kakahkam ene makse diang kakas yo tau rusak, mak lou diang pirak, mak lou diang amas, ¹⁹ makse ko diang daya yo larang, yoene daya Kristus yo sama kati daya anak domba yo belo keo merota ai belo keo bila molon. ²⁰ Io sundok penili des onon denia tenampa, tapi - koe ikam- Io bayu mkelak kompu-Iyo mbo jman penyundok. ²¹ Koe Io doko ikam persaya epo Allah, yo sundok mesuli Io ngket ekang ulun mate ai yo sundok ngemulia-Iyo, sampe imankam ai pengundongkam betadah epo Allah. ²² Koe ikam sundok ngemberse kompu tongakam koe kepatoh epo yo kono, sampe ikam kuli ngelaku kosang se erai buntung yo persaya diang bol pengenanam kesong buen, mokoiyo ikam beta-beta bako kosang diang bol kesongkam. ²³ Koe ikam sundok kinomekus nua makse diang bini yo tau tumar, tapi ngket bini yo belo tau tumar, koe firman Allah, yo bolum ai yo kden. ²⁴ Koe: "Eka yo bolum ene kati dikut ai eka kemuliaiyo kati bungo dikut, dikut jadi krep, ai bungo yo nyorak, ²⁵ tapi firman Tuhan nokon ndok turai-turai." Endo ka doko firman yo sampe Injil epo ikam.