¹ Ktine doko lou, des aku ulet epo ikam, erai buntung-erai buntung, aku belo ulet diang pemesara-pemesara yo buen otang belo lou diang kepintar nte nyampe nau umbang Allah epo ikam. ² Koe aku sundok mutus nte belo tau ise-ise mbo ekang ikam makse ko Yesus Kristus, yoene Io yo snalib. ³ Aku lou sundok ulet ngruku ikam diang kasa ai diang takut beta ai ngrekitik. ⁴ Pemesaraku ai penyampeku belo di kesahku diang pemesara-pemesara pintar yo hebat, tapi diang persaya koe kegalak Roh, ⁵ apa iman kam nang sgeweng mbo kepintar ulun, tapi mbo kegalak Allah. ⁶ Beta ko ktine kain nyampe pentau mbo dero yo sundok tuo, yoene pentau yo makse ngket denia endo, ai yo makse ngket penguasa-penguasa denia endo, yoene penguasa-penguasa yo anta kinomapos. ⁷ Tapi yo sampe kain yoene kepintar Allah yo bekona ai melim, yo onon se denia tenampa, sundok senedia koe Allah nte kemulia taka. ¹⁰ Koe epo taka Allah sundok mekelakiyo diang Roh, koe Roh nyelidik eka ise masam, sampe ndok nau umbang-nau umbang yo bkona lang kompu Allah. ¹¹ Ise po mbo ekang ulun yo tau, ise yo keo mbo lang ulun se makse ko roh ulun se yo keo mbo lang io? Ktine lou doko belo keo ulun yo tau, ise yo keo mbo lang kompu Allah makse ko Roh Allah. ¹² Taka belo di nerima roh denia, tapi roh yo ngket Allah, apa taka tau, ise yo diye Allah epo taka. ¹³ Ai koe kain ngjlas nau umbang rohani epo dero yo keo Roh, kain ngesah surah nau umbang pendiye-pendiye Allah diang pemesara yo makse di tutuy batuk epo kain diang kepintar ulun, tapi koe Roh. ¹⁴ Tapi ulun sipat denia belo nerima ise yo ngket Roh Allah, koe nau umbang ene nteiyo yodoko kebungang; ai io belo unong, koe nau umbang ene dapet itung diang sara rohani tingen. ¹⁵ Tapi ulun rohani ngitung eka ise masam, tapi io se belo di itung ulun mak. ¹⁶ Koe: Ise po yo tau kno Tuhan, moko sampe io kuli matuk Io?" Tapi kain ngempun akal Kristus.