¹ Ngket Paulus, yo koe ptua Allah bnomba jadi rasul Kristus Yesus, ai ngket Sostenes, eraibuntung taka, ² epo jmaat Allah mbo Korintus, yo doko dero yo pinokudus lang Kristus Yesus ai yo bnomba jadi ulun-ulun kudus, diang eka-eka ulun mbo mupus awa, yo beta-beta momba epo karan Tuhan taka Yesus Kristus, yo ene Tuhan dero ai Tuhan taka. ³ Kasih karunia ai damai sejahtera ngket Allah, Bapa taka, ai ngket Tuhan Yesus Kristus diang ikam. ⁴ Aku dor ngulek sukur epo Allahku koe ikam nte kasih karunia Allah yo die-Iyo epo ikam lang Kristus Yesus. ⁵ Koe mbo lang Io ikam sundok jadi tataw lang eka-eka nau umbang: lang eka-eka masam pmnsara ai eka-eka masam pntau, ⁶ sngkono diang pmnsara nau umbang Kristus, yo sundok pinoturon la ekang ikam. ⁷ Ktine ka doko ikam belo beta di keo tuno lang ise masam karunia des ikam minte pngmelak Tuhan taka Yesus Kristus. ⁸ Io low anta mturon ikam ndok sampe pnyundok-iyo, apa ikam belo di keo bila molon montuk olo Tuhan taka Yesus Kristus. ⁹ Allah, yo momba ikam nte kerai diang Pea-Iyo Yesus Kristus, Tuhan taka, ene stia. ¹⁰ Tapi nasehatku nte ngkam, eraibuntung-eraibuntung, diang karan Tuhan taka Yesus Kristus, apa ikam kerai tadah kesah surah ai nang keo belo bako sngkono diang ikam se, tapi ube apa ikam pkat ai kerai tadah kno kesong. ¹¹ Koe, eraibuntung-eraibuntungku, epo aku sundok nulek koe ulun-ulun ngket kluarga Kloe nau umbang kam, se ikam keo belo bsngkono diang ikam se. ¹² Otang-iyo oki ene yo doko, se keo tongku ikam yo ngulek: Aku lumpat ngket Paulus. Yo mak ngulek: Aku lumpat ngket Apolos. Keo nua yo ngulek: Aku lumpat ngket Kefas. Aso keo low yo ngulek: Aku lumpat ngket Kristus. ¹³ Keo be Kristus bbagi-bagi? Keo be Paulus snalib koe ikam? Ena belo, keo be ikam bnaptis lang karan Paulus? ¹⁴ Aku ngulek sukur koe ndok belo keo budah erai kongo ngket ikam yo baptis ku makse se Krispus ai Gayus, ¹⁵ jadi belo keo yo kuli ngulek, se ikam bnaptis lang karanku. ¹⁶ Ena kluarga Stefanus aku low yo ngmbaptis-iyo. Makse dero ene aku belo di tau, keo be aso ulun yo baptisku. ¹⁷ Koe Kristus nymuyu aku mba di nte ngmbaptis, tapi nte nyampe Injil; ai ene low belo di diang ktukang bsara, apa salib Kristus nang jadi belo keo jodo. ¹⁸ Koe pnyampe nau umbang salib beta-beta se galu mbo dero yo anta mate, tapi mbo taka yo sinolamat pnyampe ene doko pnggalak Allah. ¹⁹ Koe keo tnulis: "Aku anta nmbelo pntau ulun yo keo pntau ai ksrdik ulun-ulun pintar anta kmapos-Ku." ²⁰ La mone po ulun yo keo pntau? La mone po ahli Taurat? La mone pnglawan ngket dnia endo? Belo be Allah sundok nampa pntau dnia endo jadi galu? ²¹ Koe dnia, lang pntau Allah, belo di tau se Allah koe pntau-iyo, jadi Allah sngkono kesong nte nylamat dero yo prsaya koe kbungang pnyampe Injil. ²² Ulun-ulun Yahudi nngkakan tanda ai ulun-ulun Yunani meto pntau, ²³ tapi kain nyampe Kristus yo snalib: nte ulun-ulun Yahudi jadi batu nte tutur ai nte ulun-ulun makse Yahudi jadi nte bungang, ²⁴ tapi nte dero yo bnomba, ktine nte ulun Yahudi, ktine low nte ulun yo makse Yahudi, Kristus ene doko pnggalak Allah ai pntau Allah. ²⁵ Koe yo bungang ngket Allah aso pawak olai pntau-iyo se ulun, ai yo gle ngket Allah aso pawak galak se ulun. ²⁶ Knop ka doko, eraibuntung-eraibuntung, ktimbe nau kam, des ikam bnomba: mbo ukuran ulun mba di deo ulun yo pintar, mba di deo ulun yo keo kuasa, mba di deo ulun yo hebat. ²⁷ Tapi ise yo bungang san dnia, pili Allah nte ngmai ulun-ulun yo keo pntau, ai ise yo gle san dnia, pili Allah nte ngmai ise yo galak, ²⁸ ai ise yo belo di hebat ai yo belo keo jodo san dnia, pili Allah, sampe ndok ise yo belo di keo arti, pili Allah nte nmbelo ise yo keo arti, ²⁹ apa nang keo ndok erai kongo ulun yo nondek-iyo se la onon Allah. ³⁰ Tapi koe Io ikam keo lang Kristus Yesus, yo koe Allah sundok jadi pntau nte taka. Io mkono ai mkudus ai nous taka. ³¹ Koe ene kati keo tnulis: "Ise-ise ulun yo keo nte tondek, arus-iyo io nondek yo lang Tuhan."