¹ Moperesiti mogolo mongwe le mongwe yo o tlhophilweng mo gare ga batho, o tlhomiwa go direla mo boemong jwa batho mo dilong tsotlhe tse di amanang le Modimo, gore a tle a ntshe dimpho le ditlhabelo tsa maleo. ² O ka dirisana bonolo le ba ba senang kitso le digogela thoko ka gore le ene o dikologilwe ke bokoa. ³ Ka ntlha ya se, go tlhokafala gore le ene a ntshe ditlhabelo tsa maleo a gagwe, fela jaaka a dira ka maleo a batho. ⁴ Ga se ka ntlha ya gagwe gore mang le mang a tseye tlotla e. Le fa go ntse jalo, o biditswe ke Modimo fela jaaka Arone. ⁵ Ka tsela e tshwanang, le Keresete ga a itlotla ka go itira moperesiti mogolo. Boemong ba moo,yo a neng a bua le ene o ne a re "O Morwaake; gompieno ke nnile Rrago." ⁶ Go tshwana fela le jaaka a bua gape a re, "O moperesiti go ya bosakhutleng mo tsamaisong ya ga Melekisedeke." ⁷ Ka matsatsi a fa a le mo senameng, Keresete o ne a isa dithapelo le dikopo ka selelo se se ko godimo kwa Modimong, Ene yo o kgonang go mmoloka mo losong. O ne a reediwa ka ntlha ya tshiamo ya gagwe. ⁸ Le fa e ne e le Morwa, o ne a ithuta kutlo mo dilong tse a di bogileng. ⁹ O ne a siamisiwa mme a nna poloko ya bosakhutleng mo go mongwe le mongwe yo o mo utlwang. ¹⁰ O ne a tewa ke Modimo go nna moperesiti mogolo mo tsamaisong ya ga Melekiseteke. ¹¹ Go gontsi mo re ka go buang ka Jeso, mme go thata go tlhalosa ka le sa batle go utlwa. ¹² Le fa ka nako e le ka bo le le barutintshi, le santse le letlhoka mongwe yo o ka le rutang dithuto tsa ntlha tsa molaetsa wa Modimo. Le tlhoka masi e seng dijo tse di thata. ¹³ Ka go nne mongwe le mongwe yo o nwang masi ga a na boitemogelo jwa molaetsa wa tshiamo, ka gore o santse a le ngwana. ¹⁴ Mme dijo tse di thata ke tsa bagolo. Ba ke ba ka ntlha ya kgolo ya bone ba katisitseng go tlhaloganya pharologanyo ya bomolemo le bosula.