¹ Pizepita izi neona mngelo muyakine osikapansi kufumira mululu. Enze na ulamuliro ukulu, na ziko letubishiwa na ulemelero wake. ² Ekuwa na lizu likulu, nakuti, "wapona, wapona Babulo mkulu! Wankhala monkhala mwake mwavibanda, mothabira mzimu ulionse uipa, na mothabira nyoni iliyonse iipa na yonyansa. ³ Pakuti maiko yonse yamwa vinyu wa chigololo chake. Mafumu onse bapa ziko bachita naye chigololo. Na ochita malonda bapa ziko bankhala olemera na mphamvu ya kulyera kwake." ⁴ Ndipo nechimvwa lizu liyakine kufuma kululu nakuti, "fumankoni kumalo kwake, mwabanthu bangu, koteto kuti musagabane naye machimo bake, koteto kuti musalondeleko miliro yake. ⁵ Machimo bake baunjikika msinkhu monga kululu, na Mulungu wakumbukira machitiro bake baipa. ⁶ Mumuwezyere monga eve awezyera bayakine. Muwezyere kabili pa zinchito zake; mu kapu mweyavizyira, muyavizye kabili pa muyeso wake. ⁷ Mwechizipasira ulemelero na kunkhala bwino ngako, mumupase kuzunzika na kumulirisha malilo. Pakuti akuti mumtima mwake, 'nankhala monga nkhosi-kazi; nine lini mfelekazi, nikaone lini kulira.' ⁸ Moteto mu siku limozi muliri yake ikawele imfwa, kulira na njala. Akapye na mulilo, pakuti Ambuye Mulungu ni wamphamvu, ndipo ndiye woweruza wake." ⁹ Mafumu amu ziko echita naye chigololo na kutayika akalire na kuchita maliro pa eve akayoona chusi cha kupya kwake. ¹⁰ Akapaname patali, na kuyopa kunzunzika kwake, nakuti, "soka, soka kwa mzinda ukulu, Babulo, mzinda wmphamvu! Pakuti mu ola limozi, chilango chako chafwika." ¹¹ Ba malonda bapa ziko balira nakuchita maliro pa eve pakuti paliye ogula soti malonda bao- ¹³ malonda ba golide, siliva, miyala ya mtengo wake wapatali, ngale, nyula zabwino, chibakuwa, bafita, mlangali na vimiti vonunkhira bwino, na viyava nsengo ya njobvu, viya vilivonse vopanga na vimiti va mtengo wapatali, mkuwa, nsimbi, nsangalakwi, ¹² Kinamomo, amomo, unga wosalala, tirigu, ng'ombe na mbelele, mahosi na ma garete na mibiri na miyoyo ya banthu. ¹⁴ Chipaso chimwenzofunishisha cha mphamvu yanu yonse chachosewa kwa mweo. Vonse velongosoka na vowamishisha valuta, sivikapezeka soti. ¹⁵ Bamalonda bala belemera kamba ka eve bakapaname patali kamba koyopa kunzunzika kwake, kulira na kuchita maliro mokuwa. ¹⁶ Akanene kuti, "soka, soka ku mzimu ukulu wenzovwala bafuta, chibakuwa na mlangali, woziwamishira na golide, na mwala wa mtengo wapatali na ngale. ¹⁷ Mu ola limozi, chuma chonse chila chankhala matongwe." Na oyendesha ngalawa, ba sigiro, na bonse bochita malonda kuchokera kunyanja beimilira patali. ¹⁸ Bekuwa peona chusi cha kupya kwake. Bechiti, "ni mzinda uni uli ngati mzinda ukulu?" ¹⁹ Beponya lukungu pa mitu yao, nolira, kulira na kuchita maliro, "soka, soka ku minda ukulu kwamene bonse benze na ngalawa, pa nyanja belemera kufumira mu chuma chake. Pakuti mu ola limozi, wasanduka matongwe." ²⁰ "Kondwera pa eve, kululu, mweo banthu atuba na otumiwa na aneneri, pakuti Mulungu waleta chiweruzo chanu pa eve!" ²¹ Mngelo wa mphamvu etola mwala monga mphelo ikulu, nakuuponya mnyanja nakuti, "munjira yamene iyi, Babulo mzinda ukulu ukaponyewe pansi mwa chipolowe, ndipo suukaoneka soti. ²² Zungo lepangiwa na olizya mazeze, na oimba, na oliza mutolilo, na olizya malipenga, sakamvweka soti mwa mweo. Amisiri balionse sakapezeka kwa mweo. Simukamvweka zungo la mphero mwa mweo. ²³ Kutuba kwa nyali sikukabala soti mwa mweo. Mau a mkwati na mkwatibwi sakamvweka soti muli mweo. Pakuti bamalonda banu benze ba kalonga bapa ziko, na maiko yenamizyiwa na masenga banu. ²⁴ Mwa eve magazi ba aneneri na banthu atuba ba Mulungu wepezeka na magazi ba bonse bepayiwa pa ziko."