¹ Paulo otumiwa wa Kristu Yesu mwa kufuna kwa Mulungu, kwa banthu atuba ba Mulungu mu Ifenso, bamene bali okhulupilika mwa Yesu Kristu. ² Cisomo kwa mweo na mtendele wofumila kwa Mulungu awisi basu na Abuye basu Yesu Kristu. ³ Lekani Mulungu na awisi ba Abuyewasu Yesu Kristu ayamikike, amene watidasa na madaliso yonse ya uzimu mu malo ya kululu mwa Kristu. ⁴ Mulungu etisabkha mwa eve kuyambila pa kuyamba kwa calo, kuti tinkhale atuba na aliye cilema pa menso pa mcikondi. ⁵ Mulungu etisankhilatu seo kuti tinkhale bana mwa Yesu Kristu, monga mwicemuwamizhyilamukufuna kwake. ⁶ Kutisankha kwake kwecitisha kuti uyamikike ulemelero wa cisomo cake wepasiwa kwa seo mwaufulu mwawamnene wa kukonda. ⁷ Mwa yesu Kristu tilinako kuombolewa mwa magazi yake na kukhululukiwa kwa viipa vasu, mwakulemela kwa cisomo cake. ⁸ Epakisha cisomo ici kwa seo na nzeru zonse na kumvwishisha. ⁹ Mulungu etizibisha cisinsi ca kufuna kwake monga mcemuwamizhyila ndipo ecionshela mwa Kristu, ¹⁰ na maganizo ya ndodomeko ya kukwanilishiwa kwa nthawi, kuleta vinthu vonse pamozi, vinthu vonse kululu na pacalo, pansi pa mutu umozi ndiye Yesu. ¹¹ Mwa Kristu tesankhiwa na eve eka, kusankhiwilatu mwa ndondomeko ya wamene ocita vonse mwacilingo ca kufuna kwake. ¹² Mulungu etusankha kuti tinkhale otola cuma cake, kuti seo teyambilila kuyembekezela pa Kristu, tikabe oyamikila ulemelero wake. ¹³ Mwa Kristu, na mweo namwe, pamwecimvwa mau acoona, uthenga wa cipulumuso canu, mwekhulupilila mwa eve ndipo mweikiwa cisidikizhyo ca mzimu utuba welonjezewa, ¹⁴ wamene ali cosimikizhya ca vati tikalondele mpaka kuombolewa kwa vatilinavo, kukuyamikila ulemelero wake. ¹⁵ Kamba ka ici, penemvwila cikhulupilo canu mwa Ambuye Yesu na cikondi pa banthu atuba ba Mulungu ¹⁶ Niliye leke kuyamika Mulungu pa mweo nakukutomolani mu mapemphero. ¹⁷ Nupemphera kwa Mulungu Abuye wasu Yesu Kristu, Atata wa ulemelero, akupaseni mzimu wa nzeru na kuvumbulusa mcizisho cake. ¹⁸ Nupemphera kuti menso mtima wanu ikalange, kuti mukazibe ciyembekezo cemuitilani nakulemela kwa colandila ca ulemelero pakati pa banthu atuba a Mulungu. ¹⁹ Mumapemphero bangu nupempha kuti mukazibe kukula kwa mphamvu yake yamene singalinganizhyiwe na ciliconse kwa seo tukhulupilila, monga mwakugwira nchito mwa mphamvu yake. ²⁰ Iyi ni mphamvu imozi-mozi yegwila Mulungu mwa Kristu pemuukisha kwa akufwa na kumunkhazika pa kwanja kwendi mumalo ya kululu. ²¹ Enkhazika Kristu palulu ngako pa ukulu wonse na ulamuliro na mphamvu na zina lililonse lechuliwa Kristu akalamulile osati mbadwe uno weka koma na mbadwe ukuza. ²² Mulungu eika vinthu vonse pansi pa mendo ya Kristu nakumupasa ku mpingo kuba mutu pa vinthu vonse. ²³ Mpingo ni mubili wake, kuzula kwake ozuzhya vonse mu vonse.