¹ Okondewa, pakuti pakuti tili nao malonjenzano aba, tiye nitizisuke seka coifya conse ca mubili na mzimu. Tiyeni tikwanilishe kutuba mu kuyopa Mulungu. ² Tipaseni malo m'mitima mwanu! tiliye cimwile aliyense. Tiliye citile viipa aliyense kapena kucenjelela munthu aliyense. ³ Sunulabila izi kuti nisusheni. Pakuti nelabila kale kuti muli mumtima yasu, kuti tifwe pamozi na kunkhala na moyo pamozi. ⁴ Nulimbika mtima ngako mwa mweo, kuzitamanda kwangu nikukulu ngako kwa mweo. N'ne ozula na cilimbikiso. Nusefukila naco cimwemwe olo mavuto basu onse. ⁵ Patewela ku Makedoniya, mibili yasu iliye pumule. Koma tevutika mnjila iliyonse mwakusushana kunja na mantha ya mkati. ⁶ Koma Mulungu, olimbikisha okhumudwa, etilimbikisha seo nakufwika kwa Tito. ⁷ Nikuwela lini tyala kweka kwa Tito kwe tilimbikisha nako Mulungu. Nicilimbikiso soti celandila Tito kufuma kwa mweo. Etiujya za cikondi canu, cisoni canu na cangu canu pa neo. ⁸ Olo kuti kalata yangu yekukhumudwishani, nubaba lini mtima. Koma nebaba mtima nebaba mtima paneona kuti kala yangu yekukhumudwishani, olo yenze tyala nthawi itontho. ⁹ Lomba nu sangalala, osati kuti ndaba mwecinvwa cisoni, koma kamba ka kukhumudwa kwanu kwekuletani kukulapa. Mwecinvwa cisoni ca kwa Mulungu. Paliye cimwetaya pa seo. ¹⁰ Pakuti cisoni ca mwa Mulungu culeta kulapa ndiye cukwanilisha cipulumusho kosababiwa mtima. Cisoni ca ziko koma culeta infwa ¹¹ Onani khama ikuleni ya cisoni ca mwa Mulungu ifuma muli mweo. Khama yanu yenze ikulu yosimikijyila kuti mwenze osalakwa. Ukali wanu wenze tyani kukula, wowa wanu, kufunishisha kwanu, kuona kuti chilungamo cucitika! mkalikonse kamwesimikijya mweka kunkhala osalakwa. ¹² Olo kuti nekulembelani neo, niliye lembe kamba ka ocita viipa, olo kamba ka ula ecitiwa viipa, koma kuti kufuna kwanu kwa bwino pa sewo kunkhale kozibika kwa mweo pamenso pa Mulungu. ¹³ Nipaici kuti tulimbikishiwa moonjela ku citonthozo casu, tesangalala soti ngati cifukwa ca cimwemwe ca Tito, cifukwa mzimu wake wesisimushiwa na mweo monse. ¹⁴ Pakuti ngati netamandila kwa eve za mweo, niliye mvwishiwe nsoni. Pakusiyanisha, monga mutelabilila zonse kwa mweo zenze za cendi. ¹⁵ Cikondi cake pa mweo nicikulu ngako pa kukumbukila kumvwilila kwanu monse mumwe mulandililaeve na wowa na kututumila. ¹⁶ N'ne osangalala kamba ka cisimikijyo mwa mweo.