¹ Tufuna mweo muzibe, anekwasu, pa cisomo ca mulungu cimene cepasiwa ku chalichi ya Makedoniya. ² Mukuyesewa pa mavuto akulene, enzeokondwela ngako na kothela kwa umphawi wao cebala cuma cinyinji copelekewa mokondwela. ³ Nucitila umboni kuti etipasa zinyinji pakuti, kupilijyapo zenzokwanisha, nakufuna kwao komasuka ⁴ betisenga seo kufumila pansi pa mtima wao kuti tigabane muutumiki uyu kubanthu atuba a Mulungu. ⁵ Ici ciliye citike mwetenzeyembekela, koma beyambila, kuzipeleka beka kwa Ambuye, na kwa seo mwakufuna kwa Mulungu. ⁶ Teto tulimbikisha Tito, eiyamba kale nchito iyi, kuti asilijye mcitidwe uyu wa cisomo mwa mweo. ⁷ Koma monga mumangiwa mu vonse- muku kukhulupilila, mu kulabila, mukuziba, mukhama yonse, na mucikondicanu kwa seo. Teto onesheshani kuti mupitilijya mucitidwe uyu wa cisomo. ⁸ Nulabila ici osati monga kukulamulilani, m'malo mwake, nulabila izi nacolinga coyesa kuti nione cikondi canu ngati nica cendipolinganijya kufunishisha kwa banthu bayakine. Poti ⁹ muziba cisomo ca Ambuye Yesu Kristu enze olemela kamba ka mweo enkhala osauka, teto mukusauka kwake mukalemele. ¹⁰ Munkhani iyi nikupeni malangizo yokuyavyani. Caka cimozi capita, muliye yambe tyala kucita vinthu, koma mwe khumbwila kucita. ¹¹ Lomba silijyani. Monga mwenze funishisha na kufuna kucita, mweo soti musilijyishe mumungakwashile. ¹² Pakuti nimwe ozipeleka kucita nchito iyi, ni cinthu ciwemme ndipo nicolandiliwa. Munthu apeleke kulinga na valinavo, osati valiye. ¹³ Poti iyi nchito siyakuti bayakine apepukishiwe na kuti mweo mubebeshewe. M'malo mwake kunkhale kulinganijya. ¹⁴ Muviyinji vamulinavo lomba vikakwanile pa vaofuna. Ici cili teto kuti pa vinyinji vao vikwanishe vala va aliye, nakuti pankhale kulinganijya. ¹⁵ Cili mwaecilembela: '' enze na vinyinji paliye visalako, ndipo enze na tutontho aliyesobekele. ¹⁶ Tuyamika Mulungu, eyika mtima mwa Tito cikhulupiliko cosamalila monga canili naco neo kwa mweo. ¹⁷ Poti aliye vumele tyala mandaulo basu, koma ekhulupika pa ici. Ewela kwa mweo mukufuna kwake. ¹⁸ Tamtuma na mnekwao oyamikika m'machalichi pa nchito yake yofalisa uthenga. ¹⁹ Niici lini ceka, esankhiwa na ma chalichi kuya nase pamozi na nchito iyi ya cisomo. Ici ni ca ulemu wa ambuye beve na kufunishisha kwasu kuti tithandize. ²⁰ Tupewa kunkhala kothekela kuti muyakine akodandaula paliseo yokhuzana na vopeleka ivi vatucita. ²¹ Tusamalila kucita mokhupilika, osati pamenso pa Ambuye peka, koma na pamenso pa banthu. ²² Tutumujya mnekwasu muyakine pamozi nao, tamuyaesa munjila zinyinji ndipo tapeza kuti ni wakhama pa nchito zinyinji. Niofunishisha lomba cifukwa ca kukhulupilila kukuleni kwalinako pa mweo. ²³ Nanga za Tito, nimuyangu ndipo niothandizana namwe za nchito. Nanga kwa anekwasu, betumiwa na ba chalichi. Nibaulemu kwa Kristu. ²⁴ Teto baonesheni cikondi canu, ndipo oneshani ku ma chalichi cifukwa ca kuzitamandila kwasu pali mweo.