¹ Nulimbikisa acikulile pakati panu, neo, mukulu muyao na boni ya zonzuzika za Kristu, ndipo nine umozi wati akatoleko mbali ku ulemelelo wati ukaonekele: ² Nkhalani azibusa ba nkhosa za Mulungu zili pansi pacisamalilo canu, kutumikila monga oyanganila- osati cifukwa muyenela, koma cifukwa cakuti mufuna, monga mofunila Mulungu kuti mutumikile- osati kamba ka phindu yocitisha soni koma mozipeleka. ³ Osacita monga bwana pa banthu ali pacisamalilo canu. Koma, nkhalani cisanzo ku nkhosa. ⁴ Lomba akayoonekela Mbusa mukulu, mukalandile kolona yosajujuka ya ulemelelo. ⁵ Munjila imozi, mweo acinyamata, vwilani akuleni. Monse mweo, zivwalikeni na kuzicepesa na kutumikilana. Pakuti Mulungu okana ozitukumula, koma opasa cisomo kwa ozicepesa. ⁶ Moteti zicepeseni pansi pa kwanja la mphavu la Mulungu kuti akakunyamuleni panthawi yake. ⁷ Tayani nkhawa zanu zonse kuli eve ndaba okusamalilani. ⁸ Nkhalani celu, nkhalani olonda. Mudani wanu mudyelekezi oyenda-yenda nga ni nkhalamu yuuluma, kusakila wati awononge. ⁹ Imililani pakumukana eve. Nkhalani olimba mu cikhulupililo canu. Muziba kuti gulu ya banthu wokhulupililika ali mu dziko opilila manzunzo amozi-mozi. ¹⁰ Mukanzunzika paka nthawi katontho, Mulungu wa cisomo conse, ekuitani ku ulemelelo wake wa muyaya mwa Kristu, akuwamyeni, akunkhazikisheni, na kukukoseshani mweo. ¹¹ Kwake kube ulamulilo wosasila. Amen. ¹² Nutola Silivano kunkhala mkwasu wokhulupililika, ndipo nakulembelani mweo kwacidule kupitila mwa eve. Nukulimbikisani na kucitila uboni kwa mweo kuti vanakulembelani ni cisomo ca Mulungu ca zoona. Muimilile pa camene ici. ¹³ Mwanakazi ali mu Babiloni, osankhiwa pamozi na mweo, opeleka moni. Naye Marko, mwana wangu, opeleka moni. ¹⁴ Mupasane moni na kisi ya cikondi. Lekani mutendele ube namwe mweo muli mwa Kristu.