¹ Penewela kwanu, anekwasu, niliyewele namalabilidwe ocenjelesha olo na nzelu penenzo lalilkila coonadi cobisika ca Mulungu. ² Pakuti penenze pakati panu paliye ciyakine cenesankha koma Yesu Kristu, ndipo yeve opacikiwa. ³ Ndipo nenze namwe mkufoka, na mumantha, nakunjenjemela ngako. ⁴ Na uthenga wangu na ulaliki wangu wenzelini na mau onyengelela anzelu koma enze nacioneshelo ca Mzimu na mphamvu, ⁵ kuti cikhulupilo canu cisankhale mu nzelu za banthu, koma mu mpamvu ya Mulungu. ⁶ Lomba tufotokoza nzelu pakati pa okula, koma osati nzelu za ziko lino, olo olamulila ambadwo uno, batibakafume. ⁷ Mumalo mwake, tufotokoza nzelu ya Mulungu mu coonadi cobisika, nzelu yobisika yila yeikilatu Mulungu ikaliyefika nthawi ya ulemelelo wasu. ⁸ Pakati pa olamulila ba nthawi ino paliye ezindikila ndaba kuti bezindikila sembe baliye pacike Mbuye wa ulemelelo. ⁹ Koma monga mwecelembekela, "Paliye waona, paliye wamvwa, paliye mtima wa munthu weganizila pa ca wakonzekela Mulungu banthu omukonda"- ¹⁰ Koma Mulungu wavumbulusha ivi vinthu kwa seo kupitila mu Mzimu. Pakuti Mzimu usanthula vonse, olo vozama va Mulungu. ¹¹ Pakuti nibani oziba zoganiza za munthu kuposa mzimu wa munthu mwa yeve? Cimozi-mozi paliye munthu oziba vozama va Mulungu kuposa Mzimu wa Mulungu. ¹² Koma tiliyelandile mzimu wa ziko koma Mzimu wofumila kwa Mulungu, kuti tizibe vinthu vopasiwa kwa seo kufumila kwa Mulungu mwaulele. ¹³ Tufotokoza za ivi vinthu mu mau osaphunzisiwa na nzelu za munthu koma mwa Mzimu, kumasulila vinthu vauzimu ku banthu bauzimu. ¹⁴ Munthu asali wauzimu olandilalini vinthu va Mzimu wa Mulungu, pakuti ni vinthu vopusa kwa yeve. Sangamvwishishe ndaba vuonekela tyala mumzimu. ¹⁵ Ula wauzimu oweluza vinthu vonse, koma oweluziwa lini nayake. ¹⁶ "Ndaba nibani angazibe maganizo ya Mulungu?" Koma tilinawo maganizo ya Kristu.