¹ Paulo, woitiwa na Kristu Yesu, kuti ankhale otumiwa mkufuna kwa Mulungu, na Sosteni mnekwasu, ² ku mpingo wa Mulungu ku Kolinto, bala epatuliwa mwa Kristu Yesu noitiwa kuti abe banthu atuba, pamozi na bala oitiwa mumalo onse oita pa zina la Ambuy wasu Yesu Kristu ali Mbuye wao nawasu nase. ³ Cisomo na mtendele vinkhale namwe kufuma kwa Mulungu Atata na Ambuye Yesu Kristu. ⁴ Nthawi zonse nupeleka mathokozo kwa Mulungu wangu kamba ka mweo cifukwa ca cisomo ca Mulungu cekupasani Yesu Kristu. ⁵ Wakulemeleshani munjila iliyonse, mukalabilidwe na mkuziba vinthu, ⁶ monga mwa umboni onena za Kristu wasimikijyika kuti ni wacendi pakati panu. ⁷ Mwa ici musobekalini mphaso ya Mzimu pumulindila na mtima onse vumbuluso la Ambuye Yesu Kristu. ⁸ Soti akupangeni kuti mukhulupilile monkhazikika mpaka kumasilijyilo, kuti mukapezeke muliye mulandu pa siku la Ambuye Yesu Kristu. ⁹ Mulungu niokhulupilika, ekuitani mu ciyanjano ca mwana wake,Yesu Kristu Ambuye. ¹⁰ Lomba nukulimbikishani anekwasu, kupitila mu zina la Ambuye Yesu Kristu, kuti monse muvomelejyane, nakuti pasankhale mipatuko pakati panu. Nulimbikisha kuti mulumikijyane pamozi, namaganizo amozi na cilingo cimozi. ¹¹ Pakuti enizibisha, anekwasu, banthu a kwa Koloe kuti pali mikangano pakati panu. ¹² Nutanthauza ici, aliyense wa mweo olabila kuti, "Nili ku mbali ya Apolose," kapena kuti "Nili kumbali ya Kefa," kapena "Nili kumbali ya Kristu." ¹³ Ko Kristu niogabanika? Nanga Paulo epaikiwapo kamba ka mweo? Niyekuti mwebatizika mu zina la Paulo? ¹⁴ Nuyamika Mulungu kuti paliye wenebatizapo pamweo, kucosako Crispo na Gayo. ¹⁵ Cenkhala teti kuti pasapezeke aliyense olabila kuti ebatizika mu zina langu. ¹⁶ (Nebatiza soti amubanja ya Stefanasi. kupitilila apo nuzibalini kuti nebatizako munthu muyakine.) ¹⁷ Pakuti Kristu aliyenitume kuzobatiza koma kulalikila uthenga wabwino-osati na mau oshashalika, kuti mtanda wa Yesu usacosewe mphamvu yake. ¹⁸ Pakuti uthenga wa mtanda ni cinthu copusa kwa bala balimukucenekeka. koma kwa bala balimukupulumuka, ni mphamvu ya Mulungu. ¹⁹ Ndaba nicolembeka "Nuceneka nzelu za anzelu. nusokoneza nakucenjela kwa ocenjela." ²⁰ Alikuni wa nzelu? alikuni ophunzila? alikuni osusha wa ziko lino? Ko Mulungu aliyesandushe nzelu za ziko kunkhala zopusa? ²¹ Pakuti ziko mu nzelu zake liliye muzibe Mulungu, Mulungu eciona bwino kupulumusha bala ekhulupilila kupitila mucopusa cakulalikila. ²² Pakuti Ayuda ofuna-funa vizindikilo vodabwisha ndipo Agiliki ofuna nzelu. ²³ Koma tulalikila Kristu opacikiwa, mwala okhumudwisha kwa Ayuda na cinthu copusa kwa Agiliki. ²⁴ Koma kwa bala beita Mulungu, onse Ayuda na Agiliki, tulalikila Yesu ngati mphamvu na nzelu ya Mulungu. ²⁵ Ndaba copusa ca Mulungu ni canzelu ngako kupambana banthu, nakufoka kwa Mulungu kunamphamvu kuposa banthu. ²⁶ Langani pa kuitiwa kwanu, anekwasu. Nanyinji lini amweo enze na nzelu kulingana na umunthu. Nanyinji lini amweo enze amphamvu. Nanyinji lini amweo enze ebadwa aufulu. ²⁷ Koma Mulungu esankha vinthu vopusa va ziko kumvisha soni va nzelu. Mulungu esankha vofoka va ziko kumvwisha soni vokosa. ²⁸ Mulungu esankha vapansi na vosuliwa mu ziko. esankha soti vinthu vusayesewa kanthu, kuti vila vuyesewa kanthu visankhale kanthu soti. ²⁹ Ecita ici kuti pasapezeke munthu angabe na cifukwa cozitukumulila pa meso pake. ³⁰ Cifukwa ca ici cecita Mulungu, lomba Muli mwa Kristu Yesu, etinkhalila nzelu yofumila kwa Mulungu. Etinkhalila cilungamo, ciyelo, na coombola. ³¹ Niye monga mwekwelembekela, "Lekani wala ozitukumula, azitukumule mwa Ambuye."