¹ Ko ku pangahara ye, edxhandiya lya bantu kali zimburukite Jeso mi no kuteeza kwi zywi lya Nyambe, mani kazyimene he lyizo lye ziba lya Genesareta. ² Na bona amato obire kaena he ziba. Aba yambi niba bomboka mi sika basanza otunyandi twabo. ³ Jeso aku kwera mo bumwinya o bwato, obo kabuli bwa Simone, mi aku mukumbira kuzwisa o bwato mumenji abufwike hafuhi ne lyizo. Mi aku kara hanshi no kuzyiya bantu bazwa mubwato. ⁴ Aho amana kuaamba, akuta simone, "Tware obwato kumenji mazungi mi o reke o tunyandi twenu tukwate. ⁵ "Simone akutaba ye, "Nfumu, twa bereki masiku onshe, mi kwazya echo twa kwati, kono kezywi lyako, mbo nditeye tunyandi. ⁶ "Aho bapanga ezo, niba kwata enswi zingi chaha, mi tunyandi twabo katu ñatuka. ⁷ Mi bo ku raba baye nzabo mubwato bumwi kuta ye bake ba batuse. Bokezya mi bokuzyuza mato onshe, mi okutanga ku mina. ⁸ Kono Simoni Pitorosi, aho ayi bona, akuwa ka mazwi habuso bwa Jeso, ko kuta ye, "zwe kwangu, ndili mukwame a panga zibbi, Nfumu." ⁹ Mi nakomokwa, nabena kakere nabo, ku kukwata enswi ezo nibahinda. ¹⁰ Eyi kaihindila bulyaho Jakobo ne Johani, bana ba Zebediya, abo kabali bayenze ba Simoni. Mi Jeso akuta Simoni, "Washatiyi, kakuli kuzwa hanu mbo be muyambi wa bantu." ¹¹ Aho bareta amato abo he lyizo, bo kusiya zintu zonsho no kuhumpa Jeso. ¹² Nikwa ba bulyaho aho kena mu munzi umwinya, o mukwame ozyo kena e mbingwa neye mpaho kena. Aho abona Jeso, aku kutongama e chifateho hanshi mi akumu kumbira chaha, ye, "Nfumu, heba oshaka, o wora kundi tenda ozyo achenete. ¹³ Cware Jeso aku orora e anja no kumu kwata, kuta ye, "Ndi shaka. O chene." Mi haho bulyo e mbingwa yoku mana kwakwe. ¹⁴ A ku muraera kuta ye asha sumwini o muntu, kono aku musumwina bulyo eye, "Yende munjira yako, oli bonahaze ku mu purisita mi pange chitabero cho kuku chenesa, kokuya komo na raera mushe, ibe bupaki kwabo." ¹⁵ Kono e mbuzi yakwe yoka hura konshe, mi e dxhandiya lya bantu lyo ku shangana hantu honke kushuwa aho a zyiya no kuhozwa kuzi rwaro zabo. ¹⁶ Kono akuzwaho nakaya mucibaka citontwere no karapera. ¹⁷ Mi kokezya ezyuba limwi aho ka zyiya, mi kakwina ba farisi na ba zyiisi bo murawo kaba kere ho kaba kazwa kuminzi emingi e chinchana muchishi cha Galileya ne Judeya, mi no kuzwa ku munzi wa Jerusalema. E ngamu zo Nfumu kazina neye kukuhoza. ¹⁸ Mi bakwame bamwinya bokezya, nibahindire o mukwame ozyo kazyuminine haka shasha, mi bo kushaka enjira yo kumureta mukati kuti ye baka muralike habuso bwa Jeso. ¹⁹ Kali kaba wora kuwana enjira yo kumureta mukati kakuli e dxhandiya bungi, bo kuyenda hewuru lye njuwo kumu kavizila hachi shuka narere he shasha lyakwe, mukati kabantu, ha buso bwa Jeso. ²⁰ Kubona e ntumero yabo, Jeso akuta ye, "Mukwame, ezibbi zako za kwatirwa." ²¹ Bañoli na ba Farisi bokutanga okubuza, kuta ye, "ndini ozyu awamba kokunyansa? Ndini a wora kukwatira ezibbi mbita Nyambe yenke?" ²² Kono Jeso, kazyi ezo kaba azyara, akutaba no ba kuta ye, "Chinji aho mubuzikiza mu myozyo yenu? ²³ Nchechi chitore kuwamba, ezibbi zako za kwatirwa ewe kapa kuta ye 'Zyimane yende?' ²⁴ Ko kumi zyibisa ye Mwana wo Muntu akwesi e ngamu hanshi kuku kwatira ezibbi, Ndi kuta ye, 'Buke, otore shasha lyako mi oyende kunjuo yako.''' ²⁵ Haho bulyo aku buka habuso bwabo nokutora e shasha lyakwe karere halyo. Cware akubora kunjuwo yakwe, naka butemba Nyambe. ²⁶ Bonshe niba komokwa mi bo kutemba Nyambe. Niba kabilirwa e ntiya, kuta ye, "Twaboni zintu zi hitiliza shunu." ²⁷ Ezo zintu aho zimana ku tendahara, Jeso akuzwa ho a kubona omutelisi we zina lya Levi nakere he njuwo yo mutero. A kumuta ye, "Ndi humpe." ²⁸ Levi aku nanuka noku mu humpa, kusiya ezo katenda mumashara. ²⁹ Mi Levi aku tendera Jeso omukiti omunene munjuwo yakwe. Kakwina batelisi a bangi na bamwinya bantu abo kaba rere nibalya he ntafure nabo. ³⁰ Abafalisi na bañoli kaba tongauka kuba zyiisi bakwe, kuta ye, "Chinji aho mulya no kunywa naba telisi na batendi be zibbi?" ³¹ Jeso aku bata ye, "Abantu abo bena nenja kaba shaki oñanga, mbita abo ba rwara mbabo bashaka yenke. ³² Kali ndakezya ku kuwa abo bachenete kutaye babake, kono kukuwa abo batenda ezibbi ye babake." ³³ Ba kumuta ye, "Bazyiisi ba Johani bali nyimanga ezilyo no ku rapera, mi na ba zyiisi ba Mafarisi batendanga bulyaho. Kono bazyisi bako balya no kunywa." ³⁴ Jeso nabata ye, "Kanti ku woreseka kuti ye abantu bana kuiwa kumukiti wa masheshwa buti ye bafwe enjara neba kere no musheshi? ³⁵ Kono ama zyuba ara kezya aho o musheshi shaka naba tapiwe, mi ayo mazyuba bara fwa enjara." ³⁶ Cware Jeso akuamba enguli kwabo, "Kwazya ozyo añatura aka yemba ke chizyabaro echiya no ku kaberekisa kubika echikamba echi zyabaro chakare. Ashi tenda bulyaho, nara ñatura echi zyabaro chiya, mi echi yemba che chisira chizwa he chizyabaro chiya kachi yendereli nechi zyabaro chakare. ³⁷ Mi kwazya ozyo abika e waine muchi biko chechikabi chikurukuru che waine. A shipanga bulyaho, e waine enja yi wora kupopora echi biko che chikabi, no kutika, mi echibiko che chikabi che waine choku sinyiwa. ³⁸ Kono e waine e nja ibotere kubikiwa muchi biko che chikabi chisili chiteke. ³⁹ Mi kumana kunywa e waine yakare kwazya ozyo ashaka enja, ata ye, 'Yakare njindotu kuhita.'"