¹ Masiku-siku ke zyuba lya matatikiro mu nviki, bo kezya ku bita, kureta e minunkiso eyo niba rukisa. ² Niba wana e buwe lya pindumunwa kuzwiswa kuchizyi che bita. ³ Boku kabira mukati, kono kali niba wana echi tupu cho Nfumu Jeso. ⁴ Ni kwa tendahara ye, ni basi lyanganiswe kezo, haho, aba kwame bo bire kaba zyabere zizyabaro zikebera, bokezya kuzyimana hembali nabo. ⁵ Aba kentu boku tiya hawa mi bo kusungamina hanshi, bo kuamba kuba kentu ye "Chinji aho mushaka abo bahara mukati ka bafu? ⁶ Akwazya kunu, kono nabusiwa! Mu azyare omo naambira kwenu aho kasikere mwa Galileya, ⁷ kuta ye Omwana o Muntu aswanera kuhewa mu ma anja abantu ba tenda e zibbi mi noku kokoterwa, mi he zyuba lyo butatu, nara buka kame." ⁸ O mukentu aku hupura mazywi akwe, ⁹ mi akuzwa ku bita no kasukurura zonshe zintu kube kumi ni yenke mi noku bantu bonshe. ¹⁰ Aho Maliya Magadalena, Johana, Maliya nyina wa Jakobo, naba kentu bamwi bo kabena nabo, bo ka amba ezo zintu kuma apositola. ¹¹ Kono eyi mbuzi niya bonahara kuma apositola mbwe njo busiru, mi kali niba zumina ezi nibata bakentu. ¹² Pitorosi aku nanuka, noku butukira ku bita, akukotama noku tonda mo, aku bona mo bulyo amasira. Cware Pitorosi akuzwa mo nakaya ku njuwo yakwe, na komokiswa kecho nicha tendahara. ¹³ Mubone, lilyo ezyuba liswana a bazyizwa bobire kabaya kumunzi ukuiwa Emausi, owo kawina ebima zilingana kumi ni konke kuzwa kwa Jerusalema. ¹⁴ Niba ambaura mukati kabo ke zintu zonshe ezo niza tendahara. ¹⁵ Ni kwa tendahara ye, aho kaba ambaura no kuli buza, Jeso eye mwini aku kezya no kuyenda nabo. ¹⁶ Kono amensho abo ni azikiwa ku kumuzyiba. ¹⁷ Jeso akuba ta ye, "Zinji muya buamba kazo ne muya buyenda?" Boku zyimana haho neba bonahara kushaba nentabo. ¹⁸ Zyumwi kwabo, akuiwa Kiliyopasi aku mutaba, "Ndiwe muntu wenke munu mwa Jerusalema zyo kazyii ezintu niza tendahara mwa anu ma zyuba?" ¹⁹ Jeso akuba taye, "Zintu munji?" Bo kumu taba ye, "Ezintu kuamana ne Jeso mu Nazareta, ozyo kali muporofita, munene chaha kuzitendantu ne zywi habuso bwa Nyambe na bantu bonshe. ²⁰ No buti ma purista bakuru naba yendesi niba muha kuta ye bamu yaturere efu no kumu kokotera. ²¹ Kono ni twa azyara kuta ye ndeye ozyo shake na rukurure Isirayele. Eni, kuzwa kwezi zonshe, lyinu nde zyuba lyo butatu zintu zonshe niza tendahara. ²² Kono kame, bamwi bakentu muchi ghughi chetu bana tukomoki, bokwina ku bita masiku-siku. ²³ Aho kabana kawani echi tupu, bana kezyi, kuta ye bana boni mpono yama ngiloyi ayo ana ba sukurwili ye ahara. ²⁴ Aba kwame abo kakere neswe bana yendi kwi bita, bana kali wani bulyaho banati bakentu. Kono kabana muboni." ²⁵ Jeso naba ta ye, "Enwe bakwame basiru ne myozo iñoñobela kuku zumina mu zintu ezo bana ambi ma porofita! ²⁶ Kanti kali kaku botere ye kiresite ashandiswe kezi zintu, noku kabira mwi ntubo yakwe?" ²⁷ Kutatikira kwa Mushe noku baporofita bonshe, Jeso naba torokera zintu zonshe zimuama mu ntimana zonshe. ²⁸ Aho shikaba shunine o munzi owo kabaya kwawo, Jeso akutenda mbwe ashi zwira habuso. ²⁹ Kono bo kumukumbira, nabata ye, "Kare neswe, kakuli she masiku akamwi sheka kabumana." Mi Jeso aku yenda no kakara nabo. ³⁰ Kwa kuba ye, aho akara nabo hanshi no kulya, aku hinda e nkoko, no ku ifuyaura, mi no kui chora no kui baha. ³¹ Cware amensho abo oku arurwa, bo kumu zyiba, mi aku rendera kuzwa mu mensho abo. ³² Ba kuli buza-buza ye, "E myozyo yetu kali ya kuya mukati, akuamba kwetu munjira, naho atu arwira mañoro?" ³³ Bo kubuka mweyo enako, no ku bora kwa Jerusalema. Bo kuwana be kumi ni konke ba shangene hantu honke, na bena kaba kere nabo, ³⁴ kuta ye, "O Nfumu nabuki zeniti, mi nali bonahazi kwa simone." ³⁵ Bo kumu sukurwira ezintu za panga hali munjira, komo Jeso na sundirwa kwabo muku chamauna e nkoko. ³⁶ Aho kaba shiamba ezo zintu, Jeso akezya ku zyimana mukati kabo no ku bata ye, "Mpore ibe kwanu." ³⁷ Kono kaba tiyite chaha no kuba ne ntiya, mi bo kuazyara kuta ye bana boni echirumba. ³⁸ Jeso akuba ta ye, "Chinji aho mu tiyite? ³⁹ Mubone mayanja na matende angu, ndime, Mundi kwate no kubona. Kakuli o moya wazya enyama ne zi fuha, sinaho mubwene ndi kwesi." ⁴⁰ Aho atenda bulyaho, aku basunda maanja nama tende akwe. ⁴¹ Aho kaba shitangarere, no ku komokwa, Jeso aku bata ye, "Mukwesi cho kulya?" ⁴² Bo kumuha echiyemba che nswi ihikitwe. ⁴³ Jeso akuyi hinda, no kuyilira habuso bwabo. ⁴⁴ A ku bata ye, "Aho kandina nenwe, Ninda mi sukurura zonshe ezo ziñoretwe mu murawo wa mushe ne ma porofita no mu Njimbo mi zi tarerezwe. ⁴⁵ Mi aku baha engana, kuta ye bashuwisise amazywi. ⁴⁶ A kuba sukurwira ye, "Ku ñoretwe, ye Kiresite arukere kushanda, no kubuka kame kubafu ezyuba lyo butatu. ⁴⁷ O kubaka no kukwatirwa kwe zibbi kuswanera kukutaziwa mwi zina lyakwe kuchishi chonshe, kata tikira Jerusalema. ⁴⁸ Muli mpaki bezi zintu. ⁴⁹ Bone, Ndi mi tumika echo nami sepisa Tata. Kono mukare mu munzi mbita shaka nemu zyabikwe engamu kuzwira kozyo ahanzi. ⁵⁰ Cware Jeso akuba hitira kubazwisa mo mbita aho baka hura hafwihi ne Betani. Aku nanuna amayanja akwe, no kuba fuyaura. ⁵¹ Nikwa tendahara ye, aho ka kwesi aba fuyaura, a kuba reka na kaya kuwiru. ⁵² Mi boku mutemba, no kubora kwa Jerusalema ne ntabo enene. ⁵³ Niba zwira habuso kuba mu tempere, kutemba Nyambe.