¹ Pitorosi ne Johani aha kaba kambamina mwi tempele ke nako yentapero, mi kaili ke nako yobutatu yakamwi. ² Omukwamwe zyumwi, ozyo kalichihore kuzwa aho aretwa, mi ka nanunwanga ezyuba nezyuba no kezya kumuralika hachizyi che tempele ikuyiwa Burotu, kuka kumbira masheleñi kubantu abo bakabira mutempele. ³ Aho abona pitorosi ne johani kabaya mwi tempele, akuba kumbira amasheleñi. ⁴ Petorosi, aku mutonderera, ne Johani bulyaho, akutiye,'' Ko tutonde''. ⁵ Omukwame kali kayenda aku ba tonderera, na lindira kutaye mbwa wane chinmwi kwabo. ⁶ Kono Pitorosi akutaye ''ndazya e Silibela ne gauda, kono echo ndikwesi, mbondi chikuhwe, mwi zina lya Jeso Kiresite wa Nazareta, oyende''. ⁷ Pitorosi aku mukwata kwiyanja lya malyo, no kumu zyimika muwiru: haho bulyo matende ne ngorezo zakwe zo kuwana enxgamu. ⁸ Akushotoka muwiru, Mukwame kali kayenda akuzyimana nokutanga kuyenda; akukabira mwi tempele ne Pitorosi ne Johani, nakabuyenda, kokushotoka, nokurumbeka Nyambe. ⁹ Bantu bonshe niba mubona aho ayenda mi na rumba Nyambe. ¹⁰ Mi bokuremuha kutaye ndeye zwyina mukwame akaranga he Chizyi Chirotu chetempele nakumbira masheleñi; Mi niba komokiswa echo nicha tendahara kwakwe. ¹¹ Mihaho kakwatire ha Pitorosi ne Johani, abantu bonshe boku butukira kwabo mumalibera akuiwa Solomoni, ko ku komokwa hawa. ¹² Pitorosi aho abona ezi, akutaba bantu, ''Enwe bakwame ba Isiraele, chinji aho mu komoketwe? Chinji aho mubika mensho enu hetu, mbwe nzi nxgamu zetu zamutendi ye ayende kapa chirumeli chetu. ¹³ Mulimu wa Abrahama, niwa Isaka, niwa Jakobo, ne Mulimu u beshwetu, narumbeka Jesu mwika wakwe. Ndeye nimwa baha noku kana habuso bwa Pilato, naho nataye amurukurure. ¹⁴ Nimwakana ozyo Achenete no Kuruka, mi mo kukumbira echiyazi ye chirukururwe. ¹⁵ Mi nimwa yaya Nabi ozyo aha obuharo, ozyo nabusiwa kwa Nyambe kubafu-mi tuli mpaki kwezi. ¹⁶ Hanu kentumero mwizina lyakwe-ozyu mukwame mubwene no kuzyiba-eli zina liswana nilya mugoresa. Entumero eyo ka Jesu niya muha amakete azywire habuso bwenu mwenshe. ¹⁷ Hanu, bakwangu, Ndizyi kutaye nimwa tenda ko kushazyiba, mbwe mbayendesi benu. ¹⁸ Kono ezintu ezo natarusa Nyambe komuromo wa baporofita bonshe, ye Kiresite wakwe arukere kushanda, hanu shana bumbilizi. ¹⁹ Kabulyaho, mubake, mi muzoke, kokutiye zibbi zenu zikwatirwe, kutaye kukezye enako yo ku kwanguruka eyo izwa habuso bo Nfumu. ²⁰ Mi kutaye natume Kiresite ozyo naketerwa enwe, Jesu. ²¹ Ndeye abotere okutamburwa kwiwiru mbita e nako yoku bozekezwa ezintu zonshe, kezo nawamba Nyambe katanzi ke miromo yaba porofita bakwe bachene. ²² Mushe keniti akutiye, 'Nfumu Nyambe nara busa o muporofita mukati kenu ozyo afwana mbwe ndime. Nimwara teeza kwezo nawambe kwenu zonshe. ²³ Nikwara ba kutaye omuntu yenshe ozyo ka teezi kozyo muporofita ara sinywa kuzwa mukati ka bantu'. ²⁴ Ee, mi amaporofita bonshe kuzwa kwa Samwele mi nabo niba kezya murushara rwakwe, niba wamba noku zyibisa ka aa mazyuba. ²⁵ Mulibana ba maporofita ke ntumererano eyo natenda Nyambe niba shukurwenu, komo naterwa Abrahama, mwi mbuto yako amasika onshe mwi fasi ara fuyawurwa'. ²⁶ Kuzwaha Nyambe nabusikiza omwika wakwe, namutuma kwenu akatanzi, kutaye ami fuyaure no kuzora muntu yenshe kuzwa ku vubbi bwenu.''