¹ Kono Saule, ashi amba ko kutiiza nanga ko kuyaya kurwisa aba zyiizwa bo Nfumu, ² naya kumu purisita ena he wiru mi namu kumbira a mañoro oku ma sinagoge mwa Damaseka, kutaye heba na wana yenshe ozyo awira Muburumeli, ibe bakwame kapa bakentu, mbwaba rete kwa Jerusalema neba shiminitwe. ³ Nashina munjira, nikwa tendahara kutaye aho akezya hafuhi ne Damaseka, akezyerwa mumuni uzwa kuwiru lyokumubika mukati. ⁴ mi aho awira hanshi akushuwa ezywi limutaye, ''Saule, Saule, chinji aho ondi shandisa?'' ⁵ Saule akutaba, ''Ndi weni, Nfumu? O Nfumu akutiye, ''Ndime Jesu ozyo okwesi o shandisa; ⁶ kono zyimane, okabire mu munzi, mi mbo sumwinwa cho kutenda.'' ⁷ O mukwame ozyo kayenda ne Saule nasiyara azya chiyambo, kushuwa ezywi kono achebuka muntu. ⁸ Saule akubuka hanshi, mi aho a arura mensho akwe, kwazya echo kabwene, cware bo kumukwata kuyanja mi noku mutwara mwa Damaseka. ⁹ Ka mazyuba otatwe kali kabona, no kulya kapa kunywa. ¹⁰ Kakwina omu zyiizwa kwa Damaseka wezina lya Ananiasi; mi o Nfumu na amba kwakwe mwi mpono, ''Ananiasi.'' Mi akutaye, ''Bone, Eme zyu, Nfumu.'' ¹¹ O Nfumu akumutaye, ''Ozyimane, oyende mumakururu akuiwa kuotoroka, mi kunjuo ya Judasi kakumbire mukwame azwa kwa tarese a kuiwa Saule; e naho arapera; ¹² mi nabona e mpono yo mukwame akuiwa Ananiasi nakabira mi no kubika amanja hakwe, kokutaye awane oku bona.'' ¹³ Kono Ananiasi akutaba ye, ''Nfumu nda shuwa zozyu mukwame kubantu bangi. o kukubaza kungi oko natenda kubantu bako bachenete mwa Jerusalema. ¹⁴ Akwesi ngxamu kuzwira kuma purisita bakuru oku kwata yenshe akuwa he zina lyako.'' ¹⁵ Kono o Nfumu namutiye, ''Yende, kakuli chitendiso changu chi ketetwe, kuhinda ezina lyangu habuso bwa ma Machaba na marena mi nabana ba Isiraele; ¹⁶ kakuli Ndara basunda buti nashande ke baka lye zina lyangu.'' ¹⁷ Cware Ananiasi aku nanuka ho, nokukabira munjuo. No ku mubika maanja, akutaye, ''Mukwangu Saule, o Nfumu Jesu, ozyo nalisunda kwako mwinjira aho ko kezya, nandi tumi kutaye owane oku bona noku zyura o Ruho Ruchenete.'' ¹⁸ Haho bulyo chifwana mbwe mayayu chokuwa kuzwa mumensho a Saule, mi akuborelwa okubona; akubuka mi na korobezwa; ¹⁹ mi nalya noku goreswa. Nakara naba zyiizwa mwa Damaseka kamazyuba mangi. ²⁰ Haho bulyo akuwamba Jesu mu masinagoge, kutaye Mwana wa Nyambe. ²¹ Abo niba mushuwa bonshe niba mukomoka no kutaye, '' Ozyu kali ndozywina mukwame nazyonaura bena ba mwa Jerusalema abo niba kuwa he zina lyakwe? Mi na kezya kunu kutaye abarete nibashiminwe kumuprisita mukuru.'' ²² Kono Saule akuba ne ngxamu ezingi, mi shika reta oku sharukuruha mukati kama Juda abo kaba hara mwa Damaseka okusunda kutaye Jesu nde Kiresite. ²³ Aho kuhita mazyuba mangi, ama Juda bokurera kumu yaya. ²⁴ Kono omurero wabo niwa zyibahara kwa Saule. Kamwi na Masiku kaba muliberera hazizyi kutaye bamu yaye. ²⁵ Kono aba zyiizwa bakwe bo kumuhinda masiku kumu rendeza kumuhitisa ha rukwakwa, no kumususikiza hanshi muchitundu. ²⁶ Aho akezya kwa Jerusalema, Saule aku lika kuli shanganya kuba zyiizwa, kono kaba mutiite bonshe, kusha zumina kutaye muzyiizwa. ²⁷ Kono Banabasi aku muhinda noku mu twara kuma apositola. Mi akaba sukurwira omo Saule na bonena oNfumu mwi njira mi o Nfumu na wamba kwakwe, mi no mo Saule naka kutareza kwa Damaseka mwi zina lya Jesu kokusha tiya. ²⁸ Nali shangana nabo aho kaba kabira no kuzwa mwa Jerusalema. Na amba kokushatiya mwi zina lyo Nfumu Jesu ²⁹ mi no kukanana nama Gerike ba maJuda; kono niba zwira habuso kushaka kumu yaya. ³⁰ A bakwakwe aho balituta kezi, niba mureta kwa Sasaria no kumutuma kwa tarese. ³¹ Cware, e nkereke zonshe mwa Judeya, Galileya, Samaliya kazina e nkozo no kuzyakisa; mi, no kuyenda mwi ntiya yo Nfumu mi no muburotu bo Ruho ru Chenete, e nkereke zo kuhingiha. ³² Mi kokezya kezo, Pitorosi aho ayenda muzi baka zonshe, akezya no kuba rumeli abo kaba hara mu munzi wa Lida. ³³ Akuwana mo mukwame we zina lya Eneya, ozyo karere myaka ye yanja ni to tatwe, kakuli ka zyuminine. ³⁴ Pitorosi aku mutaye, Eneya, Jesu Kiresite akuhoza. Buke mi ozyarure oburo bwako.'' Mi haho bulyo aku buka. ³⁵ Bonshe abo kaba hara mwa Lida ne Saruni niba mubona mi bo kuzokera ku Nfumu. ³⁶ Hanu kwakwina muzyizwa akuiwa Tabita mwa Jopa, itoroka ''Dokasi.'' Ozyu mukentu kazywire e mitendo mirotu nezi tendantu ze chishemo ezo na tendera ba sehekete. ³⁷ Kokezya ama zyuba ayo narwara mi a kufwa; aho bamana ku musanza, boka muralika kunjuo yo kuwiru. ³⁸ Shinaho Lida kaina hafwihi ne Jopa, mi aba zyizwa niba shuwa ye Pitorosi nkukena, niba tuma bakwame bo bire kuka mukumbira, ''Kezye kwetu kokusha lyeha.'' ³⁹ Pitorosi aku zyimana mi nakaya nabo. Aho shibaka hura, boka mutwara kunjuo yo kuwiru. Mi abafwirwa bokezya kuzyimana neye niba lira, kumusunda e misisi nezi zyabaro ezo natenda Dokasi nashina nabo. ⁴⁰ Pitorosi akuba zwisikiza bonshe hanje, a kutongama kamazwi, no kurapera; cware, akuzokera kuchi tupu, no kutaye, ''Tabita, buke.'' Aku arura mensho akwe, mi aho abona Pitorosi aku kara. ⁴¹ Pitorosi aku mukwata kuanja no kumu zyimika; mi aho akuwa abafwirwa nabo bazumina, akumubaha nahara. ⁴² Eyi ntaba yoku zyibahara mwa Jopa yonshe, mi bungi bwa bantu niba zumina ku Nfumu. ⁴³ Nikwa tendahara ye Pitorosi nakara mazyuba mangi mwa Jopa no mukwame akuiwa Simone, omu suki wezikabi.