⁴ Mbô tsy hitanako areo aila loatra, mangataka fotoagna fohy aminareo zaho mbô hitandregny zaho am-pahatoniagna. ⁵ Fao io lalahy io hitanay fao mpagnakorontagna aveo araiky zay nitariky ny Jiosy jiaby mangairagna zao tontolo zao hikomy. Izy no mpitariky ny sekta Nazareana. ⁶ Ary izy faogna koa no niaizaka ny handoto ny tempoly, kay nisambôrinay izy. (Fagnamarihagna: Reo karamontsan-taratasy talaoha manôsoko hoe: "Tianay ho tsara araka ny lalàgnanay izy.") ¹⁴ Naifa zaho magneky zao aminao, araka ny fampianaragna zay antsôvinjareo hoe sekta, dia karaha zany koa no hanompoako Zagnahary ny razambentsika. Zaho mahatoky amin'ny jiaby zay ao amin'ny lalàgna ndraiky reo voasaoratra reo mpagnazary. ¹⁵ Managna fahatokisagna Zagnahary karaha reo ôlogno reo zaho, fao hoisy fitsanganan'ny marigny ndraiky ny ratsy fagnahy amin'ny maty. ¹⁶ Noho zany zaho miaizaka lalandava mbô hanagna fisaignagna madio eo agnatraihan-Jagnahary ndraiky ny ôlombelogno. ²⁰ Na koa, reo ôlogno reo faogna no tsy tôkony hivaolagna zay hitanjareo tsy mety atoy aminaha koafa nitsangagna teo agnatraihan'ny filan-kevitry ny Jiosy zaho, ²¹ raha tsy hoe mahakasiky raha araiky zay nihaikiàko koafa nitsangagna tagnivon-jareo zaho magnanjao: 'Zany dia mikasiky ny fitsanganan'ny maty zay hitsaragna zaho aketo agnatraihanareo niany.' ²² Ary Feliksa, zay nagnambaragna tsara mahakasiky lehy fampianaragna. Izy nivaolagna nagnanjao: "koafa mijôtso avy akagny Jerosalema Lysia mpandidy, hanapa-kevitry ny amin'ny raharahana zaho." ²³ Aveo izy nagniraka lehy kapiteny fao Paoly tôkony hiambaisagna, fao mbô hoisy fahafahagna dia tsy hoisy amin'ny reo namany ho sakanagna amin'ny fagnampiagna zay raha ilainy. ²⁴ Andro vitsivitsy tafaran'ny zay, nimpôdy niaraka tamin'i Drosila vadiny i Feliksa, zay vaiavy Jiosy, kay nalaifa hoagny Paoly izy aveo nahiregny taminazy mahakasiky ny finoagna ao amin'i Kristy Jesôsy. ²⁵ Fao koafa niady hevitry niaraka tamin'i Paoly mahakasiky ny fahamarignagna, fahononan-taigna, ndraiky ny fitsaragna hoavy, dia nanjary ambory i Feliksa kay nivaolagna nagnanjao: "Mandihiana manomboko zao. Fao koafa managna fahafahagna zaho afara akao, dia handaifa hoanao." ²⁶ Nandritran'ny fotoagna zany faogna, nagnantaigna izy fao hagnamia vaola azy Paoly, noho zany dia nandaifa hoazy mazagna izy aveo nikoragna taminazy. ²⁷ Fao koafa afaka aroa tagno, nanjary governora nandimby Feliksa i Porsio Festosy, naifa Feliksa te-hahazo sitraka tamin'ny reo Jiosy, dia nambailany ho hiambaisagna faogna Paoly.