¹ Izikoa fa nahita irô vahoaka aby iô i Jesosy, nanonga tagnambon'ny bongo Izy. Aviô izikoa fa tafipaitraka Izy, Kay nagnatogno Izy irô mpianatranany aby iô. ² Nagnabiagna vavanany Izy aviô nampianatra irô, magnano hoe: ³ "Sambatra ny masikiny ara-pagnahy fa ninany ny fanjakan'ny lagnitry. ⁴ Sambatra irô misaona, fa hampiononigny irô. ⁵ Sambatra iro malemy fagnahy, fa irô igny handova ny tany. ⁶ Sambatra irô silôgno ndraiky sakaran'ny fahamarinagna, fa vokisagna irô igny. ⁷ Sambatra irô mpamindra fo, fa ahazo famindram-pô Koa irô igny. ⁸ Sambatra irô madio am-po, fa hahita Zagnahary iro igny. ⁹ Sambatra irô mpampihavagna, fa irô igny kahiagna zanaka Zagnahary. ¹⁰ Sambatra irô hiagniny boaka amin'ny fahamarignana, fa nindrô fanjakan'ny lagnitry. ¹¹ Sambatra anarô izikoa magniratsira anarô ndraiky magnejiky anarô olo, aviô mivolagna karazagna vandy jiaby hanohitry anarô boaka aminaka. ¹² Mifalia ndraiky miravoravohà, fa maventy valisoa azonarô agny an-dagnitry. Fa karaha zegny koa fomba nagniangnandrô irô mpaminany niaigny talohanarô. ¹³ Anarô zegny siran'ny tany. Fa izikoa sira najary matsatso, Kay amin'ny fomba akôry ampasira izy ndraiky? Tsy ho tsara na amin'ino na amin'ino eky izegny fa hariagna ndraiky hidiavin'ny vity olo ny sasany tavela. ¹⁴ Anarô fahazavagnan'ny donia ity. Irô tanàna miorigny amin'ny bongo igny fa tsy mety hasitriky eky. ¹⁵ Tsisy olo mampiretry jiro kay mametraka izegny agny ambanin'ny tognotogno, fa tsy maintsy amin'ny toeragna jiro fo, magnazava raha jiaby an-tragno izegny. ¹⁶ Ambilà hazava ankilan'olo karaha zegny fomba zeny fahazavagnanarô baika ahitandrô asa tsara ataonarô aviô ankalazainy ny babanarô an-dagnitry agny. ¹⁷ Aza mieritreritry fa hoe avy handrava lalàgna na irô mpaminany zaha. Tsy avy hagnapotiky iro zaha, fa hagnantantairaka irô igny. ¹⁸ Fa volagniko marigny aminarô fa mandra-paharavan'ny lagnitry ndraiky tany, zegny tsy foagna amin'ny lalàgna nata litera araiky ndraiky tedron-tsaoratra araiky, mandra-pahatantairaka io raha jiaby igny. ¹⁹ Kay noho izegny, na azôvy na azôvy mandika nata farany hely amindrô didy aby iô ndraiky mampianatra ny hafa agnano karaha zegny koa, kay zaigny hikahiagna ho farany hely agny amin'ny fanjakan'ny lagnitry. Fa na azôvy na na azôvy magnaraka ndraiky mampianatra irô donko hikahiagna tegnan'ny be agny amin'ny fanjakan'ny lagnitry. ²⁰ Fa volagniko aminarô fa Izikoa tsy mihoatra nohon'ny mpanoro-dalàgna ndraiky fariseo fahamarignanarô, zegny tsy hiditra agny amin'ny fanjakan'ny lagnitry fekiny anarô. ²¹ Efa regninarô fa voavolagna tamindrô fa ela: "Aza mamono olo, aviô na azôvy na zôvy olo mamono olo zegny kay tsy maintsy sazigny amin'ny fitsaragna. ²² Fa ambarako anarô tegna marigny, fa zaigny olo meloko jiaby amin'ny ralahinany zegny mendriky heloigny agny amin'ny fitsaragna, aviô na azôvy na azôvy mivolagna ralahinany hoe: 'Anao olom-poagna!' dia heloigna agny amin'ny filan-kevitry, aviô na azôvy na azôvy mivolagna hoe: 'Laifaka anao!' kay mendrika ho agny amin'ny ho agny amin'ny farihy misy môtro mirehitry. ²³ Noho izegny, izikoa anao raha ohatra magnatitry fagnatitry agnambon'ny alitara, kay tsaroanao fa managna alahelo aminao ralahinao, ²⁴ kay ambila akendriky alohan'ny alitara fagnatitranao, aviô mandihanà lalagna mahitsy anao. Mivavahà akendriky amin'ny ralahinao, aviô mipodiana malaky salakady atairà ndraiky ka fagnatitrinao. ²⁵ Mihavàgna malaky amin'ny mpagnampanga anao izikoa mbola miara-dihà aminany agny amin'ny fitsaragna, fandrao amin'ny mpagnapanga anao hitôndra anao agny amin'ny mpitsara, aviô ny mpitsara mety hitôndra agny amin'ny manam-boninahitra, kay atao agnatin'ny prison anao. ²⁶ Ambarako anaro tegna marigny, fa tsy afaka ao fekiny anao, mandra-mpagnifanao vola faran'ny hely amin'ny trosanao. ²⁷ Efa regninarô hoe: "Aza mijangajanga. ²⁸ Kanaifa ambarako aminarô fa zay olo jiaby mizaha viavy salakady mbola magniry izy fo, efa mijangajanga ao am-pony izy dikan'izegny. ²⁹ Izikoa manafitohnagna anao masonao ankavanagna, adosohà izegny aviô atsipia lavitra agny. Fa tegna tsara aminao izikoa ampahany araiky amin'ny vatagnanao tokony hirobatigny fa tsy tegnanao jiaby atsipy agny amin'ny heloko. ³⁰ Izikoa manafintohina anao tagnanao ankavanagna, tapahà izegny aviô atsipaza lavitra hiala aminao. Fa tegna tsara hoanao izikoa ampahany araiky amin'ny vatagnanao tokony ho very fa tsy tegnanao jiaby atsipy agny amin'ny heloko ³¹ Aviô efa voavolagna ao koa hoe: "Na azôvy na azôvy misaraka amin'ny vadiny, aoka izy agnamia taratasy fisaraham-panambadianagna." ³² Fa zaha ndraiky mivôlagna aminarô fa hoan'izay misaraka amin'ny vadiny, ankoatra boaka amin'ny fijangajangagna, kay dikan'izegny mampijangajanga izy. Na azôvy na azôvy manambady izy afaran'ny fisarahany ,mijangajanga fo koa izy. ³³ Aviô koa efa regninarô nambarany Ntaolo hoe: 'Aza mianiana amin'ny fianianana diso, fa andaisa agnatrehan'ny Tompo ny fianiananao.' ³⁴ Fa zaha ndraiky mivolagna aminarô, aza mianiana amin'ny zaka jiaby, nata amin'ny lagnitry aby, fa sezy fipetrahan-dRagnahary izegny; ³⁵ na amin'ny tany, fa fipetrahan'ny vitinany izegny ; na koa amin'ny Jerosalema, fa tanànan'ny mpanjaka maventy zegny. ³⁶ Aza misangy amin'ny lohanao, fa tsy afaka magnafotsy na koa magnajoby tapaka fagneva araiky anao. ³⁷ Fa aoka ny volagnanao ho, 'Ia,ia,' na 'Tsia, tsia.' Ze mihôtry Zay di baka amin'ilay ratsy. ³⁸ Regninarô fa voavôlagna hoe: "Maso solon'ny maso, aviô nify solon'ny nify." ³⁹ Fa zaha ndraiky mivôlagna aminarô hoe, aza manohitry ny ratsy. Fa kanaifa ndraiky, na azôvy na azôvy mitaifaka takaolagnanao ankavanagna, kay mba amaiza izy koa ny ilany. ⁴⁰ Aviô izikoa misy olo magniry hiaraka aminao agny amin'ny fitsaragna kay magnaindaka ny akanjonao, ambilà ninazy agny fo koa lambanao. ⁴¹ Na azôvy na azôvy manery anao andaiha amin'ny lalagna kilometra araiky ,mandihana miaraka aminany amin'ny lalagna kilometra aroe. ⁴² Amia zay mangataka aminao, aviô aza manda na azôvy na azôvy magniry hindragna aminao. ⁴³ Efa regninarô fa voavôlagna hoe: 'Tsy maintsy mankatia mpiara-belogno aminao anao aviô mankahala ny fahavalonao.' ⁴⁴ Fa ambarako marigny aminarô , tiava ny rafinao aviô mivavaha hoandrô olo magnejiky anao, [Fagnamarihagna: Ny dikan-teny taloha tegna tsara: "Misaora hoandrô olo magnozogno anarô, manaova tsara olo zay mankahala anao."'] ⁴⁵ mba hanjary ho loso zanaka babanaro agny an-dagnitra anarô. Fa Izy mampitsiriky masoandronany amin'ny ratsy ndraiky ny tsara, aviô mampilatsaka malegny amin'ny marigny ndraiky ny tsy marigny. ⁴⁶ Fa izikoa irô olo tia anarô mba tiavanarô koa, ino edy mba valisoa azonarô? Nata irô mpamoro mpantanty aby tsy magnano karaha zegny koa? ⁴⁷ Izikoa ralahinarô zaraiky fo arabainarô, ino edy mba raha ataonarô mihoatra ny hafa ? Nata irô jentilisa aby iô tsy magnano karaha zegny? ⁴⁸ Noho izegny, tsy maintsy tantairaka anarô. Karaha fagnatanterahan'ny babanarô zay agny an-dagnitra agny.