¹ Fa ny fanjakan'ny lagnitry karaha tompon-tany zay nandaiha marandraigny be agnakarama mpiasa hoan'ny tany tsabon'ny raisin-nany. ² Izikoa fa baka nifagnaraka tamin'ndrô mpiasa izy fa ho dinaria araiky isan'ndra karaman'ndro, nalaifany tagny amin'ny taniny raisin-nany iro. ³ Niboaka ndraiky tamin'ny laira fahatelo avio nahita mpiasa hafa nijorojoro tagny an- bazary. ⁴ Izy nagnambara tamin'ndro: 'Anao koa, mandiana agny amin'ny taniny raisin, avio zay amin'ny hevitranany marigny hamiako anaro.' Kay nandaiha niasa iro. ⁵ Mbola niboaka ndraiky izy tio amin'ny laira tsaota avio koa tamin'ny laira sivy, abaka io nagnano karaha zegny fo koa. ⁶ Tamin'ny laira faha araiky ambin'ny folo, niboaka ndraiky izy nandaiha avio nahita mpiasa hafa nitsangatsangana. ⁷ Nambarany tamin'ndro: 'Nagnino mba anaro karaha mitsangana mandritra tontolo andro?' Iro nagnambara taminany hoe: 'Tsary nisy olo mikarma zahay.' Navaliny tamin'ndro: "Anaro fo mandihana agny an-taniny raisin.' ⁸ Izikoa fa hariva andra, nivolagna tamin'ny mpitandrin-draharaha tompony taniny raisin hoe: 'Kahia iro mpiasa avio hifaiha karaman'ndro, manomboko baka agny amin'ny farany ziska amin'ny voalohany.' ⁹ Izikoa fa navy iro mpiasa nalaigna tamin'ny laira faharaiky ambin'ny folo, nahazo dinaria araiky aby iro tsy araiky araiky. ¹⁰ Izikoa fa navy iro mpiasa voalohany, nihevitry fa ahazo mihoatra iro, kanaifa iro fo koa nahazo dinaria araiky aby isany. ¹¹ Izikoa fa nahazo karamanany iro, nitaraigny momba lay tompon-tany iro. ¹² Nambaran'ndro: "Iro mpiasa farany io niasa nanditra laira araiky fo, kanaifa nampitovianao taminay fo iro, zahay nizahavesatra ny tontolo andra ndraiky niharitra hain'andra.' ¹³ Nivaliny tompon-tany nivolagna ariky tamin'ndro hoe: 'O ry zaza, tsy magnano zaytsy mety aminao zaha. Tsy dinaria araiky mba nifagnarahanao taminaka? ¹⁴ Alaiva fo zay ninao avio manjozora amin'ny lalagnanao. Zaho nifidy agnamia hoaan'ndro mpiasa nikaramaigna farany karaha anao koa. ¹⁵ Tsy manan-jo hagnano araka zay tiako amin'ny ninaka mba zaha? Sa mialogno mba anaro satria malala-tagnana zaha?' ¹⁶ Kay ny farany mivadika voalohany, avo ny voalohany mivadika faany." [Fagnamariana: Ny dikan-teny taloha taigna tsara magnala ny hoe: "Maro ny kahiagna fa vitsy ny voafidy."] ¹⁷ Izikoa handaiha agny Jerosalema Jesosy, kay nangala iro aroe ambin'ny folo tio agnilany Izy, avio nivolagnaara-dalagna Izy nivolagna tamin'ndro hoe: ¹⁸ "Igny fa, hiakatra andaiha Jerosalema atsika, avio ny Zanak'ologno hamiagna io amin'ny lohan'ny mpisorogna ndraiky irô mpanora-dalagna. Iro agnameloka izy salakady ho faty abaka io ¹⁹ hagnamia Izy amin'ndro Jentilisa mbaika hitokizan'olo, hipopoagna, avio hanombohagna Izy amin'ny hazofijliagna. Fa amin'ny andra fahatelo hatsangana nadraiky Izy." ²⁰ Abaka io regnin'ndro zanaka lahin'i Zebedio nagnatogno Jesosy niaraka tamin'ndrozanany lahy. Niankohoko tio anatrehany izy avio nangataka zaka baka aminany. ²¹ Nambarany Jesosy taminany: "Ino mba raha irinao?" Navaliny taminany: "Mandidia mba hipaitrahan'ndro zanako aroé lahy aby ireto, ny araiky io an-tagnanao ankavanagna avio araiky amin'ny tagnanao ankavia, ao amin'ny fanjakananao." ²² Fa Jesosy namaly avio nivolagna nagnano hoe: "Tsy hainaro tsara bkiny zaka angatahanaro. Afaka higiaka kapoaka zay higiako mba anaro? Namaly iro hoe: "Afaka zahay." ²³ Izy nagnambara tamin'ndro: "Higiaka kapoakako tokoa anaro. Fa hipaitraka io an-tagnako an-kavanako ndraiky ankaviako tsy anjarako ny magnamia, fa hoan'ndro zay efa nomagnin'ny babako." ²⁴ Izikoa fa naharegny izegny iro mpianatra folo lahy lahy hafa, neloko mare tamin'ndro mpiralahy aroé. ²⁵ Fa Jesosy nikaiky iro handaiha aminany avio nivolagna nagnano hoe: "Hainaro fa iro mpanapaka iro jentilisa hangeja iro, avio iro lelahy manan-danja iro hampiatra ny fahefany io amin'ndro. ²⁶ Fa tsy tokony ho karaha izegny aminaro. Mifanohitra amin'izegny, na azovy na azovy magniry ho loso maventy aminaro tsy maintsy ho mpanomponaro, ²⁷ avio na azovy na azovy magniry ho voalohany io aminaro tsy maintsy ho mpanomponaro, ²⁸ karaha ny Zanak'olo tsy nvy hitopoina, fa hanompo, ndraiky hagnamia aigny mbaika ho vidim-panavotagna ho amin'ny maro. ²⁹ Izikoa fa niboaka baka agny Jeriko iro, vahoaka maro nagnaraka Izy. ³⁰ Nisy lelahy jamba aroé nipaitraka tio amin'ny sisin-dalagna. Izikoa fa naregny fa nandalo Jesosy, nikiaka mare iro: "Tompo, zanaka'i Davida, mamindrà fo aminay." ³¹ Nasiaka iro, iro vahoaka aby io, mbaika hangigny, kanaifa vao maika iro nitabataba maresaka: "Tompo, zanaka Davida, mamindrà fo aminay." ³² Abaka io Jesosy nijanogno avio nikaiky iro salakady nivolagnanagnano hoe: "Ino mba raha irinaro hataoko aminaro?" ³³ Navalin'ndro Taminany: "Tompo, mba tia hahiratra masonay." ³⁴ Directy Jesosy nangoraka, sady nikitiky mason'ndro. Kay tio ny io nahiratra directy mason'ndro salakady nagnaraka Izy.