¹ Tamin'io fotoagna io fo, navy tiô amin'i Jesosy irô mpianatranany salakady nagnambara: "Azôvy ny tegna maventy amin'ny fanjakan'ny lagnitry?" ² Jesosy nikaiky irô tsaiky hely andaiha aminany, nametraka izy tiô amin'ndrô, ³ aviô nivôlagna: "Ambarako marigny aminaro, fa izikoa tsy miôva karaha irô tsaiky hely anarô, kay tsisy hevitry hidiranarô agny amin'ny fanjakan'ny lagnitry. ⁴ Noho izegny, na azôvy na azôvy magnètry tègna karaha ity tsaiky hely ty, taigna maventy izy agny amin'ny fanjakan'ny lagnitry. ⁵ Na azôvy na azôvy mangala irô tsaiky hely aby ty karaha amin'ny agnarako, mandray Zaha izy dikan'izegny. ⁶ Fa na azôvy na azôvy mahatônga araiky amin'ndrô tsaiky hely ty zay mino Zaha hanota, ho taigna tsara kokoa amin'azy hiantôgnany fikosoham-bary maventy io amin'ny vôzôny, kay halentika agny amin'ny ranomasigny laligny izy. ⁷ Masoantoko hoan'ny donia ty nohon'ny fotoagnan'ny fanafintohinagna! Fa ilaigna hahaviany fotoagna izegny, naifa loza amin'ndrô olo zay navian'izegny fotoagna izegny! ⁸ Izikoa mitairaka fanafintohina anao tagnanao na vitinao, kay tapaho izegny aviô adosoaha iô aminao. Tsara kokoa aminao ny miditry kilemaigna na mandringa agny amin'ny fiaignana mandrakizay noho ny ho very agny amin'ny môtro tsy mety maty amin'ny fanagnana tanana aroé vity aroé. ⁹ Izikoa mitairaka fanafintohina anao masonao araiky, hongota izegny aviô adosoaha iô aminao. Tsara kokoa aminao ny miditry agny amin'ny fiaignana mandrakizay miaraka amin'ny maso ilany noho'ny hoe very agny amin'ny motro tsy mety mahay maty miaraka amin'ny maso aroé. ¹⁰ Tandraima tsy hagnano tsinotsinogno irô tsaiky madiniky aby iô anarô. Fa magnambara aminarô Zaha fa agny an-dagnitry irô anjelinany mizaha vatagna fo Babako zay agny an-dagnitry. ¹¹ [Fagnamarihana: Ny dikan-teny taloha tègna tsara tsy ahitagna fehezanteny zay miboaka karaha hoe: "Fa ny Zanak'Olo avy hagnavotra zay very."] ¹² Ino mba raha eritreretinarô? Izikoa misy managna ondrikondriky zato, kay mandaiha amin'ny lalagnan-diso araiky amin'ndrô, tsy agnambaila ny sivy amby sivifolo iô amin'ny avoana mba izy aviô andaiha hikaroka araiky zay mandaiha amin'ny lalagna diso? ¹³ Izikoa hitany izegny, fa ambarako marigny aminarô, fa mijaly amin'izegny mihoatra noho irô sivy amby sivifolo zay tsy nandaiha amin'ny lalagna diso izy. ¹⁴ Karaha izegny koa tsy sitraky ny Babako agny an-dagnitra ny hahavery araiky amin'ndrô madiniky aby iô. ¹⁵ Izikoa manonta aminao ralahinao, mandihana aviô ambaraho izy ny hadisoagnany, aminao ndraiky izy zaraiky fo. ¹⁶ Kanaifa izikoa mitandregny anao izy, mangala araiky na aroé hafa tsy mitandregny anao izy, mangàla araiky na aroé hafa miaraka aminao, amin'zay mbaka amin'ny vavan'ndrôavolombelôgno aroé na telo ahafagna magnamarigny vôlagna jiaby. ¹⁷ Aviô izikoa mandà ny hitandregny iziô izy, ambarao amin'ny fiangonanagna irô zaka mitranga. Izikoa tsy magneky hitandregny fiangonagna fo koa izy, ambilaho izy karaha irô Jentilisa ndraiky mpamory haitra. ¹⁸ Ambarako marigny aminarô, na ino na ino fihezinaro aty an-tany ho fehezigny agny an-dagnitra; aviô na ino na ino ambailanarô aty an-tany ho voa ambailanarô agny an-dagnitry. ¹⁹ Mbola ambarako aminarô ndraiky hoe: "Izikoa misy aroé aminarô magneky aty an-tany amin'zay zaka angatahin'ndrô, kay ho atao ho irô izegny amin'ny alalan'ny Babako zay agny an-dagnitra. ²⁰ Fa na aia misy aroé na telo miaraka mivory amin'ny Agnarako, kay ho iô agnivon'ndrô Zaha." ²¹ Abaka aviô nagnantôgno Petera aviô nivôlagna tamin'i Jesosy: "Tompo, impiry hanota aminaka ralahiko kay hamela izy zaha? Ziska impito? ²² Jesosy nivôlagna izy nagnano hoe: "Tsy mivôlagna aminao Zaha hoe im-pito, fa ziska fitopolo im-pito. ²³ Noho izegny fanjakan'ny lagnitry mitovy amin'ny mpanjaka araiky zay tia hifandamina ara-bôla miaraka amin'ndrô mpanompony. ²⁴ Izikoa vao nanomboko ny fandaminagnana, nisy mpanompo araiky tiô aminany zay nanagnany talenta araiky aligny. ²⁵ Naifa satria tsy nanagnany fomba handoavagna izegny izy, nandidy hamarotana izy tompony, miaraka amin'ny vadiny ndraiky irô zanany aviô zay hanagnany jiaby, kay ho vita fandoavan-trôsa. ²⁶ Noho izegny, niondriky lay mpanompo, aviô niankôhoko tiô alohany, aviô nivôlagna nagnano hoe: 'Tompo, manàgna faraitagna aminaka, haloako aminao zaka jiaby.' ²⁷ Noho izegny tompon'ny mpanompo izegny, onena, kay nagnafaka izy aviô namela trôsa taminany. ²⁸ Fa niboaka iô mpanompo iô kay nahita araiky tamin'ndrô mpiara-manompo aminany, zay nanagnany dinaria zato. Nisamboriny izy, niraisiny tamin'ny tendany, aviô nivôlagna magnano hoe: 'Aloavà aminaka trosanao.' ²⁹ Naifa niondriky iô mpiara-manompo aminany aviô nitalaho taminany, nagnano hoe: 'Manàgna faharetagna aminaka, haloako aminao ndraiky.' ³⁰ Kanaifa nandà mpanompo voalohany. Mifanohitry amin'izegny, nandaiha izy aviô nataony tany am-pigadragna lay mpiara-manompo aminany zay nitrosainy. ³¹ Izikoa nahita zay niboaka irô mpiara-manompo aminany, nalahelo be irô. Nandaiha aviô nagnambara tamin'ny tompony zay jiaby niboaka irô. ³² Abaka aviô nikaiky izy tompon'iô, aviô nivôlagna izy nagnano hoe: 'Anao mpanompo ratsy fagnahy, namela trosa jiaby taminao zaha satria anao nangataka taminaka. ³³ Tsy tokony hanagna famindram-po amin'ny mpiara-manompo aminao mba anao, karaha nanagnako famindram-po taminao? ³⁴ Neloko tompony aviô nitôndra izy tagny amin'ndrô mpampijaly mandra-pagnifany zay jiaby nitrosainy. ³⁵ Karaha izegny koa ho ataon'ny Babako agny an-dagnitry aminarô, izikoa tsy mamèla ralahinany amin'ny fony tsirairay baka aminarô."