¹ Paoly, nikahin'i Kristy Jesosy mba ho Apostoly baka amin'ny sitrapon-dRagnahary, ndraiky Sostena ralahintsika, ² ho an'ny fiangonan-dRagnahary ao Korinto, ho an'irô nahamasigniny tao amin'i Kristy Jesosy, voakaiky ho olo masigny. Manoratra amin-drô jiaby zegny mikaiky agnaran'i Jesosy Kristy Tompontsika amin'ny toeragna jiaby koa izahay, Tompon-drô ndraiky nintsika. ³ Ho amin-drô fahatsaragna ndraiky fiadanagna bak'amin-dRagnahary Babantsika ndraiky Jesosy Kristy Tompontsika. ⁴ Izaho tsy mijanogno magnamia fankasitrahagna ndRagnahary ho anarô nohon'ny fahatsaran-dRagnahary namezany i Jesosy Kristy anarô. ⁵ Nataony manankaregna tamin'ny fomba jiaby anarô, tamin'ny fivolagnana jiaby ndraiky fahaizagna jiaby, ⁶ izy koa fa voaporofo tiô aminarô fa marigny fagnabaragna mikasik'i Kristy. ⁷ Baka amin'izegny tsy hijalianarô fagnamezagna fahatsaragna iô ampiambesanarô fagnambaragnan'i Jesosy Kristy Tompontsika. ⁸ Mbola izy koa hampahery anarô zisika farany, mba tsy hanagna tsigny anarô amin'ny andran'i Jesosy Kristy Tompontsika. ⁹ Matokisa Zagnahary, izegny nikaiky anarô hiaraka amin'ny zanany lahy, Jesosy Kristy Tompontsika. ¹⁰ Amin'iziô, mamporisiky anarô zaho, ralahy, amin'ny agnaran'i Jesosy Kristy Tompontsika, mba hifagnaraka anarô jiaby, bakô tsy tôkony hoisy fisarahagna aminarô. Mamporisiky anarô zaho mba ho jery ariky aviô ho tanjogno araiky anarô. ¹¹ Nambaran'ny vahoakan'i Kloe taminaka tsara, ralahy, fa misy fifampiandaniagna aminarô. ¹² Kara ty tiako ambara: Tsiaraikiaraiky aminarô samy magnano: "Izaho miaraka amin'i Paoly," na "Izaho miaraka amin'i Apolosy," na "Izaho'miaraka amin'i Kefasy," na "Izaho miaraka amin'i Kristy". ¹³ Voarasarasa mba i Kristy? Paoly ma voafantsiky ho anarô? Anarô ma natao batisa tamin'ny agnaran'i Paoly? ¹⁴ Mankasitraka ndRagnahary zaho fa tsisy nataoko batisa anarô, izy koa tsy Kripo ndraiky Gaio fo. ¹⁵ Izegny mba tsy hafahany olo mivolagna fa tamin'ny agnarako nagnanaovagna batisa anarô. ¹⁶ (Izaho koa nagnano batisa fianakaviagnan'i Stefanasy. Ankoatran'izegny, tsy haiko na nisy hafa nataoko batisa) ¹⁷ Tsy hampagnano batisa nagnirahan'i Kristy zaho fa hagnambara filazantsara. Izy tsy nandefa zaho hitory amin'ny volagna fisiagna jerin'olombelogno, mba tsy ho foagna herin'ny hazofijaliagnan'i Kristy. ¹⁸ Fa hafatra mikasiky hazo fijaliagna, hadalagna amin-drô zegny ho faty. Iô amin-drô zegny ho vonjen-dRagnahary ndraiky, herin-dRagnahary izegny. ¹⁹ Fa voasoratra: "Ho potehiko fahendregnan'ny hendry. Ho foagnana fahaizan'ny mahay." ²⁰ Aia olo misy jery? Aia ny manam-pahaizagna? Aia koa olo mpiady hevitra an'izao tontolo izao? Izio mba tsy navadiky Zagnahary ho hadalagna fahendren'izao tontolo izao? ²¹ Fotony tsy nahay Zagnahary izao tontolo izao tao amin'ny fahendregnany, sitraka Zagnahary hagnavotro irô zegny mino baka amin'ny hadalagnan'ny fitoriagna. ²² Irô Jiosy mangataka famantaragna mahagaga fa irô Grika ndraiky mitady fahaizagna. ²³ Fa izahay magnambara an'i Kristy fa voafantsiky, izegny vato mampameloko amin-drô Jiosy sady fahadalagna amin-drô Grika. ²⁴ Fa irô zegniny voakaikin-dRagnahary, na irô Jiosy na irô Grika, mitory an'i Kristy kara hery ndraiky fahendregnan-dRagnahary. ²⁵ Fa hadalagnan-dRagnahary hendry tohizay olo, bakô fahalemen-dRagnahary matanjaka tohizay nin'olo. ²⁶ Heritrerete ny fikahiagna anarô, ralahy. Tsy maro aminarô misy jery raha amin'ny maha olombelogno. vitsy aminarô mahery. Vitsy aminarô koa agnambo firazagnana. ²⁷ Zagnahary nifidy irô adalan'izao tontolo izao mba hampamegnatra irô misy jery. Zagnahary nifidy irô malemy amin'izao tontolo izao mba hampamegnatra irô matanjaka. ²⁸ Zagnahary nifidy irô alan'olo ndraiky irô ambany amin'izao tontolo izao. Izy koa nifidy irô raha niheverigny atao tsiontsino, mba hagnamboahany fa zegny raha atao manandanja, tsisy dikany. ²⁹ Nataony izegny mba tsisy raha hanagna antony hireharehagna eky iô alohany. ³⁰ Baka amin'ny raha nataon-dRagnahary, amin'iziô anarô nanjary ao amin'i Kristy Jesosy, izegny lôso fisiagna jery hoantsika baka amin-dRagnahary. Izy lôso fahamarignantsika, fahamasignantsika bakô fahafahantsika. ³¹ Baka amin'izegny, araka nambaran'ny soratra masigny: "Ambila izegny mirehareha, hirehareha ao amin'ny Tompo"