¹ Namboasy gny tragnony manoka gny fahendrena; nanao asa sokisy andry fito boak'aminigny vatolapy izy. ² Namono reo bibiny izy; napifandaro gny divainy izy; dra nanoby gny latabany. ³ Nagniraky reo piasa atragnony izy; nitoka zaka amireo toeran'avo indrindranigny tana izy ho: ⁴ "Iza gny bado? Aoky izy hagnaton'atiky!" Ho an'ize sy apy say soa gny hizakany. ⁵ "Avia, hano gny haniko, dra nomy gny divay niharoiko. ⁶ Angao reo fihesikao bado dra miveloma; mandehana aminigny lalanigny fahazava-say. ⁷ Na iza na iza magnatrasy gny panirasira dra handray fagnararaota; na iza na iza hizaka fatrasy gny rasy fagnahy dra handray reo fanirasira. ⁸ Ka magnanasy gny panirasira, raha sy zay dra ho halany hanao; ⁹ anaro gny olo-kendry, dra ho tiany hanao. Magnomeza gny olo-kendry, dra ho avy hendry kokoa izy; apenaro gny olo-mary, dra hagnapy gny fenarany izy. ¹⁰ Gny fahatahora an'i Yaveh gny fiandoham-pahendre, dra gny fahalala gny Masy gny fahazava-say. ¹¹ Fa aminigny alalako gny hihamaroanigny andronao; dra hapiako tao maro gny fiegnanao. ¹² Raha hendry hanao, dra hendry ho anigny vatanao avo, dra raha manirasira hanao, dra hinday anizay aminigny vatanao avo." ¹³ Gny apelanigny mola dra sy mahay, sy nibeazy izy dra sy mahafatasy na ino na ino. ¹⁴ Mitoby eo ambetrangarany gny tagnony izy; eo aminigny seza aminigny toera abo indrindra aminigny tana. ¹⁵ Mitokava reo ze miriosy amireo lala izy, aminigny olo ze mandeha mahisy aminigny lalan'ereo. ¹⁶ "Na iza na iza babo, aoky izy hiherin'eto ndraiky," hoy izy amireo ze sy mana say. ¹⁷ "Mamy gny rano nangalary, dra masiro gny mofonigny sembaratelo." ¹⁸ Fa sy fatany fa agny gny maty, fa reo vahiny nasainy dra agny aminigny halalinigny Fiegna-sy hita.