¹ Ohabolan'i Solomona. Gny zanaky hendry mahafaly gny rany gny zanaky mola mapalahelo gny reniny. ² Gny harena navory taminigny faharasiany dra sy mana-daza, fa gny fanova gny mary gny miaro anao aminigny fahafatesa. ³ Sy angan'i Yaveh ho resy gny fagnahinigny olo-mary, fa magnafoa reo fagnirianigny rasy fagnahy Izy. ⁴ Gny tagna kamo gny atony mapahatra gny olo, fa gny tagnanigny olo mazoto mahazo harena. ⁵ Gny zanaky hendry mamory vokasy aminigny fahavarasy, fa mahamegnasy anazy gny mandry mandrisy gny fiziza. ⁶ Reo fagnomeza boak'amin'Agnahary dra eo aminigny lohanigny olo-mary, fa gny vavanigny rasy fagnahy dra mandrakosy herisetra. ⁷ Gny olo-mary mapifaly reo ze mahasiaro anazy, fa gny agnaranigny rasy fagnahy dra ho lo. ⁸ Reo ze hendry magneky reo didy, fa gny mola mahay vava dra ho rava. ⁹ Izy ze mandeha apilamina, fa ze manao gny lalany ho meloky, dra ho hita. ¹⁰ Izy ze mipi-maso dra hahavy alahelo, fa gny mola de zaka dra hazera. ¹¹ Gny vavanigny olo mary dra loharanon'ay, fa gny vavanigny rasy fagnahy dra mandrakosy herisetra. ¹² Gny fakahala manestika aly, fa gny fitiava manaro gny fahadisoan'aby. ¹³ Hita aminigny moloso gny olo mana-say gny fahendrena, fa sora-kazo gny ho aminigny lamosiny sy mana say. ¹⁴ Gny olo hendry dra mitahiry fahalala, fa gny vavanigny mola hinday faharava hagnariny. ¹⁵ Gny herenany gny olo manandraha dra gny tana fatras'ary; gny fahatranigny mahatra dra faharavan'ereo. ¹⁶ Minday ho aminigny fiegna gny karamanigny olo-mary; gny tombony azonigny rasy fagnahy dra minday anereo ho aminigny fahota. ¹⁷ Misy lala magnagny aminigny fiegna ho anize magnaraky gny fisipi-pifeheza, fa ze manda famaiza dra mandeha aminigny lalan-diso. ¹⁸ Ze magnavony falegna dra mana sogny pavandy, dra ze mapiely endrikendriky dra mola. ¹⁹ Raha misy zaka maro, dra sy anganigny heloky, fa ze mitandrin'anize zakany gny hendry. ²⁰ Volafosy voafaty gny lelanigny olo-mary; sy dra misy lazany gny ao aponigny rasy fagnahy. ²¹ Gny sogniny gny olo-mary mamelo gny maro, fa maty gny mola nohonigny sy fahapian'ereo say. ²² Gny fagnomeza soa boak'amin'i Yaveh gny minday harena dra sy apiany fatahora zay. ²³ Fihira fataonigny mola gny fanovan-drasy, fa gny fahendrena gny fahafinaretanigny olo mana fahazava-say. ²⁴ Gny tahosy gny olo rasy fagnahy dra hahavoan'anazy, fa gny fagnirianigny olo-mary dra homen'anazy. ²⁵ Gny rasy fagnahy dra manahaky gny tafio-drivosy maloto, dra sy eo sasy ereo, fa gny olo mary dra fotosy ze maharisy mandrakizay. ²⁶ Manahaky gny vinaingisy eo aminigny nify dra setroky eo aminigny maso, dra va manahaky anizay koa gny malaiky amize magniraky anazy. ²⁷ Gny tahosy an'i Yaveh gny mahaela velo, fa gny taonigny panoa rasy dra ho bory. ²⁸ Gny fanatenanigny olo-mary gny fifalian'ereo, fa gny taonigny rasy fagnahy dra ho bory. ²⁹ Gny lalan'i Yaveh dra miaro ze mary, fa fandringana ho anigny rasy fagnahy zay. ³⁰ Gny olo mary sy ho rava mandrakizay, fa gny rasy fagnahy dra sy hitoby aminigny tany. ³¹ Boak'ao aminigny vavany gny olo mary gny iavianigny vokasy gny fahendrena, fa gny lela pavandy dra hofongory. ³² Gny moloso gny olo mary mahay ze mety, fa gny vavanigny rasy fagnahy, mahay ze fitaky aby.