¹ Ry zanako, tandremo gny zakako dra raketo ao agnatinao reo didiko. ² Tandremo gny didiko ba ho velo hanao dra tandremo manahaky gny anakandria maso gny fapenarako. ³ Fehezo eo amireo rasa-tagnanao reo; sorato eo aminigny vato pisaky gny fonao reo. ⁴ Zakao gny fahendrena ho: "Anabaviko hanao," dra atovy ho havanao akaiky gny fahazava- say, ⁵ ba hitandremanao gny vatanao amigny apela zanga, aminigny apela rasy fitondra-tegna mindray aminigny zakany malama. ⁶ Teo amigny vatrangarakeliny tragnoko dra nitaza tagny ivelany zaho. ⁷ Nitaza reo olo kely say zaho, dra voamariko tamireo tanora gny zatovo raiky sy nisy say. ⁸ Nandalo teo aminigny arabe agnilany kihon-dala zay tovolahy zay, dra nizosy nagnagny atragnony. ⁹ Somombisamby tamizay, taminigny andro hariva, sy taminigny fotoany hariva vo gny mezy. ¹⁰ Nisy apela niseza anazy, nekazo manahaky gny pivaro-tegna, tena fesy apo. ¹¹ Sady vavana izy gny midisy; sy mahazano ao atragno, boak'asena , dra an-dalam-be, dra egny azorotragno gny fa egny izy gny mandigny mamisaky. ¹³ Ko dra nisaviky anazy izy dra nagnoroky anazy, taminigny tarehy nisolasola gny nizakay taminazy ho: ¹⁴ "Nanao fagnati-pihavana zaho androany, nagnefa reo voadiko zaho, ¹⁵ Ko dra niboaky hisena anao zaho, ba hitalia fatrasy gny tarehinao, dra nahiya anao zaho. ¹⁶ Fa nanoby lamba fisafora, zamala fosy miloko boak'agny Egypta, teo aminigny fandriako zaho. ¹⁷ Fa nandraraky miora, havozo, dra kanely gny fandriko. ¹⁸ Avia, handeha sika hivoky fitia mandra-maray; handeha sika hangalaky fahafinareta aminigny fitiava. ¹⁹ Fa sy ao atragnony gny valiko; lasa nivahiny izy. ²⁰ Ninday kitapom-bola nindray taminazy izy; Hihery izy aminigny fotoany fenomana" ²¹ Taminigny zaka-be gny nitomany anazy; taminigny halamany gny sogniny gny namitahany anazy. ²² Nandeha nagnaraky anazy boak'ao afara tapoky manahaky gny agnomby andesy ho vono, manahaky gny diera voasambosy agnaty fandriky izy, ²³ mandra-pisatoky gny zana-sipiky eo aminigny atiny. Manahaky gny voro ze misoriaky ho eo aminigny fandriky. Sy fatany fa hahafaty gny ainy zay. ²⁴ Ko mitenoa anahy handrareo, ry zanadahiko; tandremo reo zakanigny vavako. ²⁵ Aoky sy hivily amireo lalany anie gny fondrareo; ka mive amireo lalan-disony. ²⁶ Nahalavo olo voatrobaky maro izy; maro dra maro reo niharanigny fahafatesa azony. ²⁷ Egny aminigny lala magnagny aminigny Fiaigna-sy hita gny tagnony; mizoso magnagny aminigny efitragno fandria mezinigny fahafatesa ereo.