¹ Ry zanako, raha nanoka gny volanao hatoka aminigny findramanigny namanao hanao, raha napanatena fampindramam-bola ho anigny olo sy fatasoo hanao, ² dra fa nanoby fandriky ho anigny vatanao hanao, dra fa voasingosy gny zaka naloaky gny vavanao. ³ Raha voasingosy gny zakanao hanao, ry zanako, dra atovy izao ka vozeo gny vatanao, akory fa lavo teo atagnanigny namanao hanao; mandehana ka manetre-tegna dra mengavia eo agnatrehanigny namanao. ⁴ Ka anga handry gny masonao dra ka anga rendreha gny holi-masonao. ⁵ Vozeo gny vatanao manahaky gny gazela egny an-tagnanigny pihaza, manahaky gny voron'eo an-tagnanigny pamandri-boro. ⁶ Atio gny vikisy, ry olo-malaiky, diniho gny fanaony dra hendre. ⁷ Sy mana komandy, pifehy, na panapaky izy, ⁸ Kanefa mamory sakafony aminigny fahavarasy dra mandrisy gny fararano gny hitehiriza ze hohaniny. ⁹ Mandra-kombia gny handrianoa, ry olo-malaiky? Ombia gny hifohazanao aminigny torimasonao? ¹⁰ "Torimaso kely, faharendreha kely, famoreta-tagna kely ba hiala sasasy"__ ¹¹ dra ho avo manahaky gny pangalasy gny miaramila mirongo felia. ¹² Gny olo-poa__gny olo rasy fagnahy__dra miay aminigny fahamelohanigny zakany, 13mipi-maso, magnome famataran'aminigny tambony dra manondro amireo rasa-tagnany. ¹⁴ Manao teti-drasy vo fitaky ao apony izy; magnesiky fifandira mandrakariva izy. ¹⁵ Noho zay dra hahatrasy anazy tapoky gny lozany; ao agnatinigny fotoa fohy dra ho potiky lavisy gny fahasitragna izy. ¹⁶ Misy raha enina halan'i Yaveh, fito ze mapangelakelaky Anazy. ¹⁷ Gny masonigny olo pirehareha, gny lela mavandy, gny tagna pandasa-dionigny olo sy mana-signy, gny fo mamoro sain-drasy, gny tamboky ze mailaky aminigny fiazakazaha hanao rasy, ¹⁹ gny vavolombelo ze mamoaky vandy dra mamafy fifandiran'eo aminy rahalahiny. ²⁰ Ry zanako, akatoavo gny didin-dranao dra ka mahafo gny fagnanaran-dreninao. ²¹ Fehezo ao aponao mandrakariva reo; fataro eo am-bozonao reo. ²² Raha mandeha hanao, dra hitari-dalan'anao reo; raha mandry hanao, dra hiambin'anao reo; dra raha mifoha hanao, dra hapianasy anao reo. ²³ Fa fanilo gny didy, dra fahazava gny fapenara; reo anasy ze avy aminigny fapenara gny lalanigny fiaigna. ²⁴ Miaro anao aminigny pela rasy fitondra-tegna zay. ²⁵ Aoky gny fonao sy hisiririsy gny hasoany dra ka anga hambabo anao aminigny volomasony izy. ²⁶ Gny findresa-mandry aminigny pizangazanga dra sandainao aminigny sombi-moso, fa gny valiny hafa dra sandainao aminigny ainao mihisy. ²⁷ Misy olo afaky minday afo eo atratrany ra dra sy magnoro gny akazony? ²⁸ Misy olo magnisaky bak-afo mahama ra dra sy hisovaky gny tambony? 29Manahaky anizay koa gny lelahy mindray mandry aminigny valinigny namany; ze mindray mandry aminazy dra sy ho afa-may. ³⁰ Sy hagnamavo gny pangalasy gny olo raha mangalasy ba hahafa-po gny filany gny fa resy izy. ³¹ Fa raha trasy koa izy, dra hanohisy ipito heny ze nangalariny; sy maisy mamoy gny raha sarobily gny fa ao atragnony izy. ³² Ze mizangazanga dra sy misy say; ze manao anizay dra manola gny vatany. ³³ Rasy vo hegnasy gny mendriky anazy dra sy ho voafafa gny fahafaham-barakany. ³⁴ Fa gny fahasarota-piaro gny mahaory gny lelahy; sy hapiseho famindra-po izy gny fa mamaly faty. ³⁵ Sy hagneky onisy izy dra sy ho voatamby, na dre amenao fagnomeza maro aza.