¹ Anigny olo gny fikasanigny fo, fa avy amin'i Yaveh gny vali-zaka avy aminigny lelany. ² Malio eo imasony avo gny lalanigny olon'aby, fa Yaveh gny mandaza gny fagnahy. ³ Akino amin'i Yaveh gny asanao dra ho lavorary ze kasanao. ⁴ Nataon'i Yaveh ho aminigny atony avokoa gny raha aby, na gny rasy aza dra ho aminigny andro-pahoria. ⁵ Yaveh makahala gny olon'aby ze mana fo miavognavo, azo atoky fa sy ho afa-may irery. ⁶ Aminigny sy fivadiha-pagneke vo fahamendreha-pitokisa gny hagnavota aminigny heloky dra aminigny tahosy an'i Yaveh gny helanigny olo aminigny rasy. ⁷ Gny fa akasitrahan'i Yaveh gny lalanigny olo raiky, na gny fahavalon'izay olo zay dra ataony mihavan'aminazy. ⁸ Aleo kely aminigny fahamarigna, manahaky anize vola be aminigny sy rariny. ⁹ Ao apony gny andrefanigny olo gny lalany, fa Yaveh gny mapizosy gny liany. ¹⁰ Fanapaha-kevisy laliky gny eo aminigny molosy gny pazaka, gny vavany dra sy ba hamadiky gny rariny. ¹¹ Boak'amin'i Yaveh gny fandaza mary; gny laza aby ao aminigny kitapo dra asany avokoa. ¹² Gny fa manao raha-rasy gny pazaka, dra tokony ho raha hatao sinosino zay, akory gny seza fiandriana dra miorin'aminigny fanova gny mary. ¹³ Finarisy aminigny moloso mizaka gny mary gny pazaka dra tiany gny olo ze mizaka mahisy. ¹⁴ Gny fahorianigny pazaka dra raiky gny fahafatesa fa gny olo-kendry dra hiezaky hapitony gny haoriany. ¹⁵ Ao aminigny fahazavanigny tavannigny pazaka gny fiegna dra gny fakasitrahany dra sahala aminigny raho ze minday ora-dohatao. ¹⁶ Endrey gny hasoanigny fahazoa fahendrena mihoasy lavisy noho gny volamena. Aleo mifily gny hahazo fahazava-say toy zay volafosy. ¹⁷ Gny lalam-benigny olo-mary dra miala aminigny rasy; ze miaro gny ainy dra miamby gny lalany. ¹⁸ Avy melohanigny faharava gny firehareha dra gny fagnahy mieboebo mialohanigny fahalavoa. ¹⁹ Soa vatany gny manetri-tegna eo amireo olo mahatra toy zay mizara ze nobaboy aminigny olo pirehareha. ²⁰ Ze mibazy ze napenary anereo dra hahita soa, dra reo ze matoky amin'i Yaveh dra ho voatahy. ²¹ Ze hendry apo gny atao anizahoky ho manasay dra gny hamaminigny zaka gny papivoasy gny faheza-mapianasy. ²² Gny fahazava-say dra loharanon'ay ho an'ize manan'anizay, fa gny fapenaranigny mola dra gny fahamolany. ²³ Gny olo-kendry magnome say gny vavany dra magnapy fandrese-dahasy gny moliny. ²⁴ Toho-tately gny zaka mahafinarisy__mamy aminigny fagnahy dra fagnasitragna ho anigny tola. ²⁵ Misy lala ze ho mary aminigny olo, fa gny fiafarany dra lala magnagny aminigny fahafatesa. ²⁶ Gny homanigny piasa gny miasa honazy; gny haresiany gny manosiky anazy. ²⁷ Gny olo sinosino dra mihaly sopasy dra gny zakany dra manahaky gny afo magnoro. ²⁸ Gny olo rasy fitondra-tegna manesiky aly dra gny pisiko mapisaraky gny pinama akaiky. ²⁹ Gny olo maherisetra dra mavandy aminigny namany dra mapivarin'anazy aminigny lala ze sy soa. ³⁰ Ze mipi-maso dra mitetiky raha rasy; reo ze manifa-sogny dra mapandalo gny rasy. ³¹ Gny volo-fosy dra satro-boninahisy; azo aminigny fiegna gny lala-mary zay. ³² Soa gny sy mora ory noho gny pialy dra gny olo manapaky gny fagnahiny dra mahery noho gny olo ze mambabo tana raiky. ³³ Gny filoka dra aria eo apofoa, fa gny fanapaha-kevisy dra avy amin'i Yaveh.