¹ Gny apela hendry mananga gny tragnony, fa gny apela mola mandrava anizay aminigny tagnany avo. ² Ze mandeha apahisia dra matahosy an'i Yaveh, fa ze sy marina aminigny lalany dra manao sinosino Anazy. ³ Aminy vavanigny mola gny hiavianigny simoky gny fireharehany, fa gny sognony gny hendry hiaro anereo. ⁴ Agny amize sy misy biby teza gny malio gny tavy fihinana, fa be gny vokasy mety ho avy aminigny tazaky gny agnomby. ⁵ Gny vavolombelo matohatoky dra sy mavandy, fa gny vavolombelo sandoky mamoaky vandy. ⁶ Mitalia fahendrena gny paneso fa sy mahita, fa ho avy mora foa amize mana-say gny fahalala. ⁷ Mela aminigny olo mola, fa sy hahita fahalala eo aminigny sogny hanao. ⁸ Gny fahendrena ho anigny olo marina dra gny mahatakasy gny lalany avo, fa gny fahamolan'ireo mola dra fitaky. ⁹ Maneso ireo mola aby voasoro gny fagnatisy nohon'ny heloky, fa voazara eo amin'ireo mahisy gny fakasitrahana. ¹⁰ Gny fo mahalala gny ngidiny dra sy misy vahiny mizara gny hafaliany. ¹¹ Ho torotoro gny tragnony olo rasy fagnahy fa handrombona gny lain'ny olo-mahisy. ¹² Misy lalana izay toa marina eo amigny olo, fa gny farany avo gny mitariky amigny fahafatesana. ¹³ Afaky mihomehy gny fo nefa manaitaina dra mety hiafara amigny alahelo gny hafaliana. ¹⁴ Izay sy matoky dra hahazo izay medriky gny lalany, fa gny olo soa hahazo izay anazy. ¹⁵ Izay bado dra mino gny raha aby, fa gny olo mailo koa mieriserisy ireo liany. ¹⁶ Matahosy gny olo hedry dra miala amigny rasy, fa gny mola koa manda fapitadremana amitoky. ¹⁷ Izay malaky Ory dra manao raha molamola, dra gny olo izay manao teti-drasy dra akahalaina. ¹⁸ Gny bado dra mandova fahadalana, fa gny olo-hedry koa ho satrohi-boninahisy amigny fahalalana. ¹⁹ Gny olo-rasy hiakohoky eo alohan'izay soa dra ireo izay rasy fagnahy hiakohoky eo amin'ireo vavahadin'ny olo-marina. ²⁰ Akahalaina gny olo-mahatra na dre ireo namany avo koa aza, fa gny olo mana-karena mana-namana maro. ²¹ Izay magnapotoro fagnamavoa gny namany dra manota, fa sambasy izay mapiseho fakasitrahana izay mapiseho fakasitrahana amigny mahatra. ²² Sy ireo izay manao teti-drasy se gny mandeha amigny hevi-diso? Fa ireo mikasa gny hanao gny soa dra hahazo fagneke matoky vo famedreham-pitokisa. ²³ Avy amigny asa fatrasy aby gny hiavian'ny tombony, fa gny zaka avo, dra mitariky ho amigny fahatrana izay. ²⁴ Satro-bpninahisy gny olo-hedry gny hareny, fa gny molan'ireo mola minday hamola fagnapiny anazy ireo avo. ²⁵ Gny vavolombelo marina magnavosy aina, fa gny vavolombelo sandoky magnaboaky vandy. ²⁶ Gny fa matahosy an'i Yaveh gny olo raiky, dra mana fahatokisa maro aminazy avo koa izy; reo raha reo dra hanahaky gny toera ferova hoa nize zanak'izay lelahy zay. ²⁷ Gny fahatahora an'i Yaveh dra loharano ay, ba hahafahanigny olo miala amireo fandriky gny fahafatesa. ²⁸ Hita aminigny hamaroa gny vahoakiny gny voninahiny gny pazaka, fa raha sy misy vahoaky dra rava gny andria. ²⁹ Gny olo mahary dra mana fahalala lahibe, fa gny olo malaky ory manandrasy fahadala. ³⁰ Gny fo milamy dra ay ho anigny vata, fa gny fialogna dra maha-lo gny tola. ³¹ Izy mapahory gny mahatra dra magnozo gny Pamoron'anazy, fa ze raiky maneho fakahasitraha aminigny fadiranovana dra magnome voninahisy anazy. ³² Gny olo rasy fagnahy dra ahetrin'ireo asa-rasiny, fa gny olo-marina dra hanapelofa na aminigny fahafatesan'aza. ³³ Gny fahendrena mitoetra ao aponigny mahalala, fa na dre eo amireo mola aza dra angany ho fatasy gny aminazy. ³⁴ Gny fanova ze mary dra manandrasy firenena, fa gny fahota dra fahafam-baraka ho anigny olon'aby. ³⁵ Gny fakasitrahanigny pazaka dra mindray aminigny panopo ze miasa apitandrema, fa gny fahatezerany dra ho anize miasa ami-pahamegnara.