¹ Na iza na iza tia fagnanara dra tia fahalala, fa gegy ze malaiky gny fanoroa. ² Yaveh dra magnome sitraky gny olo soa, fa magnahy olo ze manao teti-drasy Izy. ³ Gny olo dra sy ho tafatomby aminigny faharasia, fa gny olo-mary sy afaky hofongora. ⁴ Gny valy mendriky dra satro-boninahisy gny valiny, fa ze minday hegnasy dra manahaky gny arety ze maha-lo gny tolany. ⁵ Mahisy gny fikasanigny mary, fa mamitaky gny toro-hevisy gny rasy. ⁶ Gny zakanigny olo rasy fagnahy dra otriky mandigny vita hamonoa, fa gny zaka mahisy koa gny miaro anereo. ⁷ Gny olo rasy fagnahy fongory dra lasa ereo, fa gny tragnonigny olo-mary koa dra hizoro. ⁸ Dera aminigny habesany gny fahendrena anagnany gny olo, fa ze manao safidy rasy koa dra atao sinosino. ⁹ Soa kokoa gny mana toera sy manan-daza__panopo fosiny avo__noho gny mirehareha aminigny fahambonianao nefa sy mana-kohany. ¹⁰ Gny olo-mary dra miahy gny momba reo filanigny bibiny, fa na dre gny fangoraha-ponigny rasy fagnahy aza dra lozabe. ¹¹ Ze miasa gny taniny dra hana sakafo maro, fa na iza na iza magneziky reo tetikasa sy misy dikany dra sy misy say. ¹² Gny olo rasy fagnahy magniry ze nangalarinigny olo-rasy taminigny hafa, fa gny vokasy gny olo-mary koa dra boak'aminigny vatan'ereo avo. ¹³ Gny olon-drasy dra voafandriky gny zaka-rasiny, fa gny olo-mary koa dra mienga gny olo. ¹⁴ Boak'aminigny vokasy gny zakany gny maha-feno raha-soa gny olo, manahaky gny hamalianigny asanigny tagnany soa anazy avo. ¹⁵ Gny lalanigny mola dra marin'eo imasony avo, fa gny olo-kendry koa miteno torohevisy. ¹⁶ Gny mola dra mapiseho gny haoriany am-bolohany, fa ze sy miraharaha fanirasira koa gny marina. ¹⁷ Ze mizaka gny mary dra mizaka ze rariny, fa gny fizoroa vavolombelo diso koa mizaka vandy. ¹⁸ Gny zakanize mizaka akameha dra manahaky gny fanindrony gny mesa, fa mitondra fagnasitragna koa gny lalanigny hendry. ¹⁹ Gny sogny mary dra maharisy mandrakizay, fa gny lela pavandy koa ho aminigny fotoa bory avo. ²⁰ Misy fitaky ao apon'ireo ze manao teti-drasy, fa hafalia koa gny avy amireo panolo-say fedagna. ²¹ Sy misy arety avy aminigny olo-mary, fa gny olo rasy fagnahy koa feno olana. ²² Makahala gny moloso mavandy Yaveh, fa reo ze miay ami-pahatokia koa gny sitrany. ²³ Magnavony gny fahalalany gny olo hendry, fa gny fonigny mola koa mihiaky fahamola. ²⁴ Gny tagnanigny mazoto dra hanapaky, fa gny olo kamo koa alefa manao asa aterivozo. ²⁵ Gny fagnahia ao aponigny olo mapitanondriky anazy, fa gny raha soa koa maharavoravo anazy. ²⁶ Gny olo-mary dra pitari-lia ho anigny namany, fa gny lalanigny rasy fagnahy mitariky anereo aminigny lalan-diso ²⁷ Gny olo kamo dra sy hagnato gny hazan'ereo, fa gny olo mazoto koa hahazo harena sarobily. ²⁸ Reo ze mandeha aminigny lala-mary dra mahita fiegna vo sy misy fahafatesa gny lalan'izay.