¹ Miakasy hanohisy aniha gny hanorotoro aniha ho sainga maromaro. Mametraky piamby eo amin'gny fefin'gny tana, ambeno reo lala, atazaho gny vatandrareo, avosio reo tafikindrareo. ² Fa mapihery amin'gny laoniny gny voninahis'i Jakoba manahaky gny voninahis'Israely i Yaveh, ndre dra niravan'gny mpandroba aza ereo sady nipotahy reo sampam-boalobokiny. ³ Gny apingan'ireo lelahy mahery dra mena, vo reo lelahy be heri-po miakazo zaky; manzelasy gny metalin'ireo kalesy amin'gny andro dra fa nahy ho vono zay, vo gny lefa kypreso dra mihevaheva egny amin'gny rivosy. ⁴ Mirifasy eraky gny lala reo kalesy; mifagnaresaky etoky vo erihoky egny amin'gny lalam-be ereo. Mitovy amin'gny fagnilo ereo, dra milomay manahaky gny selasy. ⁵ Mitoka reo mana-pahefany gny hanorotoro aniha ho singa; mifaminga egny amin'gny lalany ereo; mandeha malaky ereo so hanafiky gny fefin'gny tany. Novono gny ferova lahibe so hiaro reo panafiky. ⁶ Reo vavahady eo amin'gny renirano dra notere sokafa, dra miroda ho amin'gny faharava gny lapa. ⁷ Nendahy gny akazon'i Hozaba dra nala; mitoloky manahaky gny voromailala sady miteha-tratra reo panopo apelany. ⁸ Manahaky gny ranom-parihy mitete i NInive, dra milefa manahaky gny rano mikoria gny vahoakiny. Gny hafa mihiaky ho: " Mizanogna, mizanogna," fe sy misy mitoliky. ⁹ Alao babo gny volafosy, alao babo gny volamena, fa sy hisy fiafarany zay, ho an'gny famirapiratr'ireo raha-sarobidin'i Ninive aby. ¹⁰ Foa sady ravarava i Ninive. Ory gny fon'gny olo aby, nindray valaketraky gny pokopoko gny olo aby, ao amin'gny olo aby gny fahoriam-be; hasatry aby gny tarehin'ero. ¹¹ Amizao eza gny lavaky gny liona, gny toer ze famahana gny liona tanora, gny toera fandehan'gny liona lahy vo vavy, mindray amin'ireo zanaky liona, zay natahoran'ereo ndre ino ndre ino? ¹² Mamotikipotiky reo hazany ho an'gny zanany gny liona; nagnakenda reo hazany ho an'gny liona vavy izy, sady nameno gny zohiny tamin'ireo haza, gny lavany amin'gny sisan-tolany voapotipotiky. ¹³ " Ingo, hanohisy aniha Zaho---zay gny fagnambaran'i Yaveh Tompon'gny maro. Horoako ao amin'gny setroky reo kalesiniha, sady handevo reo liona tanoraniha gny mesa. Ho fangoriko amin'gny taniniha reo baboniha, sady sy ho re sasy gny feon'ireo panday hafasiniha."