¹ Fagnapin'izay, dra mbo nizaka i Eliho ho: ² " Tenoy gny zakako, ry lelahy hendry; tenoy zaho, handrareo ze mana fahalala. ³ Fa gny sody dra mahare gny zaka manahaky gny hasapan'gny lela gny siron-kany. ⁴ Aoky sika hisafidy ze rariny ho asika: aoky sika samby hahita gny soa eo amisika. ⁵ Fa i Joba nizaka ho: 'Mary zaho, fa nalan'Agnahary gny zoko. ⁶ Ndre ino ndre ino zoko, dra rambesy ho pavandy zaho. Sy azo sitragny gny ratrako, ndre dra sy nanota aza zaho.' ⁷ Fa lelahy ino i Joba, ze mino gny fagnamavoa manahaky gny rano, ⁸ ze mandeha etoky vo erihoky mindray amin'ireo panao rasy, sady mindray lala amin'gny olo rasy fagnahy? ⁹ Fa nizaka izy ho: 'Sy hahazoan'gny olo tombony gny miravoravo amin'gny fanaova ze tian'Agnahary.' ¹⁰ Dra tenoy zaho, ry lelahy mana fahazavan-say: sagnatria amin'Agnahary ane gny hanao rasy; sagnatria amin'gny Tsitoha ane gny hanota. ¹¹ Akory mamaly gny asan'gny olo izy; ahiny tody amin'gny valisoan'gny lala nisafidiny gny olon'aby. ¹² Eka vatany, sy mbo manao rasy zagnahary, na hamaliky gny rariny mandrakizay gny Tsitoha. ¹³ Ia gny napiandraikisy anazy gny tany? Ia gny nametraky gny tany raiky manotolo teo ambaniny? ¹⁴ No izy avo gny hifatohan'gny vatany, sady no mihery mamory gny fagnahiny vo gny fofofnainy aminazy avo izy, ¹⁵ dra hindray ho botany gny olombelo. ¹⁶ No mana fahazavan-say hanao amizao, dra tenoy zao; tenoy gny feon'gny zakako. ¹⁷ Afaky gny handay ra gny olo raiky ze malay gny rariny? Ho helohiniha ra Zagnahary, zay mary sady mahery? ¹⁸ Zagnahary, ze mizaka amin'gny pazaka ho: ' Mapadikidiky hanao,' na koa mizaka amin'ireo manan-kaza ho: 'rasy fagnahy handrareo'? ¹⁹ Zagnahary, ze sy miangasy amin'ireo panday sady sy magnome lanza reo pangarivo mihoasy reo mahantra, akory azan'gny tagnany aby ereo. ²⁰ Ao agnatin'gny fotoa fohy ereo dra ho faty; amin'gny sasak'aly dra ho voahozongozo gny olo dra ho faty; ho ala avo koa gny olo mahery, fe sy amin'gny tagnan'olombelo. ²¹ Fa gny mason'Agnahary dra eo amin'gny lalan'gny olo; hitany aby reo dinga ahiny. ²² Sy misy ezy, na ezim-pito hivonian'ireo panao gny sy rariny. ²³ Fa sy mila mandiniky gny olo sasy Zagnahary; sy misy antony handehanan'gny olo ho saray eo agnatrehany. ²⁴ Potipotehiny reo lelahy mahery nohon'gny lalan'ereo ze sy hila fanadihadiha sasy; hapetrany amin'gny toerany aby gny hafa. ²⁵ Vo zeho gny hahafatarany gny asan'ereo; amin'gny hariva gny handravany riho olo riho; ripaky ereo. ²⁶ Eo amason'gny hafa, bono manahaky gny malaso ereo nohon'gny asa rasy vitany ²⁷ akory nivaliky sy nagnaraky Anazy ereo sady sy nety nagneky ndre raiky aza tamin'gny lalany. ²⁸ Tamin'izeho, dra nahin'ereo avy teo amin'gny tomagnin'ereo mahantra; dra reny gny tomagnin'ireo olo napahoria. ²⁹ Nofa mangiky Izy, ia gny afaky hagnameloky Anazy? No havoniny gny tarehiny, ia gny hahita Anazy? Mitovy gny fanapahany gny firene vo gny kiraikiraiky, ³⁰ So sy ho afaky hanapaky gny olo pagnarasy, so sy hisy ndre raiky aza hamandriky gny olo. ³¹ No ahy ho misy olo raiky mizaka amin'Agnahary ho: 'Meloky vatany zaho, fa sy hanota sasy; ³² apianaro anahy gny raha sy mety hitako; nanota zaho, fa sy hapihery anizehi sasy.' ³³ Dra mihevisy ra hanao fa ho sazin'Agnahary nohon'gny otan'izeho olo zeho, akory sy tianiha gny ahin'Agnahary? Aoky hanao gny hisafidy, fa sy zaho. Dra zakao gny fataniha. ³⁴ Gny olo mana fahazavan-say dra hizaka aminahy ho--- eka vatany, ze lelahy hendry aby mahare anahy dra hizaka ho: ³⁵ 'Mizaka sy am-pahalala i JOba; sy misy fahendre gny zakany.' ³⁶ No ma nisaray tamin'gny ansipirihiny keliky loasy tamin'gny tranga nahazo anazy moa i Joba nohon'gny firesany manahaky gny olo rasy fagnahy. ³⁷ Fa apiany fikomia gny fahotany; miteha-tagna am-pagnesoa eo agnivosika izy; mamory zaka agnohera an'Agnahary izy."