¹ Ingo, gny masoko fa nahita anizay iaby zay; gny sofiko fa nahare ka nahatakasy anizay. ² Ze fatandrareo, dra fatako avo koa; sy ambanindrareo zaho. ³ Kanefa, aleoko miresaky amin'gny Tsitoha; magniry gny hifandahasy amin'Agnahary zaho. ⁴ Fa fosiandrareo amin'gny vandy gny mary; pisabo sy misy lanzany aby andrareo. ⁵ Eh, tano ho andrareo gny fisignandrareo! Ho fahendrendrareo zay. ⁶ Amizao tenoy gny fandaharako; tenoy gny fiangavian'gny molosiko. ⁷ Hizaka amin'gny sy fahamarigna ho an'Agnahary se handrareo, vo moa hizaka amim-pitaky ho Anazy? ⁸ Tena hanoro hasara-pagnahy aminazy se handrareo? Hialy agny am-pisara vatany se handrareo mbo ho vavolombelon'Agnahary? ⁹ Mety amindrareo vatany se no mitalia andrareo Izy? Afaky gny hamitaky Anazy manahaky gny mety ho famitahandrareo olo se handrareo? ¹⁰ Hananasy andrareo vatany Izy no napiseho fiangara mivony handrareo. ¹¹ Sy hapitahosy andrareo se gny voninahisy? Sy halavo amindrareo se gny fahatahora Anazy? ¹² Gny zaka fahasiarovandrareo dra ohabola vita amin'gny lavenoky; vo gny zaka fiarovandrareo dra fiarova vita amin'gny tanimanga. ¹³ Tano agny gny fisignandrareo, engao raiky zaho, mbo hahafahako mizaka, aoky hoa avy aminahy ze ho avy. ¹⁴ Gny nifiko avo gny hagnombotao gny nofoko; vo rambesiko ho eo an-tagnako gny aiko. ¹⁵ Ingo, no mamono anahy Izy, dra ho foa gny fagnatenako; fa ndre zay aza, dra hiaro gny lalako eo agnatrehany zaho. ¹⁶ Zao gny ho anton'gny fiala-signiko, mbo sy handehanako eo agnatrehany manahaky gny olo pagnarasy. ¹⁷ Zagnahary o, tenoy soa gny zaka alahasiko; aoky gny fagnambarako ho avy eo an-sofinao. ¹⁸ Ingo amizao, fa nalahasiko soa gny fiarovan-tegnako; fatako fa sy manan-signy zaho. ¹⁹ Ia gny raiky ze hialy aminahy eo amin'gny fisara? No avy hanao anizay Hanao, ka no voaporofo fa diso zaho, dra higy zaho ka hahafo gny aiko. ²⁰ Zagnahary o, raha ro avo gny ahivo aminahy, dra sy hagnavony gny vatako amin'gny tarehinao zaho: ²¹ alao aminahy gny tagna-mampahorinao, vo ka enga hapatahosy anahy gny fapihorohoroanao. ²² Tokavo zaho, dra hamaly zaho; na mamela anahy hizaka aminao, dra hamaly anahy Hanao. ²³ Firy gny hadisoako vo gny fahotako? Apahafataro anahy gny heloko vo gny fahotako. ²⁴ Nagnino HAno gny magnavony gny tarehinao aminahy ka manday anahy manahaky gny fahavalonao? ²⁵ Hagnitriky ravi-kazo nandesin'gny sioky se Hanao? Hagnitriky mololo maiky se Hanao? ²⁶ Fa manorasy raha-mafaisy hanohisy anahy Hanao; hapandovanao anahy gny heloky gny fahatanorako. ²⁷ Ahinao ao agnaty gadra vy avo koa gny tomboko; atihonao mariny gny lalako aby; dinihinao avo koa gny tany ze nihisahin'gny faladian-tomboko ²⁸ ndre dra manahaky gny raha lo ze mihalevo aza zaho, manahaky gny akazo lanin'gny kalalao.