¹ Rokaky gny miay zaho; haneho malalaky gny fitarainako zaho; hiresaky amin'gny hafaisin'gny fagnahiko zaho. ² Hizak amin'Agnahary zaho ho:' Ka magnameloky anahy avo; asehoy anahy gny antony hiapanganao anahy. ³ Mety aminao se gny mapahory anahy, gny manao sinosino gny asan'gny tagnanao eo am-pihomehia amin'ireo tetiky gny rasy fagnahy? ⁴ Mana maso-nofo se Hanao? Mahita sahala gny fahitan'gny olo se Hanao? ⁵ Moa reo andronao se sahala gny andron'gny olombelo na gny tanao manahaky reo taon'gny olo, ⁶ gny karohinao gny heloko dra hezehinao gny fahotako, ⁷ ndre dra fatanao aza fa sy meloky zaho sady sy misy olo afaky hagnavosy anahy eo apelatagnanao? ⁸ Gny tagnanao gny mamolavola vo magnamboasy anahy aby, fe tonohinao avo zaho. ⁹ Sarovy, mangataky aminao zaho, fa mamolavola anahy manahaky gny tanimanga Hanao; dra ho ahehinao ho botany ndraiky se zaho? ¹⁰ Moa sy fa nandraraky anahy manahaky gny ronono sady napandry anahy manahaky fromazy se hanao? ¹¹ Napisikininao tamin'gny holisy vo nofo zaho vo napiresinao tamin'gny tola vo ozasy. ¹² Nomenao fiaina vo faneke mahatoky zaho; niamby gny fagnahiko gny fiahianao. ¹³ Fe reo raha ze navoninao tao am-ponao---dra fatako fa zao gny nieritreretinao: ¹⁴ no manota zaho, dra ho talakinao zay; sy hanafaky anahy amin'gny heloko Hanao. ¹⁵ No rasy fagnahy zaho, dra loza ho anahy; ndre dra mary aza zaho, dra sy afaky hanondrosy gny lohako, akory feno fahamegnara zaho vo magnety gny fizaliako manoka. ¹⁶ No miandrandra gny lohako, dra hihaza anahy manahaky gny liona hanao; mapiseho gny vatanao ho mahery aminahy ndraiky Hanao. ¹⁷ Manday vavolombelo vaovao manohisy anahy Hanao vo mapitombo gny hahorianao aminahy; manafiky anahy amin'gny tafiky vaovao Hanao. ¹⁸ Nagnino se,gny naboakinao boaky tao am-bohoky zaho? Naleoko nanolosy gny fagnahiko dra sy mbo nisy maso nahita anahy. ¹⁹ Ho manahaky gny sy nisy ndre ombia ndre ombia zaho; ho nandesy boaky tao am-bohoky nagnan-dolo zaho. ²⁰ SY keliky avo se gny androko? Koa soa zay se, engao ho raiky zaho, mbp hialao havozaha heky ²¹ mialohan'gny hialako eo amin'gny sy hiheregnako, magnagny amin'gny tanin'gny ezy vo aloky gny fahafatesa, ²² gny tany ze mezy manahaky gny sasak'aly, gny tanin'gny aloky gny fahafatesa, sy misy filamigna, zay manahaky gny sasak'aly gny hazava."'