¹ Dra vita gny lagnisy vo gny tany, vo gny raha-managn'ay aby ze mameno anazy. ² Taminy andro fahafito Zagnahary dra fa hamara gny asany ze nataony, ka noho zay dra nisahasy taminigny asany aby Izy taminigny andro fahafito. ³ Notahin'Agnahary gny andro fahafito dra nanamasy zay, satria taminigny nizanognany tamy asa aby ze nataony taminigny famoronany. ⁴ Tahoky gny tranga mahakasiky gny lagnisy vo gny tany, raha nitezany zay, taminigny andro ze namorognan'i Yaveh Zagnahary gny tany vo lagnisy. ⁵ Sy mbo nisy gny kirihitriny saha tegny atanimboly, satria Yaveh Zagnahary sy mbo nandasaky ora taminigny tany, dra sy nisy olo niasa tany. ⁶ Fa nisy zavora gny tagny aby. ⁷ Namolavola gny olo aby taminigny botany i Yaveh Zagnahary, dra nofofoiny taminigny fofogn'ainy fahavelomana gny vavorony, ka avy olombelo. ⁸ Yaveh Zagnahary nagnaboasy saha tao asignana, tao Edena, dra napetrany tao gny olo ze nivolavolany. ⁹ Tagnabonigny tany gny nampagnirin'i Yaveh Zagnahary gny hazo aby ze hita fa mahafinarisy gny maso sady soa ho amy sakafo. Anisany gny hazon'aina ze teo agnevony saha, vo gny hazo gny fahalala gny soa vo gny rasy. ¹⁰ Nisy ony niboaly avy ao Edena nagnondriky gny saha. Nilomay laha tagny zay dra avy ony efasy. ¹¹ Pisona gny agnaranigny vahalohany. Izy raiky avo gny mikoria magnodidy gny tany aby i Havila, zay misy volamena. ¹² Soa gny volamena zay tany zay. Misy bedola vo vato berila avo koa. ¹³ Gihona gny agnarany gny ony faharo. Izy io dra miroro magnera gny tany Kosy. ¹⁴ Gny agnaranigny ony fahatelo dra Tigra, ze mikororoly asignanan'i Asyria. Eofrata gny ony faha-efasy. ¹⁵ Nalan'i Yaveh Zagnahary ralahiny dra nametrraky anazy tao amy saha Edena ba hiasa vo hihazo anizay. ¹⁶ Nandidy an-dralelahy Yaveh Zagnahary, nanao ho:''Avy amy hazo aby agny aminigny saha dra tanonao hihina. ¹⁷ Fa avy aminigny hazo gny fahalala gny soa vo gny rasy koa gny sy azonao hihina, fa amy andro hihinananao avy aminizay, dra ho maty vatany ianao.'' ¹⁸ Avy eo Yaveh Zagnahary nizaka ho: ''Sy soa gny raiky avo gny lelahy. Hagnamboarako nama tadrify anazy izy.'' ¹⁹ Avy amigny tany gny nagnamboaran'i Yaveh Zagnahary gny bibin'ny saka aby vo gny voron'ny habakabaky aby. Dra nandesiny teo amidralehilahy izy aby ba hahitany izay mety hitokavany anazy. Na ino na ino nitokava-dralehilahy gny rahamana ay kiraikiraiky, dra izay gny agnarany. ²⁰ Name-dralehilahy agnaran'aby gny biby fiopy, gny voro-mitily rehetra egny amigny habakabaky, dra gny bibidian'ny saka. Nefa sy nahita nama tadrify anazy ralehilahy. ²¹ Napadren'iYaveh Zagnahary liliky ralehilahy, dra nadry ralehilahy. Nangalaky raiky tamigny tala-tehezany i Yaveh Zagnahary dra nadridry gny nofo izay nangalany tola-tehezana. ²² Tamigny tala-teheza izay nalan'i Yaveh Zagnahary tami-dralehilahy, gny nagnamboarany apela raiky vo nandesany anazy teo ami-dralehilahy. ²³ Hoy ralehilahy ho: ''Izao koa, dra tola avy amigny talako tiky, dra nofo avy amigny nofoko. Hotokavy ho: ''Apela izy, satria nala avy tamigny lelahy.'' ²⁴ Noho izay nagnenga gny babany vo gny reniny gny lelahy, hikamba amigny valiny izy, dra ho hihery nofo draiky ereo. ²⁵ Samy nita ereo, ralehilahy vo gny valiny, fa sy nahalala megnasy.