¹ Tandremo gny fitondran-tegnanao no fa magnagny an-tragnon'Agnahary hanao. Mandehana agny mbo hiteno. Gny miteno dra soa noho gny mola manolosy soro fe sy mahay fa rasy gny ahin'ereo eo amin'gny fiaigna. ² Ka malaky loasy mizaka amin'gny vavanao, dra aoky gny fona sy halaky eo agnoloan'Agnahary. Agny an-danisy Zagnahary, fa hanao en-tany etiky, koa aoky ho masaiky reo zakanao. ³ No be loasy gny raha ahinao vo mapiahiahy anao, dra hanofy rasy vatany hanao. Gny hamaron'ireo zakano, gny hamaro gny fahadala mety ho zakainao. ⁴ No fa mivoady amin'Agnahary hanao, dra ka milegnalegna amin'gny fanaova anizay, fa sy ton'Agnahary reo mola. Ahivo ze nanaovanao voady fa ho ahinao. ⁵ Aleo sy mivoasy toy zay moavy ze sy tateraky akory. ⁶ KA enga hapagnota gny nofonao gny vavanao. Ka mizaka amin'gny iraky gny pisoro ho: " Fahadisoa igny voady igny." Nagnino gny mapahory an'Agnahary amin'gny fanaova voady sy izy, mihansy an'Agnahary hanimba gny asan'gny tagnanao? ⁷ Fa oa amin'gny nofy maro, manahaky gny ao amin'gny zaka maro, dra misy ento sy misy dikany. Ka matahora an'Agnahary. ⁸ No hitanao apahoria vo robay amin'gny fitondra mary vo mahisy ao amin'gny faritaninao gny mahatra, dra ka gaga no sy misy olo mahay, akory misy olo mahery zay miamby ireo eo ambany fahefan'ereo, vo misy olo ambony loasy aza manapaky andreo. ⁹ Fagnapin'izay, an'gny olon'aby gny vokasy gny tany, vo gny pazaka mihisy gny mangalaky gny vokasy amin'ireo saha. ¹⁰ Gny olon'aby ze tia volafosy dra sy ho afa-po amin'gny volafosy, vo gny olo aby ze tia harena dra mitalia mihoasy lalandava. Zay, avo koa, dra ento. ¹¹ MAnahaky gny hitomboan'gny fanambigna, dra manahaky anizay avo koa gny olo ze mihina anizay. Ino gny tombon-soa an'gny tompony amin'gny harena laha-sy gny magnety amin'gny masony? ¹² Mamy gny torimason'gny olo miasa, na mihina keliky na maro izy, fa gny haren'gny olo pagnarivo dra sy manenga anazy hatory soa. ¹³ Misy rasy mahory ze fa hitako tetiy ambany masoandro: dra harena avorin'gny tompony, fa mifara amin'gny fahoriany avo. ¹⁴ No very amin'gny vitan-drasy gny haren'gny olo pagnarivo, gny zanadahiny, gny naterany, dra tavela sy mana ndre ino ndre ino eo an-tagnany. ¹⁵ MAnahaky gny olo teraky sy nisiky boakao an-trokin-dreniny, dra sy miaiky manahaky anizay avo koa gny hiakany amin'itiky fiaigna tiky. Sy afaky handay ndre ino ndre ino egny an-tagnany boakamin'gny asany izy. ¹⁶ Gny rasy mahory hafa dra manahaky gny olo avy vatany, koa manahaky anizay koa gny sy mainsy handehanany. Koa ino gny tombony azon'gny olo amin'gny fiasa ho an'gny sioky? ¹⁷ MAndrisy gny androny dra mihina amin'gny ezy izy vo ory fatrasy amin'gny arety vo hahoria. ¹⁸ Ingo, ze fa hitako ho soa sady mety dra mihina vo mino vo mankafy gny tombony amin'gny asasika aby, no miasa ambanin'gny masoandro mandrisy tiky androm-piaigna ze fa nomen'Agnahary asika tiky. FA zay gny anzaran'gny olo. ¹⁹ Gny olo ze nomen'Agnahary fanagana vo harena vo fahaiza mbo handramby gny anzarany ka hifaly amin'gny asany---fagnomeza boakamin'Agnahary zay. ²⁰ FA sy mahasiaro matetiky reo androm-piainany izy, akory ahin'Agnahary rokaky amin'ireo raha zay tiany ahy.