¹ Tahoky gny zakan'gny Mpitoriteny, gny taranak'i Davida vo pazakan'i Jerosalema. ² Gny Mpitoriteny mizaka zao." Manahaky gny enton'gny zavo, manahaky gny sio-drivosy, gny fanzavonan'gny raha aby, manenga fagnotania maro. ³ Ino gny tombon-soa azon'gny olombelo boak'amin'gny asa aby ze nirokafany teo ambany masoandro? ⁴ Gny taranaky raiky lasa, vo gny taranaky raiky hafa avy, kanefa gny tany mitoesy mandrakizay. ⁵ Miposaky gny masoandro, vo miletiky zay vo meky hihery agny amin'gny toera ze hiposahany ndraiky. ⁶ Misioky magnasimo gny sioky dra manao faribola mihodiky magnagny avarasy, mandeha mihodiky amin'gny lala hatragny vo mihery ndraiky. ⁷ Reo ony aby mikoria an-dranomasy agny, fa gny ranomasy sy mbo mety feno. Agny amin'izay toera handehan'ireo ony, gny handehanan'izay ndraiky. ⁸ Nazary mandrokaky gny raha aby, dra sy misy afaky magnazava zay.Gny maso sy afa-po amin'ize hitany, na gny sofy tateraky amin'ize reny. ⁹ Ze iaby fa teo dra mbo ho eo, vo ze iaby fa vita gny mbo ho ahy. Sy misy raha vaovao ambany masoandro etiky. ¹⁰ Moa se misy raha zay mety ho zakay ho: 'Ingo, raha vaovao tiky'? Ze iaby misy dra nisy hatramin'gny fotoa ela, nandris'ireo tao ze avy ela talohasika. ¹¹ Sahala sy misy hita mahatadidy reo raha ze niseho tamin'gny fotoa fa ela, vo reo raha ze niseho vo sy elavo reo ze mbo hiseho amin'gny ho avy dra sy ho tadidy koa." ¹² Zaho gny Mpitoriteny, sady fa pazaka teo amin'Israely tagny Jerosalema. ¹³ Napiasa gny saiko zaho mbo hianasy sady hitalia am-pahendre gny raha aby ze nahy teo ambanin'gny lagnisy. Zay fitaliava zay dra asa mavesasy ze nomen'Agnahary an'ireo zanak'olombelo mbo hirokafa. ¹⁴ Fa hitako aby gny asa aby ze nahy teo ambany masoandro, vo ingo, izy aby reo dra ento mihavosa vo fikasa gny hanohisy gny rivosy. ¹⁵ Gny meloky dra sy mety hahisy! Gny sy avy sy azo isay! ¹⁶ Nizaka tamin'gny foko zaho nanao ho:" Ingo, zaho dra nahazo fanhendre lahibe noho reo iaby ze talohako tagny Jerosalema. Gny saiko dra nahita fahendre vo fahalala lahibe." ¹⁷ Koa napiasa gny foko zaho mbo hahalala fahendre vo fahaverezan-say vo hadala avo koa. Avy zaho mbp hahatakasy fa fikasa gny hanohisy gny rivosy avo koa zay. ¹⁸ Fa amin'gny fitobahan'gny fahendre gny mapisy fahoria be, vo ze mapitombo fahalala dra mapitombo alahelo.