¹ Ho zaho am-po ho: "Magnatogna zao, hisapa anao amin'gny hafalia zaho. Ka tiava fahafinareta." ² Fa ingo, sio-drivosy mandalo avo zay. Ho zaho tamin'gny fihomeza ho: " Fahadala zay," vo tamin'gny fahafinareta ho: " Ino gny ila anizay?" ³ Nagnety gny tao am-poko zaho ho akory gny hahitako fahafinareta amin'gny divay. Engako tarihin'gny saiko amin'gny fahendre zaho ndre dra mbo voata tamin'gny hadala avo aza zaho. Te hahita ze soa ho an'gny olo mbo hahy etiky ambanin'gny lagnisy zaho mandris'ireo andro hiainany. ⁴ Nagnatateraky raha lahibe zaho.Nananga tragno ho anahy zaho dra namboly teo amin'ireo tanim-boaloboky. ⁵ Nananga zaridaina vo saha ho an'gny vatako zaho; namboly reo karazan-kazo aby fihinam-bihy teo amin'izay zaho. ⁶ Namoro farihin-drano mbo hamasia rano reo ala ze nitomboan'ireo hazo zaho. ⁷ Novliko reo andevo lahy vo reo andevo apela; nana andevo teraky tao an-dapako zao. Nana agnomby maro vo agnondry vo aosy ho biby fiteza avo koa zaho, maro mihoasy noho gny an'ireo pazaka ze nanapaky teo alohako tao Jerosalema. ⁸ Namory volafosy vo volamena, gny haren'ireo pazaka vo reo faritany ho an'gny vatako avo koa zaho. Nana piansa lelahy vo apela ho an'gny vatako manoka zaho---reo fahafinaretan'gny zanak'olombelo---vo valy masay maro. ⁹ Dra nazary lahibe vo pagnarivo mihoasy noho reo aby ze talohako tao Jerosalema zaho, vo gny fahendreko nitoesy taminahy. ¹⁰ Ndre ino ndre ino nirin'gny masoko, dra sy nitanako tamin'ireo. Sy nita gny foko tamin'gny fahafinareta aby zaho, akory gny fooko dra nifaly tamin'gny asako aby vo gny fahafinareta gny valisoako tamin'gny asako aby. ¹¹ Dra nagnety reo asa aby vitan'gny tagnako zaho, vo reo firokafa ze nahiko, fa gny raha aby dra ento vo fikasa hanohisy gny sioky ndraiky. Sy hisy tombon-soa tamin'ze tetiky ambanin'gny masoandro. ¹² Boakeo dra nitoliky zaho mbo hihevisy gny fahendre,vo koa gny fahaverezan-say vo gny fahadala. Fa ino gny azon'gny pazaka ho avy handimby gny pazaka ahy,zay sy mbo tateraky? ¹³ Dra nanomboky nihanazava gny saiko fa gny fahendre dra ahazoa tombony loasy noho gny fahadala, manahaky gny fahazava soa loasy noho gny ezy. ¹⁴ Gny olon-kendry dra mapiasa gny masony eo amin'gny lohany mbo hagnitia gny lala andehana, fa gny mola ddra mandeha amin'gny ezy, ndre dra fatako aza fa lahatry mitovy avo gny ho an'gny olo aby. ¹⁵ Dra ho zaho tam-poko tao ho: "Ze mahazo gny mola , dra hahazo anahy avo koa. Ka ino gny maha-sambihafa anizay no vatany hendry zaho?" Dra nifeheziko tam-poko tao ho: " Tiky koa dra ento avo." ¹⁶ Fa gny olon-kendry, manahaky gny mola, dra sy saroy ela akory. Ho avy gny andro zay hagnalignoa gny raha aby. Gny olon-kendry dra maty manahaky gny mahafaty gny mola. ¹⁷ Ka dra nakalay gny fiaigna zaho akory reo asa aby ze vita teo ambany masoandro dra rasy taminahy. Zay dra akory gny raha aby dra ento vo fikasa hanohisy gny sioky. ¹⁸ Halako aby reo fikasako aby ze niasako tegny ambany masoandro akory dra sy mainsy manenga regny afara agny ho an'ze lelahy ho avy magnaraky anahy zaho. ¹⁹ Fa ia gny mahay na ho olon-kendry izy na ho mola? Nefa izy dra ho tompo eran'gny raha aby ambany masoandro zay nasangan'gny firokafako vo fahendreko. Ento avi koa zay. ²⁰ Noho zay dra nanomboky namoy fo tamin'ireo asa aby ze nahiko teo ambany masoandro zaho. ²¹ Fa mety misy olo ze misasasy amin'gny fahendre, amin'gny fahalala, vo amin'gny fahaiza-manao, fa hengany ho an'gny lelahy ze sy nanao ndre raiky tamin'ireo aza gny raha aby hanagnany. Zay koa dra ento vo loza lahibe. ²² Fa ino gny tombon-soa azon'gny olo ze miasa fatrasy vo miezaky manao amin'gny fony reo asany eo ambany masoandro? ²³ Isan;andro dra maharary sady mapialy say gny asany, ka dra sy mahita fisahara gny fagnahiny amin'gny hariva. Zay koa dra ento. ²⁴ Sy misy raha soa amin'gny olo mihoasin'gny ho mihina vo mino avo vo afa-po amin'ze soa amin'gny asany. Dra nahita zaho fa avy amin'gny tagnan'Agnahary zay mary zay. ²⁵ Fa ia gny afaky hihina na ia gny afaky hana fahafinareta isan-karazaky ankoasy gny bokamin'Agnahary? ²⁶ Fa ze sy mahafaly Anazy, dra homen'Agnahry fahendre vo fahalala vo fifalia. Kanefa, gny panota dra omeny gny asa famoria vo fitahiriza mbo hahafahany magnome anizay ho an'gny olo ze mahafaly an'Agnahary. Zay koa dra isan'gny ento vo fikasa hanohisy gny sioky.