¹ Dra hoy Solomona ho: "Nambaran'i Yaveh fa hitoetra ao agnaty ezi-poto izy, ² kanefa fa nagnory tragno soa tarehy ho anao zaho, dra toera hisy anao mandrakizay." ³ Dra nihody gny pazaka dra niso-drano gny fengonan'Israely aby, raha bo teo apisangana gny fiangonan'Israely aby. ⁴ Hoy izy ho: "Ho dera anie Yaveh, gny zagnaharin'Israely, ze nizaka tamin'i Davida babako, dra nahatateraky anizay tamigny tagnany avo, nanao anizahoky ho: ⁵ 'Hatramigny andro nindesako gny vahoako niboaky boak'ao amigny tana Egypta, dra sy nifily tana teo amigny fokon'Israely aby ba hagnoregna tragno zaho, ba hitoeranigny agnarako ao. Dra sy ba nifily olo ho andrianday eo amin'Israely oloko zaho. ⁶ Kanefa, nifily an'i Jerosalema zaho, ba hitoeranigny agnarako ao, dra nifily an'i Davida zaho ba hanapaky eo amin'Israely oloko.' ⁷ Dra tao apon'i Davida babako gny hagnory tragno ho anigny agnaran'i Yaveh, gny Zagnaharin'Israely. ⁸ Fa hoy Yaveh tamin'i Davida babako ho: 'Fa nataonao tao aponao gny hagnory tragno ho anigny agnarako, dra soa gny nanovanao zay tao aponao. ⁹ Na izay aza, dra aoky sy hagnory gny tragno hanao; fa koa, gny zanadahinao, ze ho teraky boak'amigny voanao, gny hagnory gny tragno ho anigny agnarako.' ¹⁰ Nitaterahin'i Yaveh gny zaka ze fa nizakany, akory nisanga handimby gny toeran'i Davida babako zaho, dra mipetraky eo amigny seza fiandrianan'Israely, araky gny napanatenan'i Yaveh. Naoriko ho anigny agnaran'i Yaveh, gny Zagnaharin'Israely gny tragno. ¹¹ Napetrako tao gny fiara, ze misy gny fagneken'i Yaveh, ze nataony tamigny vahoakin'Israely." ¹² Nizoro teo anoloanigny alitaran'i Yaveh i Solomona teo amigny fagnatrehanigny fengonan'Israely aby, dra namelasy gny tagnany. ¹³ Fa namboasy sehasy varahy izy, ze dimy hakiho gny halavany, dimy hakiho gny velarany, dra telo hakiho gny hahabony. Napetrany teo agnevonigny kiaza izay. Nizoro teo ambonin'izay izy dra nandohaly teo agnabon'izay izy dra nandohaliky teo agnatrehanigny fengonan'Israely aby, dra boak'eo namelasy gny tagnany nangagny amigny lagnisy izy. ¹⁴ Hoy izy ho: "Ry Yaveh, Zagnaharin'Israely, sy misy zagnahary manahaky anao na agny an-dagnisy na eto atany, ze mita fagneke vo fitiava sy mivaliky amireo panoponao ze mandeha eo agnatrehanao amigny fony manotolo; ¹⁵ Hanao ze fa nita ze napanatenanao tamin'i Davida babako panoponao. Egny, nizaka tamigny vavanao hananao dra nitaterahinao tamigny tagnanao zay, hatramigny androny. ¹⁶ Amizao dra, ry Yaveh, Zagnaharin'Israely, tateraho ze napanatenanao tamin'i Davida babako panoponao, gny fa nizaka hanoa ho: 'Sy ho foa aminao gny hana olo hipetraky aminao gny eo amigny seza fiandrian'Israely eo amasoko, raha toa ka mitandry gny handeha amigny lalako gny taranakao, manahaky gny nandehananao teo agnatrehako.' ¹⁷ Amizao dra, ry Zagnaharin'Israely, mivavaky zaho ba ho tateraky gny fapanatena nataonao tamin'i Davida panoponao. ¹⁸ Fa tena hitoby atany etiky miaraky amigny zanak'olombelo vatany ra Zagnahary? Ingo, izao totoloizao vo gny lagnisy aza sy atognony anao__maiky fa ty tepoly ze naoriko tihoky! ¹⁹ Kanefa ba tenoy re ty vavaky gny panoponao vo gny fangatahany tihoky, ry Yaveh Zagnaharinao; ba tenoy gny taloha vo gny vavaky ataonigny panoponao eto agnatrehanao. ²⁰ Enga anie dra hisokaky amity tepoly tihoky andro aman'aly gny masonao, dra gny toera ze napanatenanao hametraha gny agnaranao. Hiteno gny vavaky ataonigny panoponao magnatriky ty toera tihoky anie hanao. ²¹ Ko tenoy gny fangatahanigny panoponao vo gny Israely olonao gny fa mivavaky magnatriky ty toera tihoky zahay. E, mitenoa boak'agny amigny toera honegnanao, boak'agny an-dagnisy; dra gny fa miteno hanao, dra mamela. ²² Raha manota amigny namany gny olo raiky hafa dra sy maisy hapanovy fiegna, dra raha avy izy dra manao fiegna eo agnatrehanigny alitaranao ato amity tragno tihoky, ²³ dra mitenoa boak'agny an-dagnisy dra miasa vo sarao reo panoponao, ba hamaly gny rasy fagnahy, ba hapoly ze nataony ho eo amigny lohany avo. Talilio ho sy mana-signy gny mary, ba hamalia soa anazy nohonigny fahamarignany. ²⁴ Gny fa resinigny fahavalo gny Israely olonao akory nanota taminao, dra raha mihery aminao ereo, magneky gny agnaranao, mivavaky, dra mangataha famela avy aminao ato amity tepoly tihoky__ ²⁵ dra mitenoa boak'agny an-dagnisy re dra mamela gny fahotan'Israely olonao; andeso mihery agny amigny tany ze namenao anereo vo gny razambeny ereo. ²⁶ Raha mihily gny lagniasy dra sy misy ora akory nanota taminao gny vahoaky__raha mivavaky magnatriky ty toera tihoky ereo, magneky gny agnaranao, dra miala amigny fahotany aby napahory anao__ ²⁷ dra mitenoa agny an-dagnisy dra mamela gny fahotanigny panoponao vo gny Israely olonao, gny fa mapianasy anereo gny lala soa ze tokony handehana hanao. Mandasaha ora eo amigny taninao, ze namenao ho lovanigny olonao. ²⁸ Raha atao ho misy mosary eo amigny tany, na atao ho misy areti-mandringa, hamaim-bary na maty fosy, valala na sopanga; na atao ho manafiky gny vavahadinigny tana ao amigny tanin'ereo gny fahararia, na misy areti-mandringa na fahararia__ ²⁹ dra raha atao ndraiky ho misy vavaky vo fangataha nataonigny olo raiky na gny Israely vahoakao manotolo__ze samby mahay gny arety vo gny alahelo agny apony aby raha mamelasy gny tagnany ho amity tepoly tihoky izy. ³⁰ Dra mitenoa agny an-dagnisy, gny toera honegnanao; mamela, dra valio soa gny olo aby nohonigny lalany aby; Hanao mahay gny fony, akory hanao dra hanao avo gny mahay gny fon'olombelo. ³¹ Atovy zay ba hatahoran'ereo anao, ba handehanan'ereo amigny lalanao amigny andro aby iegnan'ereo ao amigny tany ze namenao an'ireo razambenay. ³² Gny amireo vahiny ze sy isan'Israely olonao, saiky__nohonigny agnaranao lahibe, gny tagnanao mahery, dra gny sandrinao misotra__dra avy vo mivavaky magnatriky anity tragno tihoky, ³³ dra mitenoa re agny an-dagnisy, ze toera honegnanao, dra atovy ze angatahinigny vahiny aminao aby, ba hahafataranigny olon'aby eto atany gny agnaranao dra hatahoran'ereo anao, araky gny ataon'Israely olonao manoka, dra ba hahafataran'ereo fa ty tragno ze naoriko tihoky dra atao amigny agnaranao. ³⁴ Raha atao ho mandeha miboaky hialy amigny fahavalon'ereo gny olonao, na ino na ino fomba nandrefesanao anereo, dra raha mivavaky aminao magnatriky ty tana ze voafilinao tihoky ereo, dra magnatriky gny tragno ze naoriko ho anigny agnarako. ³⁵ Dra mitenoa gny vavaky, vo gny fangatahan'ereo boak'agny an-dagnisy, dra ameo rariny ereo. ³⁶ Raha atao ho manota aminao ereo__akory sy misy olo sy manota__dra raha atao ho ory amin'ereo Hanao dra manolosy anereo ho eo amigny fahavalo, ba hindesanigny fahavalo anereo vo hangala anereo ho babo agny amigny tanin'ereo, na lavisy na mariny. ³⁷ Dra raha atao ho saroan'ereo fa agny amigny tany ze nanova sesi-tany anereo, dra raha atao ho mibebaky ereo dra mitalia sitraky aminao agny amigny tany nahababo anereo. Raha mizaka ereo ho: 'Nanao raha sy mety zahay dra nanota. Rasy fitondra-tegna izahay.' ³⁸ Raha atao ho mihery aminao amigny fony manotolo vo gny fagnahiny manotolo agny amigny taninigny fahababoany ereo, ze nindesany anereo ho babo, dra raha atao ho mivavaky amigny taniny ereo, dra ze namenao ho anigny razamben'ereo, vo manandrify gny tana ze nifilinao, dra manandrify gny tragno ze naoriky ho anigny agnaranao. ³⁹ Dra tenoy boak'agny an-dagnisy, gny toera honegnanao, gny vavak'ereo vo gny fangatahan'ereo famozena, dra ameo gny rariny ereo. Mamela gny olonao, ze nanota taminao. ⁴⁰ Amizao, ry Zagnahariko, miangavy aminao zaho, aoky hisokaky gny masonao, dra aoky gny sofinao hiteno gny vavaky ze atao eto amity toera tihoky. ⁴¹ Amizao dra misangana, ry Yaveh zagnahary, eo amigny toera fisaharanao, Hanao vo gny fiaranigny tazakao. Aoky gny pisoronao, ry Yaveh zagnahary, ba hitafy famozena, dra aoky reo olo-masinao hiravo amigny fahasaranao. ⁴² Ry Yaveh Zagnahary, ka mapiody gny tavanigny voahososao hiala aminao. Sarovy reo asanigny sy fivadiha-pagnekenao ho an'i Davida, panoponao."