¹ Paoly, mpanompo'i Jesosy Kristy, voatoka ho apostoly, le nofiliegne manokagne ho mpitalily ty talilisoan'Andrianagnahare. ² Fa nampitamae'e tama'o mpitoky ntaolo tagnate Soratse Masigne o talily zao. ³ Mikasike i Anae'y zay, niboake nofotse amy ty foko'i Davida. ⁴ Naho fa nivagnom-belogne, fa voasoratse te i Reke ho anake maherin'Andrianagnahare boak'amy ty hery ty fagnahe Mpagnamasigne_le i Jesosy Kristy Tompontika. ⁵ Boak'Ama'e ty fitahiantsoa naho ty nihaviagne ho apostoly naho ty fihasiam-pinoagne amy ty tane iaby toy, boak' amy ty Tahina'e. ⁶ Le nareo ka nifilianegne hoe ty tane toy iaby mba hoe'i Jesosy Kristy. ⁷ Ho ahi'o maro t'a Roma ao ty taratasy toy, hoe ty mahafantatse an'Andrianagnahare, hoe ty noriza'e ho olo-masigne. Loniky ho'ama'areo ty fitahiantsoa, naho ty fiadanagne boak'aman'Andrianagnahare Raintika naho i Jesosy Kristy Tompo. ⁸ Voaloha'e, isaorako ty Andrianaghareko boak'am'i Jesosy Kristy naho ty ama'areo abike, fa notaliliegne tamy ty tane toy ty finoa'areo. ⁹ Fa vavolombeloko ty Andrianagnahare, kokoako amy ty fagnaheko agnate ty talilisoa i Anae'y, tsy mitofa raho ty mitalily Aze anareo. ¹⁰ Mangatak'avao ty zotom-pon'Andrianagnahare raho amy ty vavake anoeko mba hilefesa'ty fiaviako ama'areo agne. ¹¹ Naho i raho le te hahatrea anareo, soa te hahafahako magnome fagnomezam-pagnahy hoanareo ndre ie tsy maro, le ty mba hampahery anareo. ¹² Izao, le ty mba fa gniriako zao le ty mba hifampaherezantika sambe tika, amy ty finoantika tsiraidraike, ty anareo naho ty ahy. ¹³ Henanekeo, tsy teako tsy ho fanta'areo, ry rahalahy, le miharoky ty ho'ama'areo agne avao raho, ( fa ie le tsy mete lefe avao), mba hahazoagne vokatse ama'areo, manahaky ty fa nahazoako tama'o jentilisa'o ka. ¹⁴ Mpitrosa amy iareo Grika naho ambahiny reo raho, amy ty mahilala naho ty gege. ¹⁵ Le ie zao, amako, le mbe vognogne avao raho ty hitalily i talily soa'ay a Roma agne. ¹⁶ Naho ty amako, tsy mahamegnatse ty talily soa, fa io ty hamonjean'Andrianagnahare ze mino aze, hoe'y ty Jiosy he le hoe'y ty Grika. ¹⁷ Amy io ty hanengeagne ty fahamaregnan'Andrianagnahare amy ty finoagne hoe'y ty finoagne, araky ty nisinoratse te: "Velogne amy ty finoa'e ze maregne". ¹⁸ Ty helon'Andrianagnahare naboa'e boak'an-dagnitse malaigne ty haratian-tsereke naho ty vande'o ndaty, ze mikalagne ty raha maregne amy ty raha tsy maregne. ¹⁹ Satria nifanta iareo naho fa mikasike an'Andrianagnahare, le nitrea iareo. Fa niloven'Andrianagnahare iareo. ²⁰ Le ze tsy trea'e maso, ty heri'e tsy tapetapetse naho ty maha-Andrianagnahare Aze, le nitrea mazava soa, tamy ty nanombohagne ty namorognagne ty tane toy naho ze kila raha. Naho izay le tsy hoafan-tahigne iareo. ²¹ Izao le satria, ndre te ie nifanta'iareo ty Andrianagnahare, le tsy nihasignè iareo ty voninahitse maha-Andrianagnahare Aze, naho nisaots'Aze. Fe ie, a'o ndra nivalike ai'a ty loha'iareo, nikiteke ty fiai'e. ²² Nanao ty tegna'iareo ho mahilala iareo, fe ie ndra nivaha. ²³ Ty hasin'Andrianagnahare tsy mete lo ndra nova'iareo sare'o ndaty mete lo, vorogne, biby efa-tomboke, naho raha milaly. ²⁴ Naho izao le nataon'Andrianagnahare ho ama'e ty hatea raha'iareo ty fanagnan-kakeo, le hohafan-kasigne amy iareo eo avao iareo. ²⁵ Iareo ty nagnafake ty fahamarenagn'Andrianahare amy ty vande, le ze midera naho manompo raha hafa i Magnitse'y, le hoderaigne hatrampara'e. Amena. ²⁶ Naho izao, nitoloran'Andrianagnahare ty filan-draty faly iareo, fa novà ty ampela'iareo ho raha tsy natànagnahare ty fiarahagne amy ty raha natànagnahare. ²⁷ Manahaky izay ka, ty lahilahy, nengà iareo i filagn'ampela natànagnahare'y fa ndra sambe iareo lahilahy ka ty nifampila. Lahilahy zao nanao raha mahamegnatse mindre amy lahilahy le nandra'e ty saze magneva aze noho ty filàn-draty natà'iareo. ²⁸ Satria tsy nimete nagneke ty hanagne an'Andrianaghare amy ty fametsevetsea'e iareo, le notoroa'e saigne tsy magneva iareo, mba hanoa'e ty raha tsy ie. ²⁹ Nifeno ty tsy fahamarinagne iareo, haratiagne, tevan-draha, naho ty loiloy abike. Feno fialonagne iareo, famonoagne, lie-draha, dramotse, naho ty eretsere-draty. ³⁰ Mpitsiko iareo, mpanalatse, naho malaigne an'Andrianagnahare. Marengerenge iareo, miavogne, le misengesenge. Mpamorogne raha raty iareo, le tsy mihasy ty rae'e naho ty rene'e. ³¹ Tsy raha mahilala iareo, tsy hay atokisagne, tsy manan-katea nataon'a Agnahare, naho tsy miferenaigne. ³² Hay iareo ty lilin'Agnahare, evai'y ty ho mate ty manao raha manahak'izay. Fa ie tsy izay avao ty nata'e, fa magneke ze manao manahak'izay ka.